1 Timotius 2 - Allah Wene Hurumbik Keron

At Paulusen it aphe inake sembahyang uruk amuk-o ulug yig epahon wene 2:1-15

¹ Bilin yig hipminon ari, it yi aphe di aphe obog-at inake At Allah kino yig ereheg eke sembahyang eheg eke Ninikni wa ulug yig ereheg suruk amag ulug yig hituk ahi-o.

² Eke nit fano mondog wilil, Allah wene weheg eke ninobabut fanoroho seheg suruk amuhuken ulug, it ap suon-suon inim, eke it yi aphe di aphe inowesi epmano inim inake sembahyang uruk amuk-o.

³ Ariroho uruk wilil, ninebe fano mondog weregma, At Allah ninili warukon etnowen ari fano at-o, ulug ahien nisarukmu,

⁴ it aphe obohen wene du demat-o, ulug inili holawag ulug yig isaruk-o.

⁵ Eke At Allah etno misig-at wereg-o. Eke At Allah nit aphe ninim dambuk ninaptukon etno ap misig inuk Yesus Kristus etno-at wereg-o.

⁶ Eke At Yesus ari nit yi aphe di aphe obog-at ninonggo warapag-o. Eke At etno bilin warapareg fam, At Allahen aphe obog ninili wiog ulug suruk-o, ulug niniluk atuk-o.

⁷ Eke wene fano wene ari it ap wene inapelehon epmano eberoko wimiek ulug yig isahunen ulug an mondep naharisi-o, ulug an nenggal ihi fug-o, demat yig hirihi-o.

⁸ Eke misig ari, o ahik ya da it ap halug inasine heheg eleg, winimug eheg eleg wilil, ininggik dambuksoho sembahyang uruk amag-o.

⁹ Eke it hweap halug, inasum inesali fanoroho wanteg wilil, iniruk anggoloroho hele homag seheg, eke inesanggomangge, eke inamigmongge emas fam sehon etno inim, eke inasum onggo anggolo baltukon etno inim wanteheg eleg-at welamag-o.

¹⁰ It hweap an Allah wene waruk ahi-o ulug urukonen suruk etno ilitoho inobabut fanoroho wilil suruk amag-o.

¹¹ Eke it hweap ari inune eheg eleg-at inindi seberoho wilil wene yig saruk amag-o.

¹² Eke it hweaben wene aphe nin yig isaruk wilil, it ap inune suon yig isao ari hai-o. It hweap inune fanowon-at uruk amag-o.

¹³ Eke amuk At Allahen aphe inebe wal haruk wilil, bilin Adam wal hebareg, fobik hwe Hawa wal hebag-o.

¹⁴ Eke at iblisen Adam indimu kahalik wapagma, dag sebag fug-o. At hwe etno hag iblisen indimu kahalik wapagma, At Allahen yig isebahon, etno inapeleg atlug dag sebag-o.

¹⁵ Ari halug, it hweap epmano inindi seberoho wilil, Allah wene eberoko weheg, eke aphe inim inindi hunduhuk welaheg, eke fanoroho seheg suruk wilil, inudaki endag inaptukmu, fobik inili wahu-o.