1 Yohanes 2 - Allah Wene Hurumbik Keron

At Kristus inim sil nuruk ahe-o ulug yig isebahon wene 2:1-6

¹ Eke dag surukon etno sohorep isaruk amuhuben ulug, holal du bal hisihi-o, nudaki. Eke at misihen dag suruk halug, At Yesus Kristus Ikni Allah olohotma ninake urukon wereg-o.

² At Kristus etno motoho-at sebag etno fam, dag suruk aheon epmano ninapelegsoho ninombisaharuk-o, eke it aphe obohen dag surukon epmano inim-at inapelegsoho imbisaruk-o.

³ Eke At Allahen komo yig nisarukon etno suruk nisalug, At udaki-at welahe-o, ulug kidia niniluk atuk-o.

⁴ Eke at misihen, At Allah niluk-o, ulug urukon oke, Allahen komo yig nisarukon etno ilitoho suruk eleg halug, ap etno enggal-at uruk-o, demat uruk eleg-o.

⁵ Eke at mondog Allah inim hunduhuk wilil surukon etno Aren komo yig nisarukon etno fanoroho suruk-o. Ari fam At Allah ninim welahe-o, ulug niniluk atuk-o.

⁶ Eke Allah ninim welahe-o, ulug uruk halug, At Yesus Kristus etnowen sebag etno ilitoho suk fano-o.

Wene hurumbik keron yig isebahon wene 2:7-17

⁷ Nomini-o, wene yig hisihion du keron ulug yig hisihi fug-o; amuk yig hisebahon wene etno-at yig hisihi-o.

⁸ Eke wene yig hisaminon du akelehon, keron neken-at yig hisaruk ahi-o. Wene ari At Kristus etnowen demat ulug uruk wilil, ilitoho sebag etno hag, hit ariroho wene ari demat-o ulug uruk wilil, ilitoho suruk ahep-o. Ariroho suruk ahep ari, o hikmu etno eleg atuk heheg, o seleg etno arat wereg atuk-o.

⁹ Eke at ap misihen, “An o selegma-at welahi-o,” ulug urukon oke, eke “Nomin du nambit hundutuk ahi-o,” ulug uruk halug, kidia ap etno o hikmu-at wereg-o.

¹⁰ Eke ap misihen, “Nomin du nindi-o,” ulug uruk halug, ap ari o selegma wereg-o; o selegma wereg ari, aren omin indi dahapsuruk eleg-o.

¹¹ Eke ap misihen, “Nomin du nambit buruk ahi-o,” ulug urukon halug, o hikmu-at wilil, kema lahuk ulug apelegsoho wereg-o. O hikmu wilil, ilanggen buhap sik waharuk-o.

¹² Nudaki-o, hit dag suruk ahebon epmano At Kristus inuk fam hinapelegsoho imbisarikip famen, anden holal du bal hisihi-o.

¹³ Niknisi-o, hit At o amuk welapareg, kidia werehon etno inuk fam, anden holal du bal hisihi-o. Nomini-o, hit elege wilil, iblis dahon etno apmarepfirikip ari famen, anden holal du bal hisihi-o.

¹⁴ Nudaki-o, hit At Ninikni hiniluk ari famen, anden holal du bal hisihi-o. Niknisi-o, hit At almen welapareg kidia werehon etno hiniluk ari famen, anden holal du bal hisihi-o. Nomini-o, hit elege wilil, hinoag weregsoho welahep ari famen, anden holal du bal hisihi-o. Eke hinindimu Allah wene etno wereg-o. Hiren iblis dahon etno apmarepfirikip-o.

¹⁵ Eke yi angge di angge kweanmon nindi-o, ulug hinahla buk fug-o. Yi angge di angge kweanmon nindi-o, ulug ebetuk hisalug, Hinikni Allah hinim hinindi hunduhuk welahep fug-o.

¹⁶ Yi angge di angge kweanmon epmano ninilanggen haruk wilil, ari fam suon welaruhuk ulug buruk nisalug, Ninikni Allah sohorep isalug, ninalem kweanmon-at wereg-o.

¹⁷ Yi angge di angge kweanmon ninindi burukon etno eleg aruhu-o. At Allahen wene duroho suruk amuk eke duroho suruk am fug ulug ebahon etno ilitoho suruk nisalug, niniluk-at welamuhuk-o.

At antikristus ari Kristus inim healeg werehon etno waharuk ulug yig isebahon wene 2:18-29

¹⁸ Nomini-o, yi angge di angge eleg atukon etno fanggog uruk-o. Eke at antikristus, ari Kristus inim healeg werehon etno, waruhu ulug hinesanggo holtuk atikip etno hag, kidia antikristus inebe anggolo atusa-o. Anggolo atusa famen, yi angge di angge eleg amon etno fanggog uruk ulug niniluk atuk-o.

¹⁹ Antikristus inebe anggolo atuson epmano ninim welatukukon oke, eke ninim welahe fug-o. Ninim welatlomen, nit welahe ambeg welatlep-o. Eke it inebe niron elegma, selegma amag ulug wilip atusa-o.

²⁰ Hit halug, Roh Kudus hinobam imbirisimu, yi angge di angge epmano obog hiniluk-o.

²¹ Yi angge di angge obog epmano hinapelegma halug, anden holal du bal hisihi fug. Eke yi angge di angge obog epmano hiniluk halug, anden holal du bal hisihi-o.

²² Ari halug, ap sen enggal-at uruk ano? It, At Yesus Kristus ebe eleg-o, ulug ariroho urukon etnowen-at inenggal uruk-o. Eke At Allah etno, Amloho inim inawene inenggal neken uruk, ulug ariroho urukon halug, ininuk antikristus at-o.

²³ Eke ap misihen, At Allah Amloho ebe eleg hihi-o, urukon halug, Ikni Allah ariroho-at ebe eleg ulug uruk-o. Eke ap misihen Allah Amloho indimu ebetukon halug, Ikni Allah ariroho-at ebetuk-o.

²⁴ Ari halug, bilin yig hisebahon etno-at hinindimu ebeberiuk-o. Ebetuk hisalug, At Yesus Ikni Allah hinim dambuksoho welamuhup-o.

²⁵ Eke mondog hinim hiniluk welamon etno At Yesusen hurumbik arat yig nisebag-o.

²⁶ Eke it aphe ninen hinindi kahaltil waharuk isalug, anden holal du bal hisihi-o.

²⁷ Eke hit hag, Roh Kudusen hinobam imbirisimu, ap misihen yanggul hisa ari hai. At Roh Kudus yanggul hisarukon halug, yi angge di angge demat werehon etno-at yanggul hisaruk-o, Aren enggal neken uruk eleg-o. Eke At Roh Kudus etnowen yanggul hisarukon etno fikfag hinindimu ebetuk hisalug, At Yesus hinim hunduhuk welamuhup-o.

²⁸ At Yesus-at inim welam fano. Eke At fobik waruhumu, ninenggali elegsoho unda yatuk wilil, Ninowe-o, ulug heahi wabuhuk-o.

²⁹ At Kristus ari-at fanoroho suruk-o. Eke niren fanoroho suruk nisalug, Allah udaki-at welahe-o. Ari ihion etno hiniluk at-o.