2 Korintus 7 - Allah Wene Hurumbik Keron

¹ Eke ari fam, nit ninebe inim, ninindi inim sabele neken denggelepatehe ha nowen ulug ninonggarehen ho saruk amuk-o. Eke ariroho suruk wilil, At Allah ninakoltoho ninobabut fano mondog welamuhuken ulug suruk amuk-o.

An nahien harikik-o ulug yig isebahon wene 7:2-16

² Niren yig hiseheon etno ebebuog ulug hinindi sok husig neken welamuk-o. Eke ap misig ninenggal-at obam denggeleheg, eke obabut indi arik sebeheg, eke ap misig ninalomnangge holeheg suruk atukuk fug-o, ulug ihion ari hit hinoag del hinabiog ulug yig hisihi fug-o.

³ Eke waramuog ulug inim, niniluk welamuog ulug inim, hit ninim welam ninindi hunduhuken uruk ahi-o, ulug yig hisarukukon etno fobik inim dahagsoho yig hisaruk ahi-o.

⁴ Eke anden yig hisawon etno demat suhup ulug bukaloko yig hisaruk wilil, suontep hisaharuk ahi-o. Eke dahon anggolo ninobam umburukon oke, hit farim ninindi werehepataruk wilil, ninahien anggolo haruk ahe.

⁵ Eke nit o Makedonia waharukukseg, sat kelsarukuk fug-o. Eke it obohen dahan fahan-at suruk isalug, it anggolo ninim winimug abeheg, eke ninindi undamen ninakol heheg suruk atukuk-o.

⁶ Eke At Allah ap inindi oag eleg isalug oag werehep isarukon etnowen at Titus ninambeg lahapfik waharisimu, ninindi oag werehep nisaharisi-o.

⁷ Eke at etno waharuk atisimu, ninahien haruk atukukseg hiren at indi werehepfirikibon etno dindiloko yig nisarisi etno fam ninindi oag werehep nisaharisi-o. Eke an nebe hit bik nisa wamag ulug hinindien suruk ahebon etno inim, eke an farim hinindi dag atukon epmano inim, eke hiren an nake suruk ahebon epmano inim, obog-at yig nituk atisimu, kidia nahien anggolo haruk ahi-o.

⁸ Eke anden holal etno bal hisarikikmu, hit hinindi dag atikibon oke, holal etno bal isao sohorep isawim sirikik ulug nahla buruk ahi fug-o. Eke holal bal hisarikikon etno fam hinindi dag atikibon etno arat niluk atisireg, nindi dag atleon oke, fano sirikik ulug nahien haruk ahi-o.

⁹ Eke anden hinindi dahap hisaharikikon ari fam nahien haruk ahi fug-o. We hit hinindi dag atuk wilil, ioba yatuk atikipseg, hinindi wereg atikip etno fam nahien haruk ahi-o. Eke hit hinindi dag atikip etno At Allahen hinindi werehep hisaharisireg fam, anden hinindi dahap hisarikik ari fam hinobabut dahap hisaharikik fug-o.

¹⁰ Eke At Allahen ninindi dahap nisaharuk halug, niren ninili og ninabin-o ulug ukag ulug ninindi werehep nisaharuk-o. Eke ariroho ninindi werehep nisaharuk halug, niren fobik ninili og ninabuk sohorep isawim sirisi ulug uruk amuhuk fug-o. Eke yi angge di angge kweanmon fam ninindi dag atukon ari waratukon alem etno ari-at wereg-o.

¹¹ Eke At Allahen hinindi dahap hisaharisireg fam, keroho surukuk ulug hinahla eberiuk-o. Eke fanoroho suruk amon etno inim, eke ninapelehen neken surukuk ulug ukon etno inim, eke hinindi ioba yabukon etno inim, eke hinakoltoho welamon etno inim, eke fanoroho suhuk ulug hinahla bukon etno inim, eke at Paulusen irisi etno ilitoho suruk amuk ulug hinahla buruk wilil suruk amon etno inim, eke dag sirision etno onggo umbukag ulug ukon etno inim, obog-at suruk amuog ulug sirikip ari fam, hiren alem etno eleg amag ulug fanoroho sirikibon etno arat niluk atisi-o.

¹² Eke ari fam, anden holal bal hisarikik etno, at dag sirision inim, eke at dahon obam umburuson etno inim, alem ari farim yig hisarikik fug-o. Eke niren hit hinindi yabuk suruk wilil, yig hisarukukon etno hiren hinaborali elegsoho wilil ilitoho suruk ahebon etno At Allah il fam selegma amag ulug holal etno bal hisarikik-o.

¹³ Eke ari fam, hiren fanoroho suruk atikibon epmano fam ninindi oag werehepatarukuk-o. Eke hit obohen at Titus hinune hinahientoho yig itikip etno fam ahien harisi-o. Eke at ahien harision etno an yig nitisimu, an ariroho-at nahien harikik-o.

¹⁴ Eke anden at Titus yig ituk wilil suontep hisaharikikon etno hiren an nenggali hawag ulug sirikip fug-o. Eke an hit farim it ariroho suruk ulug nintul nantul hinabug demat yig isaruk ahi-o. Eke fanoroho-at suruk ulug hinabug at Titus yig itikikon etno ilitoho-at suruk atikip-o.

¹⁵ Eke at Titus etnowen ahla buruk wilil, “An nebe inambeg larikikmu, inindi inakoltoho-at heahi war naptusareg, eke fobik an nune yig isarukmu fanoroho-at inesanggo holtusa-o,” ulug indi ebetuk wilil, aren hinebe mondog indi hunduhuk wereg-o.

¹⁶ Eke ari fam, hiren ariroho sirikip etno fam, yi wene di wene yig isarukmu, fanoroho-at inesanggo holuhup-o ulug nahla buruk wilil, nahien hisaruk ahi-o.