1 Yohanes 3 - Allah Wene Hurumbik Keron

At Allah udaki welahe-o ulug yig isebahon wene 3:1-10

¹ Wa nomini, ninikni ninim hunduko ninombisaharisi etno eberiek-o. Eke nit ninebe Allah udaki ulug nininuk soal ninaptisi-o. It kweanmen ebetukon Allah inapeleg halug, nit Allah udaki welaheon epmano ariroho-at inapeleg-o.

² Nomini-o, nit Allah udaki welaheon-at oke, fobik keroho welamuhuk ulug nit awan niniluk atuk ahe fug-o. Eke At Kristus etno obam ebetuk amuhupmu, At ebe hag amuhuk-o. At etno waruhumu, ebe demat hahuk-o.

³ Eke At Kristus waruhuon obabut fano etno hag, At ebe hag amuhuken ninobabut fanoroho welamuk-o.

⁴ At misig obabut dahon halug, At Allahen komo yig nisarukon etno sahaltuk-o. Dag surukon ari, At Allah une sahaltukon at-o.

⁵ Eke At Kristus mondog dag sebag fuhon oke, nit dag suruk aheon epmano ninapelegsoho apma ninombisahukag ulug kweanma ambik wapag-o.

⁶ Eke At Kristus ninim welamuhukon halug, dag suruk amuhuk fug-o. It dag surukon epmano At Kristus ebe harusa fureg, At ebe iniluk atisi fug-o.

⁷ Nomini-o, at misihen hinindi kahaluk nowen-o. At Kristus obabut fano wereg etno hag, eke at misihen fano suruk halug, obabut fano wereg-o.

⁸ Eke at misig nintul nantul dag surukon halug, at iblisen angge-at wereg-o. At iblis halug, dag surukon ari itog-at wereg-o. Eke at iblisen surukon etno eleg amag ulug At Yesus, Allah Amloho kweanma wapag-o.

⁹ Eke it obog Allah udakion halug, dag suruk eleg-o. Inikni Allah ilitoho atusa halug, dag suruk inapeleg atisi-o.

¹⁰ Eke it Allah udakion inim, it iblis udakion inim surukon ari ilit eleg-o. It mot mot suruk elehon, inomini inambit isarukon halug ari, Allah udaki fug-o.

Hinomini hinindi hunduhuk welamuk ulug yig isebahon wene 3:11-24

¹¹ Eke ninomini at misihen nindi eheg, at misihen nindi eheg nit sukag ulug, wene etno amuken yig nisebag-o.

¹² At Kain etnowen sebag etno hag suk fug-o. At Kain iblis amloho etnowen, ot Habel wapag ari, nongge farim wapag-o? Ari at Kain obabut dahon weregma, eke ot Habel obabut fano sebag arien wapag-o.

¹³ Eke ari halug nomini, it kweanmonen inambit hun hinaptuk ari keroho ulug buk fug-o.

¹⁴ Nit wareg neken welatukukon oke, kidia ninilukep nisaharisi-o; eke ninomini ninindi hun inaptuk ahe arien niniluk atuk-o. Eke at misig omini indi hun inaptuk elehon halug, wareg neken wereg-o.

¹⁵ Eke ap misihen omini ambit hun inaptukon halug ari, ap watukon neken wereg-o. Ap watukon halug, iniluk welamon etno holao ari hai-o.

¹⁶ Eke At Kristus nit ninake warapag etno niniluk-o. Nit halug, nit ninomini inake inili wa fano-o.

¹⁷ Ap misig aharek werehon etno omin aharek elehon etno ahmuroho suruk eleg halug, At Allah inim indi hunduko welam behep?

¹⁸ Nudaki-o, niren ninomini ninim hunduhuk welahe-o ulug we ninuneyen-at uk ari hai-o. Ninuneyen uruk atlug, nininggiken yalmag isa ari fano.

¹⁹ Ari halug, demat wene etno ninindimu ebetuk ahe, ulug niniluk-o. Eke At Allah ninim uruk wilil, ninindi oag weregsoho uk fano.

²⁰ Eke ninindi oag eleg neken wilil, seneni ebetuk nisalug, At Allah yi angge di angge obog iluk-o, ulug yonggonoko neken yig sao.

²¹ Ninindi seneni ebetuk eleg wilil, ninindi oag weregsoho Allah ninim welamuk-o.

²² Eke At Allahen komo yig nisarukon etno ilitoho suruk nisalug, Aren ahien ninobam umburuk wilil, niren kino uruk aheon epmano og nisaruk-o.

²³ Eke komo yig nisarukon etno ebe du at-o, At Amloho Yesus Kristus inuk fam ebebuk-o, eke At Kristusen yig nisebag etno hag, niren ninomini at misig nindi eheg, at misig nindi eheg suruk amuk-o.

²⁴ Eke At Allahen wene duroho suruk amuk eke duroho suruk am fug ulug yig nisebahon etno ilitoho suruk nisalug, At Allah ninindimu wilil, ninim welahe-o. Eke At Roh Kudus og nisarision etnowen yig nisarukmu, At Allah ninindimu wereg etno niniluk-o.