1 Petrus 4 - Allah Wene Hurumbik Keron

At Allah udaki wilil hinebe keron-at welahep-o ulug yig isebahon wene 4:1-6

¹ At Kristus etno alem elegma ebe yuhun-at yikangge wapag halug, hit ari sebahon hinahla buruk wilil, hinindi oag wereg amag ulug ebetuk amiek-o. Alem elegma inebe yikangge war inaptuk ari fam dag surukon alem etno eleg atisi-o.

² Eke ari halug, kidia o kweanma duma wilil, At Allahen komo yig nisebahon etno-at mutlug laruk amuhupseg, kweanmen dag surukon epmano obog seberep isahup-o.

³ Eke it Allah wene waruk elehonen dag suruk etno ilitoho hit o amuk anggolo suruk atikip. Ariroho suruk wilil, hit yi dag di dag seheg, ambusu nenek surukon etno nenggeg, wanggik seheg, kwanangge etno amurli hundereheg suruk atikip-o. Ariroho suruk atikibon oke, eke kidia dag suk ninambit atisi-o, ulug uruk ahep-o.

⁴ It Allah wene waruk elehon epmanowen ari keroho suruk ahep-o, ulug yig hisaruk wilil, hinobam denggeltuk-o.

⁵ Hinobam denggeltuk ari, fobik At Allahen it inilukon inim, warehon inim inaren baloko imbisahu etno iniluk heheg, fobik At Allah niren suruk aheon epmano keroho yig imuhuk-o? ulug inakolen suruk-o.

⁶ Ari fam wene fano wene etno it warehon inim-at yig isarisi-o. Yig isarision etno inebe arat oag deloko imbisebag halug, fobik inahut At Allah inim wilil, ilitoho welamag ulug yig isarisi-o.

At Allahen yabuk og nisarision epmano ilitoho suruk amuk-o ulug yig isebahon wene 4:7-11

⁷ Nin eke wene misig du yig hisamin-o. Yi angge di angge ketoho imbisawon epmano horog fanggog uhu halug, sembahyang mondog uruk wilil welamuhuken ulug, hinobabut surukon epmano fanoroho yaha welamuk-o.

⁸ Eke misig du alem suon neken yig hisaruk ahi-o. Ari hit hinomini hinim fikfag hinindi hunduhuk welamuk-o. Hinomini hinim hunduhuk wilil, iren dahan fahan suruk isalug, seberoho imbisahup-o.

⁹ Eke it hinomini hinambeg waharuk isalug, ninim orom nalug nohulen-o ulug hinindi hinahientoho wilil hinim welamuk-o.

¹⁰ Eke hit obog Allahen yi angge di angge surukon og hisebag halug, etno At Allahen-at og nitisi-o ulug, Allah yabuk fikfag suruk amiek-o.

¹¹ Ari Allah wene yig isawon etno og hisarisi etno fam, Allah wene yig isaruk amuhup-o. Eke yalmag isawon etno og hisarisi etno fam, yalmag isaruk amuhup-o. At Allahen nineyabuk ninakeleg sik og nisebag etno fam, ariroho-at suruk amuhuk-o. Ariroho suruk amuhukmu, At Yesus Kristus inuk fam Allah-at nintul nantul suontepfuruk amuhuk-o. At Yesus Kristus suon oag weregsoho itog mondog werehon etno-at inuk suontepfuhuk-o. Demat yig hisihi-o.

At Kristus welapag etno ilitoho welamuk ulug yig isebahon wene 4:12-19

¹² Nomini-o, iren dahon hinobam umburuk wilil, hinindi kahaltuk isalug, “Ari keroho-o?” ulug uk fug-o.

¹³ At Kristus welapag etno ilitoho atikipseg, hinahientoho wilil, fobik At ninim ilitoho suon amuhuk-o, ulug hinindi ebetuk amiek-o.

¹⁴ Iren dahon hinobam umburuk ari, hit Kristus omini wereg hisalug ariroho suruk-o. Iren ariroho surukmu, eke hiren, At Roh Kudus suon etno nit ninobam belabik waharisi-o, ulug hinahientoho wilil hinindi ebetuk amiek-o.

¹⁵ Hiren ap wareheg, hinalomnangge herahakeg, eke dag seheg, aphe ineyabuk dahapseheg neken surukmu dahon etno hinobam embelepmen, yuhun-at welatlep-o.

¹⁶ Yuhun-at welatlebon oke, eke Kristus inuk warikipseg fam dahon etno hinobam umburuk isalug, hinenggali haruk am fug-o. Hit At Kristus inuk warukukseg welahe-o, ulug At Allah wa yig ituk wilil, sembahyang uruk amiek-o.

¹⁷ Eke horog kidia aphe oag deloko imbisahu halug, it Allah udaki epmano hag bilin-at inaren baluhu-o. Eke nit bilin-at ninaren baluhureg, it Allah wene fano wene waruk elehon epmano fobik keroho inaren baloko imbisahu-o?

¹⁸ Eke hit hag Alkitab fam wene holal embebahon du hiniluk-o, it fano surukon etno hag, inili werlek-at wahu-o. Eke it dag suruk wilil, Allah inuk inapalehon epmano hag inili wahu fug-o, ulug wene holal embebahon etno hiniluk wilil,

¹⁹ dahon etno hinobam umburuk isalug, hinindi seneni ebebuk fug-o. At Allah ahla burukon etno ilitoho suruk-o, ulug hinindi ebetuk wilil, fano surukon etno-at suruk ahe-o, ulug hinahla bugsoho welamiek-o. Ariroho wilil, At ninebe wal hebahon etnowen abug fanowon yig nisarision etno suhu-o, ulug hinindi ebetuk amiek-o.