2 Petrus 2 - Allah Wene Hurumbik Keron

It ap nin inenggal neken wene yanggul hisaruk-o ulug yig isebahon wene 2:1-22

¹ Nomini-o, amuk nabi ap inenggal ebahon it aphe inenggal neken yig isebag etno hag, it inenggal urukon epmano hinambeg watlug yig hisa wamuhup-o. Yig hisa wamuhupseg, wene inenggal uruk wilil, At Ninowe seberepfuruk amuhupseg, inonggareg inebe-at suontepatahup-o.

² Suontepataruk amuhubon oke, eke it aphe nin inesanggo holuhup-o. Holtuk amuhupseg, demat wene etno seberepfulug sohorep isahup-o.

³ It epmano inonggarehen yi wene di wene inahla buhupseg, hit hinebe inapmarep hisaharuk amuhup-o. Inapmarep hisaharuk amuhubon oke, eke at oag del inaptukon etno iluk wilil, fobik mondog dagma-at imbisahu-o.

⁴ Eke o amuk it malaikat dahon epmano At Allah sohorep isalug, inakeleg lebahon etno At Allahen fobik oag del inabuhuken ulug hele waroko o dagma imbisebag-o.

⁵ Ari sebag etno ilitoho, it aphe amuk dag sebahon epmano At Allahen inili weheg eleg ik suon etno fam war inapag-o. It epmano obog-at war inaptuk wilil oke, eke at Nuh udaki sabiren angge inim wene fano wene waruk apag etno fam, inili webag-o.

⁶ Eke ari hag, it aphe dag surukon epmano inakol amag ulug At Allahen o Sodom Gomora aphe dag surukon epmano war inabiog ulug hurumbik yig isaruk apareg, hondok fam war inapag.

⁷ War inaptuk wilil oke, eke at Lot etno it dag surukmu ambit isaruk wilil obabut fano weregma, ili webag.

⁸ Ili webag ari, at Lot bilin it dag surukon epmano inim wilil, it inakeleg-at dag surukmu isaruk apareg, at Lot etno indimu akoltoho wereg haruk apareg, ili webag.

⁹ Eke bilin at Lot ili webag etno hag, fobik At Allahen it aphe inobabut fanowon epmano o fanoma imbiseheg, it dag surukon o dagma imbiseheg suhu-o. Eke it Allah wene ninambit-o, ulug urukon epmano inim, it kweanmen surukon etno inim obog-at dagma imbisiog ulug wereg-o.

¹⁰ Eke it aphe inenggal yig hisarukon ari inahlahiroho wilil, it malaikat boholmon etno inakol isaruk eleg-o.

¹¹ It malaikat inoag suon wereg oke, At Allah olohotma inune dahon aphe inobam denggeltuk eleg-o.

¹² Eke it malaikat aphe inobam denggeltuk eleg oke, eke it inenggal wene yig isarukon epmano wam eli neken aben senoko war inabuog ulug wereg-o. Eke it inapelehon neken uruk isalug, fobik mondog war inabuhu-o.

¹³ Eke it inenggal wene urukon epmanowen aphe inambolma dahaltuk isalug, o dagma-at imbisahu-o. Eke it dag surukon epmano inenggali eleg wilil, o kweanmen surukon epmano selegma-at suk inindi-o. It ariroho surukon etno hinim orom naruk wilil, hinenggali war hinaptuk-o.

¹⁴ Eke it epmano hwe dahon inilag warukon etno-at suog ulug heahil nuruk-o. Heahil nuruk wilil, nintul nantul dag suk ulug inahla buruk-o. Inahla buruk wilil, bak yep suruk etno hag, iren aphe inindi elehen epmano dag sukag ulug inindi kahalik waharuk-o. Ariroho suruk wilil, inindi dag mondog-at wereg isalug, fobik At Allahen waramiek yig isahu-o.

¹⁵ It aphe dag surukon epmano kwalem fanowon inapeleg atlug, werlekke laruk-o. Laruk wilil, at Bileam Beor amloho onggalem etno-at laruk-o. At Bileam etno amuk uang og nemag ulug ahla buruk wilil, kwalem dahon etno larukmu, enggalirepfebag etno hit hiniluk-o.

¹⁶ Eke at Bileam kwalema larukmu, wam keledai indi elehon etnowen olohot baloko aphe inune hag yig ituk apareg, at Bileam kwalem fanowon etno fam lawag ulug enggalirepfebag-o.

¹⁷ Eke it aphe dag surukon epmano bun ele balegma ik firig atukon neken wereg-o. Eke nin, orom filikon hik isarukon neken wereg-o. Ariroho weregma, At Allahen fobik o dagma epma imbisiog ulug ahla buruk-o.

¹⁸ It inenggal neken urunanggeroho urukon ari kweanmen surukon etno ninindi-o, uruk isalug, iren aphe inindi ebetuk elehon epmano og inaplug o dagma epma imbisuog ulug inindi kahalik waharuk-o.

¹⁹ Eke it dag surukon epmano iblis apma neken wilil, urunanggeroho suruk-o. Ariroho suruk ari, it ap inindi werehon neken suruk eleg-o. At dag surukon etno anggimbu wilil, inonggarehen at dahon etno apma kuruk-o.

²⁰ Eke at ap misig o kweanmen surukon etno sohorep isalug, At Ninowe Yesus Kristus une urukon esanggo holtug halug, fobiken iog suhuluk kwalem dahon etno laruk wilil, dahon etno obam ombataruk-o.

²¹ Eke ap etno bilin kwalem fanowon lelep fugmen fano-o. Kidia Yesus kwalem etno dorat iluk wilil, fobik sohorep isarisi etno fam, onggarehen o dagma imig saruk.

²² It ariroho surukon ari, yanggeyen wamen suruk etno ilitoho suruk-o. Eke at yangge etno fobo witlug, fobik iog suhuluk na laruk-o. Eke it wam kume watuk elehon etno hubut-at wataruk wilil, urunanggeroho sil nuruk etno hiniluk-o.