2 Tesalonika 3 - Allah Wene Hurumbik Keron

Nit ninake sembahyang iuk-o ulug yig isebahon wene 3:1-5

¹ Nomini-o, At Allah wene hit hinanggelegmen su atisi etno hag, o ahik ya da obog wawag ulug ninake sembahyang iuk-o.

² Eke At Allahen it aphe inobabut dahon epmano inindien eberoko warukmu ninili wawag ulug sembahyang iuk-o. Eke it yi aphe di aphe obohen Allah wene eberoko waruk eleg-o.

³ Eke At Allahen ebahon etno ilitoho-at suhu-o. Eke Aren hit hinindi oag werehep hisaharuk wilil, at ap dag surukon hinapma seberepfuhu-o.

⁴ Eke niren yig hisaruk aheon ilitoho suruk ahep etno hag, fobik ilitoho suhup ulug At Allahen hit farim yig nisaruk-o.

⁵ Eke hit hinindi At Allah hinim hunduhuk welamon etno inim, eke At Kristusen hinindi oag werehep hisahukon etno inim obog-at At Allahen og hisawag ulug yig hisehe-o.

Hit hineyabuk fanoroho suruk amuk-o ulug yig isebahon wene 3:6-15

⁶ Nomini-o, At Ninowe Yesus Kristus inuk fam duroho yig hisaruk ahe-o, it hinomini epmano inaborali wilil, niren yig isarukukon etno ilitoho suruk elehon halug, it inakelegsoho sohorep isiuk-o.

⁷ Eke niren suruk atukukon etno ilitoho suk ari fano-o, ulug hit hiniluk-o. Eke nit hit hinanggelegma wilil, ninaborali elegsoho welatukuk etno hit hiniluk-o.

⁸ Eke at ap misihen yi angge di angge og nisarukmu, niren onggo eleg yuhun-at holarukuk fug-o. Eke ariroho holarukuk fureg, yabuk sat anggolo suruk atukuk-o. Eke ilikia hupmu yabuk suruk atukuk ari, hat misihen nit ninabuen yi angge di angge og nisa nowen ulug suruk atukuk-o.

⁹ Eke hiren yi angge di angge og nisawag ulug yig hisolowon oke, og nisimiek ulug yig hisarukuk fug. Ariroho yig hisarukuk fug ari, hit hinil nisalug ilitoho suruk amag ulug suruk atukuk-o. Ariroho suruk atukukseg, eke hit yig hisaruk wilil,

¹⁰ “Ap aborali wilil, yabuk suruk amberakon halug, yi angge di angge narukon epmano menag um fug-o,” ulug hit hinanggelegma wilil yig hisarukuk-o.

¹¹ Eke wene ariroho yig hiseheon ari, ap hit hinomini nin inaborali wilil, yuhun-at sil nuruk-o, ninesanggo holtukukseg, ariroho yig hisaruk ahe-o.

¹² Eke it ap inaborali werehon epmano inaplohok elegsoho wilil, inaharom iren angge-at nawag ulug At Ninowe Yesus Kristus inuk fam yig hisaruk ahe-o.

¹³ Eke hit hag, yi angge di angge epmano fanoroho suruk ahep etno hag, hinambit heheg eleg ilitoho-at suruk amuk-o.

¹⁴ Eke holal du fam yig hisaruk aheon etno ap misig esanggo holtuk eleg halug, ap etno enggali hawagsoho hiren ap du dag suruk-o, ulug enggali warepfeheg, eke ebe sohorepfiseheg suruk amuk-o.

¹⁵ Eke at etno mondog-at hinim healeg neken welam fug-o. Ninomin ulug esanggo fikfag watuk amuk-o.

Wene epmano yig isaruk apareg fobik atog arat yig isebahon wene 3:16-18

¹⁶ Eke At Ninowe dambuk ninaptukon etnowen hit obog dambuksoho welamon etno og hiseheg, eke hinim welaheg suruk amag ulug yig hisehe-o.

¹⁷ Eke an ninggiken wene holal baltuk wilil an Paulusen wahinaniog ulug heahi war hinabihi-o, ulug an ninggiken balihion etno hiren wene holal du at Paulusen bal nisarisi ulug hiniluk amag ulug ninggiken bal hisihi-o.

¹⁸ Eke At Ninowe Yesus Kristus etno hinim wilil hinabua hisawag ulug yig hisihi-o.