1 Timotius 4 - Allah Wene Hurumbik Keron

At Paulusen yig isaruk wilil it ap nin inenggal wene yig hisa wamuhup-o ulug yig isebahon wene 4:1-5

¹ At Roh Kudusen duroho ulug bukaloko yig nisaruk-o, eke fobik it ap ninen Allah wene demat urukon etno seberoho umbulug, it setanen inenggal wene urukon etno yanggul isaruk amuhup-o.

² Eke it ap ariroho yanggul isarukon ari inebe inenggal urukon weregma, inindimu alem dahon etno inonggarehen hele homagsaruk-o.

³ Eke it ap ariroho urukon epmanowen aphe nin yig isaruk wilil, “Hwe holao ari hai-o. Eke yi angge di angge na fug-o,” ulug uruk oke, eke yi angge di angge epmano nit naruk amag ulug At Allahen wal hebag-o. Eke Allah wene demat ulug ebetuk wilil, ninindien wa ulug yi angge di angge epmano nao ari fano at-o.

⁴ Eke yi angge di angge fanowon At Allahen wal hebahon epmano niren dahon ulug sohorep isao hai-o. Ninindimuen wa ulug holaruk am fano at-o.

⁵ Eke Allah wene waruk wilil, sembahyang uruk ahe etno fam yi angge di angge uson neken wereg eleg-o.

At Yesus Kristus anggimbu neken wilil yabuk fanoroho suruk amuk-o ulug yig epahon wene 4:6-16

⁶ Eke hat Allah wene eberoko wawon etno inim, eke wene du demat ulug ebetukon etno inim amuk arat yanggul hitusareg fam haren an wene yig hirihion du homini obog yanggul isaruk healug, At Yesus Kristus anggimbu fano mondog welaruhun-o.

⁷ Ariroho wilil, urunanggeroho urukon etno inim, eke dindilabug urukon etno inim sohorep isin-o. Sohorep isalug fano wene etno ilitoho suruk ariog ulug yanggul saruk amin-o.

⁸ Eke inebe inoag wereg amag ulug yanggul sawon etno fano-at oke, eke inindi oag wereg amon ari yanggul saruk halug mondog fano at-o. Ariroho nindien yanggul saruk halug, kidia inim, eke fobik inim niniluk welamon etno holahuk-o,

⁹ ulug it aphe obohen wene ari demat ulug uruk amag ulug yig hisihi-o.

¹⁰ Eke At Allah iluk werehon etnowen it aphe obog inim, eke nit At udaki inim ninili warukon etnowen fanowon etno og nisahu-o, ulug At obam ninindi ebetuk wilil, sat anggolo neken yabuk suruk ahe-o.

¹¹ Yi wene di wene obog-at yig hirihion epmano haren aphe yanggul iseheg, eke inesanggo wareheg suruk amin-o.

¹² Ariroho suruk healug, it apheyen, hat hebe doron atma, bok amin-o, ulug yig hum ari hai-o. Eke haren uruk ahenon etno inim, eke hobabut fanoroho suruk ahenon etno inim, eke aphe hinim hunduhuk welahebon etno inim, eke Allah wene demat ulug ebetuk wilil ilitoho suruk ahenon etno inim, it aphe obohen inilanggen healug, nit ari ilitoho suruk amuk-o ulug inahla bukagsoho suruk amin-o.

¹³ Eke an wamon etno naso wilil, nintul nantul Allah wene etno wane seheg, eke inesanggo wareheg, eke wene etno yanggul iseheg suruk amin-o.

¹⁴ Eke bilin it ap Allah wene yig isarukon epmanowen hat hungguluag ininggik seneg wilil Allah wene yig hitusama, Allah wene yig isawon etno og hitisi ari hapeleg am fug-o.

¹⁵ Eke yi wene di wene yig hirihion epmano hindimu ebetuk wilil, aphe yig isaruk amin-o. Ariroho yig isaruk healug, it apheyen haren balepfulug, wi, ap du indimu iluk mondog wereg-o ulug inahla buhup-o.

¹⁶ Eke hat hag, aphe wene yanggul isaruk wilil, fano-at yanggul isaruk ahi ano, ulug honggarehen hindimu ebet saruk amin-o. Ariroho suruk wilil, hat hili holeheg, eke it hat hune inesanggo holtukon epmano inili weheg suruk aruhun-o.