2 Korintus 12 - Allah Wene Hurumbik Keron

At Paulusen an ni ariroho og haruk seyag-o ulug yig isebahon wene 12:1-10

¹ Eke an suontepataminon etno fam nindi werehep naharuk eleg oke, an nebe noho ful fal neken At Allahen yig nitukmu ni og harikikon etno kidia yig hisamin-o.

² Eke at ap Kristus awene warukon misig etno an niluk-o. Eke at ap etno empat belas tahun bilin welahoahon epmano fam ebe o boholma-at walug lahabag-o. Walug lahabag ari demat walug lahabagma yig hisamin ano, we i og hebahon etno farim yig hisamin ano an napeleg-o, At Allah akeleg-at iluk-o.

³ Eke at ap etno o Firdaus walug lahabag ari, demat walug lahabagma yig hisamin ano, we i og hebahon etno farim yig hisamin ano an napeleg-o, At Allah akeleg-at iluk-o, ulug misihim inim dahagsoho yig hisaruk ahi-o.

⁴ Eke ariroho walug lahabagma, eke yi angge di angge inune aphe inambiliken uk haion-at oke esanggo holfag-o.

⁵ Eke ap ariroho esanggo holfahon etno hag anden suontepfuruk ahion oke, eke an nebe hag noag elehon-at welahi ulug suontepatamin-o. Eke ariroho suontepatele ari an welahion etno-at elemen, urunanggeroho ele fug-o.

⁶ Ariroho demat eleon oke, eke anden suontepatamin fug-o. Eke at ap misihen at Paulus etno suon at-o ulug ahla buk ari hai-o. We nebe neyeheg nune holeheg suluhen at Paulus ebe duroho wereg ulug ariroho yig num ari fano-o.

⁷ Eke an yi angge di angge elalintoho surukmu haruk seyahon epmano fam suontepata nowen ulug, e alog enggaron etno fam watawag ulug uk suon neken nobam nombaharisi-o. Ariroho nobam nombaharisireg fam, at iblis o malaikaren inusuruk etno hag inggik samurlinggilig nowatuk wilil, an nebe suontepata nowen ulug uk etnowen dorontep naharuk-o.

⁸ Eke uk ari At Allahen elehepfukag ulug ninggik henahanam sembahyang irikikon oke,

⁹ At Allahen yig nituk wilil, “An nahmu hearuk ahion etno-at wereg-o, eke An noag weregsoho suruk ahion etno, hat hebe hoag elegsoho wereg healug suruk ahi-o,” ulug ariroho yig nitisireg fam, an noag elehon welahi-o, ulug suontepatawon ari nahien haruk ahi-o. Eke an nebe ariroho welahi ari, At Kristus oag werehon etno-at og nemag ulug welahi-o.

¹⁰ Eke ari halug, anden At Kristus inuk fam yi seheg di seheg suruk nealug, noag elehepfeheg, eke inune dahon nobam embeheg, eke yi angge di angge obok welamag ulug elegsoho nombahakeg, eke nebe muko wilip nahakeg, eke yi angge di angge dahon nobam nombahakeg suruk isalug, nahientoho-at welahi-o. Eke an nebe noag eleg nealug, noag werehep naharuk-o.

At Paulusen an nahmu hisaruk ahi-o ulug yig isebahon wene 12:11-21

¹¹ Eke anden ariroho sukag ulug hiren yig nitikipmu, an suontepataruk wilil, urunanggeroho suruk ahi-o. Eke hiren an suontep nahalepmen fano. Eke an nebe noag elehon-at oke, it ap inenggal nit mondep nisahabahon-at welahe-o ulug urukon epmano suon-at ulug inapma welahi fug-o.

¹² Eke hiren at Paulus demat wene yig isil nuruk amag ulug mondepfebag-o ulug hinahla bukag ulug, an nebe hit ninim nindi seberoho wilil, inakol hawon etno seheg, eke sukfuganggeroho seheg, eke elalintoho seheg suruk atikik-o.

