2 Korintus 3 - Allah Wene Hurumbik Keron

Nit hurumbik keron etno anggimbu neken wilil ninolohotma sum sambunteg elehon neken welahe o ulug yig isebahon wene 3:1-18

¹ Ariroho yig hisehe ari, nit suontepatuog ulug yig hisehe ano? Eke it ninen ininuk suon amag ulug suruk etno hag nit nininuk suon amag ulug hiren inim niren inim holal umbuk ari fano buruk ahep ano? Ari eleg-o.

² Nit ninaholal baleg ari hit hinebe welahep-o. Eke ninaholal ninindimu baleg werehon ari it aphe obohen wane sulug iniluk am ari fano-o.

³ Eke hinebe ninaholal baleg neken welahebon ari, At Kristusen baloko belap nisa waharisi-o. Eke ninaholal balehon ari helep fam ambusu watuk etno hag imbirisi fug-o. We ninaholal ari At Allah ilukon Roh Kudus etnowen aphe inindimu holal baleg etno imbirisi-o.

⁴ Eke ari halug, At Kristus inuk fam Allahen suhu ulug ebetuk ahe-o.

⁵ Eke nineyabuk fanoroho suhuken ulug ninonggarehen ninindi enggatepataruk ahe fug-o. Nit yabuk fanoroho sukag ulug At Allahen-at ninindi enggatep nisaharisi-o.

⁶ Eke hurumbik keron etno yabuk motoho sukag ulug At Allahen ninindi enggatep nisaharisi-o. Eke hurumbik keron yabuk ari, we holal baleg etno akeleg fam suruk ahi fug-o. At Roh Kudus etnowen-at yanggul nisarukmu suruk ahe-o. Eke holal baleg etno akeleg fam, alem dahon etno ninobam umburuk wilil, war ninaptuk oke, At Roh Kudus etnowen ninilukep nisaharuk-o.

⁷ Eke wene duroho suruk amuk eke duroho suruk am fug ulug ebahon helep fam holal balehon etno At Allah abikag suruk wilil, at Musa og ituk apagma, abikag etno eleg amon oke, at Musa olohore abikag sebag etno fam, it Israel aphe epmanowen at Musa olohore bik hao hai apag-o.

⁸ Eke wene duroho suruk amuk eke duroho suruk am fug ulug ebahon war ninaptukon etno abikag suruk wilil og epag ari fam, At Roh Kudus eyabuk etno abikag suon-at suruk wilil, og nisarisi-o.

⁹ Eke wene etnowen aphe alem dahon inobam umburukon epmano suon neken-at welapahon oke, wene alem ninobam werehon elehap surukon etno hag mondog suon-at wereg-o.

¹⁰ Eke wene kidia yig nisarukon etno ebe mondog suon-at wereg ari fam, wene duroho suruk amuk eke duroho suruk am fug ulug amuk suon neken welapahon etno kidia oag eleg neken atisi-o.

¹¹ Eke wene elamna welamon etno suon neken-at welapahon oke, wene itog mondog welamon etno hag mondog suon-at wereg-o.

¹² Eke wene du itog mondog welaruhu ulug ninahla buruk ahe etno fam, ninakol elegsoho-at yig isaruk ahe-o.

¹³ Ariroho yig isaruk ahe oke, eke at Musaen sebag etno hag, ilitoho suruk ahe fug-o. Eke at Musa olohore abikag surukon etno eleg atukmu, it Israel apheyen inilanggen ha nowen ulug, at Musaen olohotma sum etno sambuntepatebag.

¹⁴ Ariroho suruk apareg fam, kidia it Yahudi aphe inahla burukon epmano sok lareg neken wereg-o. Eke at Musa olohore sum sambuntepatebag etno hag, it Yahudi ap kidia hurumbik amukon holal baleg etno wane suruk wilil sum sambunteg wereg etno fam inilanggen hupnig neken wereg-o. Ariroho wereg oke, At Kristus awene etno-at waruk isalug, sum sambunteg neken werehon etno eleg atuk-o.

¹⁵ Ariroho eleg atuk oke, eke it Yahudi ap epmano hag, kidia at Musa wene etno wane suruk wilil, inahla burukon epmano sum sambunteg neken wereg-o.

¹⁶ Eke Alkitab famen yig nisaruk wilil, “At Musa etno at owe olohore dahag uruk apagma, sum sambuntehon etno eleg apag-o,” ulug ebahon etno wereg heheg, it Yahudi ap Inowe obikit inolohore dahag uruk isalug, inasum sambuntehon etno eleg aruhu-o.

¹⁷ Eke At Owe ulug holal fam embebahon etno ari At Roh Kudus ulug embebag-o. Eke At Ninowe Roh Kudus etno weregma inilanggen haruk isalug, iniluk amag ulug aren sum sambuntehon etno korep isaruk-o.

¹⁸ Eke ari halug, hit obog ninolohore sum sambunteg elehon neken wilil, At Ninowe suon abikag suruk wilil alon werehon etno wukahi fam haruk etno hag ninilanggen haruk ahe-o. Eke At Roh Kudus etnowen nit ninebe At Ninowe etno ilitoho seg amag ulug suontep nisaharuk wereg-o.