2 Korintus 1 - Allah Wene Hurumbik Keron

1:1-2

¹ An Paulus At Allah ahla buruk apareg, At Yesus Kristus awene yig isil nuruk amag ulug mondep naharision etno inim, eke at ninomin Timotius etno ninimen, hit Allah udaki o Korintus inim eke o Akhaya obog welahebon etno holal du bal hisehe-o.

² Eke At Ninikni Allah inim, eke At Ninowe Yesus Kristus inimen hinabua hisaruk wilil, hinim welamag ulug yig hisehe-o.

At Paulusen an Allah wa ulug yig ituk ahi-o ulug yig isebahon wene 1:3-11

³ At Allah Ninowe Yesus Kristus Ikni etnowen nit ninabua nisaruk wilil, yalmag ninaptukon etno wa ulug yig imuk-o.

⁴ Eke dahon epmano ninobam umburuk isalug, Aren ninahlahiroho yig nisaruk wilil, yalmag ninaptuk etno fam, niren it nin dahon inobam umburuk isalug, inahlahiroho yig isaruk wilil, yalmag inaptuk ahe-o.

⁵ Eke At Kristus obam dahon anggolo embebag epmano hag, ninobam umburukon oke, eke At Kristus ahlahiroho welapag etno hag, nit ninahlahiroho welamag ulug yig nisaruk-o.

⁶ Eke nit hag dahon epmano ninobam umburuk isalug, ari hit hinahlahiroho wilil hinili holawag ulug welahe-o, eke nit hag ninahlahiroho welamag ulug yig nisaruk halug ari, hit ariroho-at hinahlahiroho welamag ulug yig hisaruk wilil, hit nit ilitoho-at dahon epmano hinobam umburuk isalug, hinahla bugsoho wilil, hinindi oag weregsoho welamag ulug yig hisaruk-o.

⁷ Eke ari halug, hit hinoag weregsoho welamuhup ulug ninahla buruk ahe-o, eke nit dahon ninobam umburuk epmano hag, hit hinobam umburukon oke, eke nit ninahlahiroho welamag ulug yig nisaruk etno hag hit yig hisaruk ari niniluk-o.

⁸ Eke nit o Asiaen dahon ninobam umburuson epmano hit hinapeleg welam nowen ulug yig hisaruk ahe-o, nomini. Eke iren dahon epmano mondog angginon neken-at ninobam umburusareg fam, niniluk welamuhuk ano, ulug ninapelegsoho welatukuk-o.

⁹ Ariroho wilil, it war amag ulug yig nisaruk neken ninahla buruk atukuk-o. Ariroho ninahla buruk atukukon oke, eke nit ninobam ebebuk sohorep isalug, At Allah aphe warehon inilukap inaptukon etno-at obam ebebukag ulug ariroho seg atisi-o.

¹⁰ Eke nit hag war ninabuog ulug surukmu, Aren ninili warisi etno hag ninili waruk-o. Eke Aren ninili wahu ulug obam ebetuk ahe-o.

¹¹ Eke hiren inili wahun ulug ninake sembahyang uruk wilil, yalmag ninaptuk ahep-o. Eke it aphe obohen ninake sembahyang urukon epmano At Allahen esanggo holtug ninili warisi etno fam, it obohen wa ulug ninake sembahyang uruk amuhup-o.

At Paulusen seneni ebepahon etno dahan fahan sebahon wene 1:12–2:4

¹² Eke niren suontepataruk aheon epmano alem du wereg-o, nit ninebe niniluk wilil, o kweanma o ahik ya da inim, eke hit wereg ambeg inim ya keheg sil nuruk atukuk ari, it aphe ninen ninindi wereg ulug bukon etno sohorep isalug ninindi seberoho wilil, At Allah oag weregsoho ahien nisebareg fam, Aren yig nisarukon etno-at yig isil larukuk ulug ninindi ebetuk ahe-o.

¹³ Eke yi wene di wene wane sulug hinahla bukon etno-at holal bal hisarikik-o. Eke hit nin kidia wene atog hinapeleg welahebon oke, fobik wene obog-at hiniluk aruhu ulug nahla buruk ahi-o.

¹⁴ Eke ari halug, At Ninowe Yesus waruhu ari sambit hiren nit suontep nisahakeg, eke niren hit suontep hisahakeg suruk amuhuk-o.

¹⁵ Eke an ihion etno demat ulug nahla buruk wilil, hit ninim birenam ninahien hahuken ulug hinambeg bik hisa wamon etno nahla birikik-o.

¹⁶ Eke an o Makedonia etno liog ulug, hit bik hisa wamon etno inim, eke o Yudea etno niog suhuluk waharukmu hiren mondep nahukag ulug bik hisa wamon etno inim, obog-at nahla birikik-o.

¹⁷ Ariroho nahla birikik ari, yuhun-at ahla birisi ulug buruk ahep ano? Eke an it apheyen uruk hag, nenggal inim, demat inim urukon buruk ahep ano?

¹⁸ Eke anden yig hisaruk wilil, nenggal inim demat inim yig hisarikik fug ari, At Allah iluk-o.

¹⁹ Eke ariroho At Allah Amloho Yesus Kristus awene etno nit an, Silwanus Timotius ninimen yig hisarukukon etno enggal inim demat inim uruk eleg-o. Eke At Yesus inuk fam At Allahen demat ulug yig nisaruk-o.

²⁰ Eke At Allahen ariroho suhuk ulug hurumbik ebahon etno At Yesus inuk fam demat ulug yig nisaruk-o. Eke demat ulug yig nisaruk ari fam niren At Allah inuk suontepfuog ulug, demat ulug uruk ahe-o.

²¹ Eke nit ariroho uruk aheon epmano At Kristus ninim ninoag weregsoho ninombisaharuk ari, At Allahen-at-o. Ari halug, At Allahen-at fuloko ninombisaharisireg fam Aren silo neken ninombisaharisi-o.

²² Eke aren og hisahuk ulug abug yig nisebahon etno demat og nisahu ulug ninahla bukag ulug At Roh Kudus etno ninindimu og nisarisi-o.

²³ Eke an nahla buruk ahion etno At Allahen iluk wereg halug, demat yig hisaruk ahi-o. Eke an o Korintus epma awan waharuk ahi fug ari, hit hinahap wendaroko neken welahi.

²⁴ Eke hit hinoag weregsoho wene demat ulug ebetuk ahep ari fam, anden hit ariroho hinindi ebetuk amuk ulug nalontoho wilil yig hisiog ulug suruk ahi fug-o. Eke hit hinahien hawag ulug an hit hinim yabuk suruk ahe-o.