¹³ Eke an alem misig sirikikon fam hiren nobam napelegsoho hinapma nombahuog ulug suruk ahep ano? Eke hiren it aphe demat ulug ebetukon ninon hag inindi yabuk anggolo seheg, eke nit hag ninindi yabuk dorat seheg suruk atisi buruk ahep ano? An ariroho sirikikon etno onggo og nemag ulug yig hisarikik fug ari hiren nobam napelegsoho hinapma nombahiek-da. Eke an hiren og nemag ulug wene misig ari yig hisarikik fug-o. Ariroho yig hisarikik fug ari fam hiren nobam napelegsoho hinapma nombahuog ulug suruk ahep halug siek-da.

¹⁴ Eke kidia an ninggik henahanam bik hisa wariog ulug suruk ahi oke, eke anden onggo og nemag ulug yig hisahuk fug-o. Eke an nebe ariroho sil nuruk ahi ari, hit hinaharek epmano heahil sil nuruk ahi fug-o. We hinebe-at heag hinabil sil nuruk ahi-o. Eke it inudakien iniknisi inisasi yi angge di angge og isuog ulug dugsoho umbuk ari hai-o. It iniknisi inisasien hag inudaki og isuog ulug dugsoho umbuk ari fano.

¹⁵ Eke ari halug, hit hinindi yabuk suhuken ulug an nebe og hisaruk wilil, nonggareg naharek fam-at onggo bal sahuk-o. Eke anden hit hinebe mondog nindi hunduhuk neyeheg, hiren an dorat hinindi hunduhuk welamuhup ano?

¹⁶ Eke ari halug, an hit hinaharek epmano holarikik fug oke, eke it ap ninen at Paulus enggal-at yamintal neken suruk wilil, ninaharek holarisi-o, ulug uruk oke, anden maram hinaharek holarikik-o?

¹⁷ Ari halug, it ap nin hinambeg lahap isa waharikik etno fam ninaharek diloko holarisi buruk ahep ano?

¹⁸ Eke anden at Titus etno lahun ano ulug hinog og harikikseg, yu uruk atisimu, at ninomin misig etno inim-at lahap isa waharikik ari fam at Titusen ninaharek holarisi buruk ahep ano? Eke an hag at Titus ninim ninobabut suruk aheon etno dahan fahan suruk nisalug, ilitoho surusa fug ulug uruk ahep ano?

¹⁹ Eke ariroho yig hisehe ari, dahon inobam wilil, nit ninil fam elehepfuog ulug suruk buruk ahep ano? Ari eleg-o. Nit ninebe At Allah il fam wilil, At Kristusen yig nisarukmu neken obog-at yig hisaruk ahe ari, hit hag hinindi werehep hisahuog ulug-at suruk ahe-o, nomini.

²⁰ Eke fobik hinambeg waruhukseg, hit an nune hinesanggo holtuk ahep fuhon etno nilanggen hisahuk ari an nambit-o. Eke hiren at Paulus obabut ninambit haruk aheon etno-at waha ulug hiren ariroho yig num ari an nambit-o. Eke hit winimug abeheg, eke hinindi hinasine aheg, eke hinune fanggogsoho eheg, eke an-at suon aruhuken ulug eheg, eke aphe inobam denggeleheg, eke aik dahog eheg, eke hinonggarehen suontepateheg, eke narlog harlog seheg, hiren ariroho surukmu an nilanggen hisaruk ari nambit-o.

²¹ Eke an fobik hinambeg waruhukseg fam At Allahen hit hinanggelegma epmen seberep nahaku ari nambit-o. Eke it ap nin hinanggelegma werehon epmano bilin dag suruk wilil, wanggik seheg, eke dahan fahan seheg suruk atuson epmano sohorep iseheg eleg-at wereg isalug an ioba yaruhuk ari nambit-o.