1 Timotius 1 - Allah Wene Hurumbik Keron

1:1-2

¹ Nomin Timotius wai. An Paulusen hat namloho ninim Allah wene waruk aheon etno holal du bal hituk ahi-o. Eke At Allah ninili warukon etno inim, eke At Kristus Yesus fobik fano ninabuhuon etno inimen At Kristus Yesus awene yig isil nuruk amag ulug minduhup naharusa etno ilitoho,

² At Ninikni Allah inim, eke At Ninowe Yesus inimen inahien hobam embeheg, eke habua heyeheg suruk wilil, hinim welamag ulug yig hirihi-o.

It ap epma inenggal wene yig isarukim yaharoho welamin-o ulug yig epahon wene 1:3-11

³ Nomin-o, an bilin o Makedonia liog ulug yig hitikik etno ilitoho, kidia o Efesus welamag ulug yig hituk ahi-o. Eke o epma it aphe ninen inenggal wene yig isaruk halug, haren winimug isaruk amuk-o.

⁴ Eke iren dindilabug eheg, eke ninetamu inuk ulug yi angge di angge inuk yig iseheg suruk wilil, wene anggolo uruk isalug, At Allahen hurumbik yig nisebahon etno ilitoho suruk eleg-o.

⁵ Eke At Allahen hurumbik yig nisebahon etno ninindimuen demat ulug ebetuk wilil, ninindi ninobabut fanoroho welamon etno inim, eke aphe ninindi hunduhuk welamon etno inim og nisawag ulug At Allahen hurumbik etno yig nisebag-o.

⁶ Ariroho yig nisebahon oke, eke it ap ninen sohorep isalug, yi wene di wene ebe eleg atukon etno uruk wilil,

⁷ “Nit At Allahen komo yig nisebahon etno yig isarukon nit-at welahe-o,” ulug uruk-o. Ariroho niniluk welahe, ulug urukon oke, wene ebe undamon inapeleg heheg uruk-o.

⁸ Eke nit hag, wene duroho suruk amuk eke duroho suruk am fug ulug ebahon etno ilitoho suruk nisalug, wene ebe fanowon at-o, ulug uruk ahe-o.

⁹ Eke wene duroho suruk amuk eke duroho suruk am fug ulug ebahon etno it aphe fano surukon epmanowen fano suruk amag ulug yig isebag fug-o. Ari it dag surukon inim, eke it dahan fahan surukon inim, eke iniknisi inisasi war inaptukon etno inim, eke it ap watukon etno inim,

¹⁰ eke it wanggik surukon etno inim, eke it aphe herag inaptukon etno inim, eke it inenggal urukon etno inim, eke it wene fano wene seberoho umburukon etno inim, it obog dag surukon sohorep isalug fano mondog suruk amag ulug wene duroho suruk amuk eke duroho suruk am fug ulug ebahon etno yig isaruk-o.

¹¹ Eke wene fano wene ari, aphe yig isawag ulug At Allah ahien ninobam umburukon etnowen minduhup naharisi-o.

At Paulusen Allahen nindi werehep naharisi wa ulug ebahon wene 1:12-20

¹² Eke anden yabuk suruk amag ulug At Ninowe Kristus Yesus etnowen oag werehon etno og nitisimu, wa ulug yig ituk ahi-o.

¹³ Eke anden At Yesus nune dahon yig ereheg, eke At udaki muko wilip iseheg suruk atikikon epmano At Yesusen hindi wereg atuk halug, an nanggimbu welaruhun-o, ulug sohorep naharisi fug-o. Eke an bilin Allah wene napelegma dag suruk nealug, At Allahen nabua nearisi-o.

¹⁴ Nabua nearuk atisireg, At Ninowe etnowen nit At Kristus Yesus ninim welaheon epmano Aren angge anggolo og nisarisireg, Allah wene demat ulug ebetukon etno inim, eke aphe ninindi hunduhuk welaheon etno inim og nisaruk-o.

¹⁵ Eke it aphe obohen eberoko wawag ulug, wene du demat yig hituk ahi-o, At Kristus Yesus etno it aphe dag surukon epmano fano inabiog ulug o kweanma duma wapag-o.

¹⁶ Eke an bilin dag mondog suruk atikikon epmano At Kristus Yesusen fano naptisi etno it aphe ninen inilanggen nealug, wi, at Paulus dag suruk atision etno oke, At Allahen abua harisi-o, ulug inahla bulug, At Yesus obam ebetuk wilil, iniluk welamon etno holawag ulug fano naptisi-o.

¹⁷ Fano naptisireg fam, At Ninikni Allah suon itog mondog werehon, aphe inilanggen haruk elehon etno inuk-at suontepfuruk amuk-o, ulug an demat yig hirihi-o.

¹⁸ Eke hat hag, namloho Timotius wai. Bilin it ap nabien Allah ahurumbik yig isebahon etno ilitoho kidia yig hituk ahi-o. Eke iren demat ulug ebahon etno hindimuen eberoko waruk wilil, ap inim aptuk etno ilitoho iblis hinim wim fanoroho aptuk amag ulug yig hirihi-o.

¹⁹ Ari halug, hat hobabut fanoroho suruk amin-o. Eke it ap ninen inobabut surukon etno yaha fanoroho wereg eleg isalug, iren demat ulug eberoko warukon etno inapeleg atisi-o.

²⁰ It inapeleg atision ari ininuk misig Himeneus eke misig Aleksander etano inapeleg atusareg fam, fobik inenggal wene At Allah obam denggeltukon etno sohorep isawon iniluk amagsoho arat at iblis etno inobam umbukag ulug yig itikik-o.