1 Petrus 2 - Allah Wene Hurumbik Keron

At Yesus o wut oag neken embebag ulug yig isebahon wene 2:1-10

¹ Eke ari halug, it apheyen yi dag di dag surukon epmano seberoho sohorep isiek-o. Eke hinenggal urukon inim, nambit hambit urukon etno inim, aphe inobam denggeltukon epmano inim obog-at sohorep isiek-o.

² Eke udag doronen isina ag naruk hag, hit At Roh Kudusen yanggul hisarukon wene etno mondog holaruk weregma etno fam hinindi werehep hisahalug hinili wahu-o.

³ Eke wene duroho ebahon etno hiniluk-o, “At Allah yonggon hinaptukon etnowen ahmu hisarukmu harikip-o,” ulug holal umburukmu ebahon etno hit hiniluk-o.

⁴ Hit At Yesus ambeg-at laruk amiek-o. It apheyen At ebe ninambit-o, ulug weregma, At Allahen o wut oag suon neken imbirisi-o.

⁵ At etno o wut oag neken weregma, hit o hobat neken hinombisaharisi-o. Ari halug, At Yesus Kristus inuk fam Allah yabuk fanowon etno hinahiroho suruk amiek-o.

⁶ Eke wene ilitoho neken Alkitab fam holal embebahon du hiniluk-o, “An Allahen o wut oag suon heako imbirikikseg, nudaki hinibam epmano faltuk ahi-o. At o wut oag suon neken werehon etno obam ebetuk hisalug, hinenggalirep hisahakuk fug-o,” ulug ebag etno hag,

⁷ hit Allah wene waruk ahebon epmanowen, “O wut oag du fanowon-at hehe-o,” ulug uruk ahebon oke, eke wene holal misig du wereg-o, “It o faltukon epmanowen o wut oag du sohorep isul uruson oke, eke Anden o wut oag ulug minduhupfirikik-o,” ulug ariroho ebag.

⁸ Eke ariroho ebahon etno wereg heheg, eke misig du wereg-o, “It o wut oag ari ninambit ulug uruson etno fam, bule ambulug watahup-o,” ulug holal embebahon etno hiniluk-o. Eke it aphe At Yesus o wut oag neken werehon etno obam ebetuk eleg isalug, At Allahen ebahon etno ilitoho bule amburusareg, watarusa-o.

⁹ It epmano wataruson oke, eke hit hag fuloko hinombisarision epmano, At Allah udaki-at welahep-o. Ap misig inuk fam hinungguluag soal hinaptisi fug-o. Hit Allah udaki epmano o hikmu epmanowen wol hisarisimu, o selegma wilil, At Allahen elalintoho sirision etno yig isil lawag ulug wol hisarisi-o.

¹⁰ Hit amuk Allah udaki neken welatikip fuhon oke, kidia At Allah ninabua nisaruk ulug hinindi ebetuk ahep-o.

At Allah anggimbu welamuk ulug yig isebahon wene 2:11-17

¹¹ Nomini-o, hit o kweanma huso neken welahep ulug yig hisihi-o. Kweanmen surukon epmano hinindimu kuk nowen ulug yaharoho welamiek-o.

¹² Eke it aphe Allah wene waruk elehonen yig hisaruk wilil, hit Allah udaki dag suruk hisehe-o, ulug hinobam denggeluog ulug inahla buruk wilil, iren urukon epmano eleg amag ulug, fanoroho suruk ahebon epmano inilanggen hawag-o. Ariroho hisaruk amuhupseg, iren fobik At Ninowe waruhumu, inuk suontepfuhup-o.

¹³ Ari halug, At Ninowe inuk fam it ap suon werehon epmano inapma welamiek-o.

¹⁴ Eke at inowe suon inim, eke aren it ap iniknisi suon minduhup isebahon epmano inimen dag surukon hondorep iseheg, fano surukon lehep iseheg suruk isalug, inapma welamiek-o.

¹⁵ Eke it aphe yuhun-at inenggal urukon epmano inune eleg amag ulug At Allahen, fanoroho suruk amiek-o, ulug yig hisaruk wereg-o.

¹⁶ Eke hit Allah anggimbu wilil, ap inindi werehonen fanoroho suruk etno hag suruk amiek-o.

¹⁷ Eke it hinomini hinim, yi aphe di aphe obog-at hinim hinindi hunduhuk welamiek-o. At Allah anggimbu wilil, at hinowe apma welamiek-o.

At Kristus ninake warapahon wene 2:18-25

¹⁸ Hit aphe ineyabuk suruk wilil, inanggimbu welahebon ari, hiniknisi inune holtuk wilil, nikni-o, ulug hinahien haruk amiek-o. It hiniknisi ari it nin inobabut fanowon, it nin inobabut dahon wereg oke, obog-at inune holtuk amuhup-o.

¹⁹ Inune holtuk amuhup ari fam Allah ahien hinobam umburuk aruhu-o. Eke it hiniknisien inune dahon hinobam umburuk isalug, hiren, At Allah il fam welahi-o, ulug hinune winimug yig iseheg eleg-at welamiek-o.

²⁰ Eke ap misig dag suruk halug, yikangge watuk-o. Eke hit fano suruk ahebon yikangge war hinaptuk isalug, At Allah ahien hinobam umbuhu-o.

²¹ Ari fam At Allahen wol hinaptisi-o. Eke At Kristus hit hinake yikangge wapahon etno hinilanggen haruk amiek. Eke At ebe ilitoho suruk amiek-o.

²² At Kristus etno mondog dag seheg eleg wilil, enggal wene uruk apag fug-o. Eke inune dahon obam yig epahon oke Aren une dahon it inobam yig isebag fug-o.

²³ Eke iren dahon obam embebahon oke, Aren dahon hinobam umbuhuk ulug ebag fug-o. Nikni Allahen oag deloko onggo dagma imbisahu-o, ulug ahla bebag.

²⁴ Eke At Kristus niren dag suruk atukukon epmano omalo fam walug e fam lenggaloko embebag etno niren dahon sohorep isalug fanowon-at suruk amag ulug embebag-o. Eke it epmanowen At ebe ele suon wapag etno fam, hinebe fano atikip-o.

²⁵ Eke hit bilin wam domba kwalem dahon larukon etno ilitoho welatikip oke, kidia kwalem fanowon etno luog ulug at hinaso wilil hinili warukon etno mutlug laruk ahep-o.