1 Yohanes 5 - Allah Wene Hurumbik Keron

Kweanmen sukon etno apmarepfuruk ahe-o ulug yig isebahon wene 5:1-5

¹ Eke nin At Yesus ari Kristus ulug wapag-o ulug inahla ebetukon halug, Allah udaki-at wereg-o. Eke ikni indi hundutuk isalug at udaki ariroho-at inindi hun inaptuk-o.

² Eke it Allah udaki ninindi hunduhuk welahe ari, At Allah ninindi hunduhuk wilil, komo yig nisarukon etno-at suruk ahe-o.

³ Eke At Allah ninindi hunduhuk welahe ari, aren komo yig nisarukon etno suruk nisalug, we ari fam niniluk atuk-o. At Allahen komo yig nisarukon etno abutseon-at yig nisaruk-o.

⁴ Abutseon yig nisarukon ari, ilitoho suruk wilil, eke it Allah udaki halug kweanmen sukon etno apmarepfuruk-o. Allah wene demat ulug ebetuk ahe halug, kweanmen sukon etno seberepfulug apmarepfuruk ahe-o.

⁵ Eke kweanmen sukon etno sen apmarepfuruk-o? Ari it At Yesus ari Allah Amloho at-o ulug inindi ebetukon etnowen-at kweanmen sukon etno apmarepfuruk-o.

At Yesus Kristus demat kweanma wapag-o ulug yig isebahon wene 5:6-12

⁶ Eke at kweanma wapahon ari, At Yesus Kristus wapag, ik inim, amep inim walug wapag, ari ikma belapfebahon etno inim, amep deloko embebahon etno inim walug wapag. Ik-at walug wapag fug, we biren eta ik inim, amep inim walug wapag. Walug wapag ari, At Roh Kudus etnowen demat walug wapag ulug yig nisaruk-o. Eke yig nisaruk ari At Roh Kudus etnowen demat ulug yig nisaruk-o.

⁷ Eke yig nisarukon ari, boholmen it henahanen yig nisaruk-o, ari Ikni etno inim, At Wene etno inim, eke Roh Kudus etno inimen boholmen yig nisaruk ari, wene misig-at yig nisaruk-o.

⁸ Eke o kweanmen it henahanen yig nisaruk-o, ari At Roh Kudus etno inim, eke ik etno inim, eke amep etno inim, it henahanen wene misig-at yig nisaruk-o.

⁹ Eke it aben wene yig nisaruk halug, ebetuk ahe-o, At Allah wene mondog oag werehon halug, At Yesus ari At Allah Amloho at-o ulug yig nisarukon etno demat ulug ebetuk amuk-o.

¹⁰ At Allah Amloho obam ebetuk nisalug, ari ninindi famen demat ulug ebetuk ahe-o, eke At Allah Amloho obam ebetlug eleg urukon halug, At Allah-at enggaltepfuruk-o. At Allahen At Yesus ari An Namloho at-o ulug ebahon etno ebetlug eleg urukon halug, At Allah-at enggaltepfuruk-o.

¹¹ Ari halug, wene yig nisarukon etno du at-o, At Allahen niniluk welamon etno og nisebag, At Amloho og nisebag halug, ari niniluk welamon etno-at og nisebag-o.

¹² Eke At Allah Amloho ninindimu wereg halug, niniluk welamon etno-at waruk ahe-o, eke At Allah Amloho ninindimu eleg halug, niniluk welamon etno waruk ahe fug-o.

Hiniluk welamon wene etno yig hisihi-o ulug yig isebahon wene 5:13-21

¹³ Eke hiren hiniluk welamon etno hiniluk amag ulug holal du bal hisihi-o. Hit Allah Amloho inuk ebetuk ahebon epmano hiniluk welamon etno holahup-o. At Allah aso wilil, ninindi oag weregsoho ninim welaheon alem du at-o.

¹⁴ Eke yi angge di angge Aren du fano ulug ebahon epmano niren sembahyang uruk wilil kino uruk nisalug, demat og nisahu-o.

¹⁵ Eke At ambeg kino yig itukmu, demat esanggo holtuk-o. Demat esanggo holtuk atlug, yi angge di angge At ambeg kino uruk aheon epmano og nisaruk-o. Ari demat og nisaruk ulug niniluk atuk-o.

¹⁶ Eke yi dag di dag nit apheyen suruk aheon epmano wereg oke, eke it wene iniluk wilil oke dag surukon epmano oag deleg neken wereg-o. Ariroho werehon epma At Allahen inapelegsoho apma imbisawag ulug inake sembahyang uk fug-o.

¹⁷ Yi dag di dag surukon epmano nomin ari dag suruk-o ulug hinahla buruk atlug, Allah Nikni-o, an nominen dag surukon epmano apelegsoho hapma imbin-o, ulug uruk amuk-o.

¹⁸ It Allah udakion halug, yi dag di dag surukon etno sohorep isalug, fobik dag seheg eleg-at welamuhup-o. Eke at setanen dahap isahu fug-o. At Allah Amloho etnowen ninili waruk ari demat ulug niniluk atuk-o.

¹⁹ Yi angge di angge kweanmon at setan etnowen sen inaptukon-at oke, eke nit halug, ninebe Allahen angge-at welahe ari, demat ulug niniluk atuk-o.

²⁰ Eke At Allah Amloho etno waharuk apareg, aren Allah wene du demat yig hisaruk ahi-o ulug yangguloko yig nisebag. Wene ariroho yig nisebag halug, At Allah ninim, Amloho Yesus Kristus etno ninim ninindi hunduhuk welahe-o. Ari At Allah Ninikni-at wereg-o. Aren niniluk wilil ninitog mondog welamon etno-at og nisaruk-o. Ari demat-o, ulug nit niniluk atuk-o.

²¹ Nudaki-o, yi angge di angge du walhan suon-o ulug urukon epmano sohorep isalug fanoroho welamuk-o.