2 Korintus 8 - Allah Wene Hurumbik Keron

Hit Allah udaki wilil hinomini yalmag inabuog ulug suroho og isimuk-o ulug yig isebahon wene 8:1-15

¹ Nomini-o, At Allah udaki o Makedonia werehon epmano At Allah ahien isaruk heheg suruson epmano hit hiniluk amag ulug yig hisaruk ahe-o.

² Eke it epmano inindi kahaluog ulug dahon anggolo inobam umburuson oke, inahien anggolo haruk wilil, Allah ake ulug yi angge di angge anggolo umburusa-o. Ariroho umburusa ari, it inaharek dorat werehon oke,

³ ebe anggolo suon neken-at umburusa epmano fam an demat yig hisaruk ahi-o.

⁴ Eke iren it Allah udaki o Yudea werehon epmano yalmag isuog ulug inonggareg inahla buruk wilil niren anggolo-at og isuk ulug yig nisarusa-o.

⁵ Eke niren it du arat umburusa ulug ninahla burukukon oke, fobik obam seberoho inim umburusa ari, it bilin inebe At Ninowe etno og itusareg, fobik At Allahen ahla buruk etno ilitoho inebe nit-at og nisarusa-o.

⁶ Eke ari halug, at Titus etno bilin yabuk duma sirisireg fam, atog fobik neken hit Allah udaki hinim hinindi hunduhuk wilil, Allah ake umburuk amon etno yig hisawag ulug yig itukuk-o.

⁷ Eke hit hag yiroho diroho suruk amon obog hiniluk wilil, Allah wene demat ulug ebetuk ahebon epmano inim, eke hinune uruk ahebon epmano inim, eke yi angge di angge hiniluk welahebon epmano inim, eke ninebe hinindi hunduhuk welahebon epmano inim, eke aphe yalmag inabuog ulug suruk ahebon epmano inim obog-at ariroho suruk hisalug, kidia Allah ake etno anggoloroho umbukag ulug yig hisehe-o.

⁸ Eke ariroho siuk ulug yig hisaruk ahi fuhon oke, it ninen anggolo umburusa ulug yig hisaruk ahi ari, hit hinindi hunduhuk wilil, keroho umbuhup ulug hinaren baliog ulug yig hisihi-o. Eke At Ninowe Yesus Kristus etnowen ahmu nisebag etno hit hiniluk-o.

⁹ At etno aharek anggolo welapahon oke, hit hinake-at aharek elehon neken seg apag-o. Eke At etno ariroho aharek elehon neken seg apag ari, hit hinaharek anggolo werehep hisahiog ulug ariroho seg apag-o.

¹⁰ Eke ari halug, alem misig du nahla buruk ahion etno yig hisamin-o. Hit hag hinonggareg hinindi buluhen tahun misig bilin welatukukon etno fam hit alem bilinon neken sirikibon epmano kidia atog suk fano ulug yig hisaruk ahi-o.

¹¹ Eke ari halug, hiren bilin o ari sambit atog suhuk ulug hinahla birikip etno hag kidia hit hinaharek wereg epmano ilitoho suruk amuk-o.

¹² Eke hit hinaharek anggolo werehon epmano anggolo embeheg, eke hit hinaharek dorat werehon epmano dorat embeheg suruk hisalug, At Allah ahien hisahu-o. Eke hit hinaharek elehon epmano dorat embehep ulug winimug hisahu fug-o.

^13-14 Eke it aphe nin hag og isaruk wilil, hit hag hinaharek eleg amag ulug yig hisihi fug-o. Hit kidia hinaharek anggolo wereg halug, it nin kidia inaharek elehon epmano yalmag inaptuk amag ulug yig hisihi-o. Ariroho suruk hisalug, eke fobik hinaharek eleg aruhumu, it inaharek anggolo wilil hit yalmag hinabuhup-o.

¹⁵ Eke wene ebe Alkitab famen yig nisaruk wilil, “At ap aharek anggolo werehon etno nin dinik atisi fug-o. Eke at aharek dorat werehon etno hag erlog atisi-o,” ulug yig nisaruk-o.

At Titus etno lahapfebahon wene 8:16-24

¹⁶ Eke at Titus etno hit hinindi yabuk sukag ulug At Allahen indi oag werehep firision etno fam wa ulug yig ituk ahe-o.

¹⁷ Eke niren at Titus yig ituk atukukmu, aren fano ulug uruk atisireg dulum-at yalmag inabik lik ulug onggarehen ahla buruk atisireg, hinambeg waharisi-o.

¹⁸ Eke at Titus etno inim lawag ulug, at ninomin o ahik ya da wene fano wene yig isarukmu inuk suontepfuruson etno inim lahapfuruk ahe-o.

¹⁹ Eke at ninomin ari an ninim lawag ulug it Allah udaki epmanowen fuloko umburusa-o. Ariroho fuloko umburusareg fam, niren At Allah inuk suontepfeheg, eke yalmag hinaptuk ahe ulug bukaloko yig iseheg suruk amuhuken ulug ninindi hunduhuk wilil sukon ari at ninomin etno ninim-at sil lahuk-o.

²⁰ Eke iren yi angge di angge anggolo Allah ake umburuson epmano niren og isa laruk nisalug, dahan fahan suruk yig nisa nowen ulug, niren we fikfag fanoroho-at suruk ahe-o.

²¹ Ariroho suruk ahe ari, At Allah il fam inim, eke it aphe inil fam inim motoho-at suog ulug suruk ahe-o.

²² Eke ari halug, at ninomin etno it inim lawag ulug lahapfuruk ahe-o, eke at ebe lahapfehe ari, niren nintul nantul aren baltukukseg oke, obabut fanoroho yalmag inabukon-at harukuk-o. Eke kidia it fano suruk ulug hinabug esanggo holtuk atisireg, aren mondog yalmag hinabiog ulug suruk-o.

²³ Eke at nomin Titus etno hag, ninim hit hinindi yabuk suruk ahe-o. Eke it ninomini nin at Titus inim hinambeg waharukon ari, it aphe demat ulug ebetukon epmanowen mondep isarusareg fam, At Kristus inuk etno suontepfuruk-o.

²⁴ Eke ari halug, it inebe obog hinim hinindi hunduhuk neken welamuk-o. Ariroho wereg hisalug, it Allah udaki obohen hit hinaren surukon epmano iniluk atlug, niren suontep hisaharuk aheon etno demat urusa ulug inahla buhup-o.