1 Petrus 1 - Allah Wene Hurumbik Keron

1:1-2

¹ An Yesus Kristus omini mondep isebahon misig Petrus etnowen wene holal du bal hisihi-o. Hit Allah udaki o Pontus, Galatia, Kapadokia, Asia-Kecil, Bitinia inim huso neken welahebon epmano wene holal du bal hisihi-o.

² At Allahen indi bulug fuloko hinombisaharisi etno, At Allah Roh Kudusen hinindi fano hinabukag ulug, At Yesus Kristus une holtuk hisalug, At amep fam ho hinaptisi-o. Eke kidia At Allahen ahien hinobam umburuk amag ulug sembahyang uruk ahi-o.

At Allahen fanowon etno og nisahu ulug hinindi ebetuk amuk ulug yig isebahon wene 1:3-12

³ Nomini-o, At Allah Ninowe Yesus Kristus Ikni etno wa ulug sembahyang yig ituk amuk-o. Aren nit ninabua hebareg, At Yesus Kristus iluksoho minduhupfebag etno fam, nit ninebe ketoho ninombisaharuk wereg-o.

⁴ Nit ninebe ketoho ninombisahiog ulug weregma, fobik fanowon etno At udaki og nisahu ulug ninindi ebetuk ahe-o. Og nisahuon etno dag atlug, eleg am nowen ulug, o boholma dugsoho umburuk-o.

⁵ Eke hit Allah wene warukmu, hinindi oag weregsoho wahubon etno fobik At udaki fanoma imbisiog ulug weregma, fanowon og hisawon epmano dugsoho hinombisaharuk-o.

⁶ Og hisawon epmano weregma, kidia-at hinahien haruk amiek-o. Eke kidia it ninen yi dag di dag hinobam umburukmu ioba yatuk neken welahep oke,

⁷ ari fam hit Allah wene etno hinoag weregsoho waruk amuhup-o. Eke emas etno hondoken olohore hulu atuk etno hag, hit Allah wene etno fanoroho waruk wilil, hinoag weregsoho welamuhuben ulug kidia aren hinaren baltuk wereg-o. Hinaren baltukmu, fobik At Yesus Kristus waruhu etno fam, hinim ilitoho amuhupseg, fanowon etno huluog ulug welahep-o.

⁸ Eke At Yesus Kristus etno hinilanggen harikip fug oke, hinindimu hinim hunduhuk welahep-o. Eke At etno hinilanggen haruk ahep fug oke, At obam ebetuk ahep-o. Ariroho welahep ari, hinindi hinahien suon haruk wilil,

⁹ fanoroho hinombisahukon etno hinindi ebetuk ahep halug, etno-at waruk ahep-o.

¹⁰ Eke hinindi fanoroho hinombisahukon etno amuk it nabi aben inindimu ebetuk apareg, At Allahen og hisahu ulug hurumbik ebag.

¹¹ Hurumbik etno uruk wilil, “O maram waruhureg, og hisahu-o,” ulug inahla burukmu, At Kristus Roh Kudus etnowen yig isebag, “Fobik At Kristus wabuhup oke, iluksoho suon-at minduhupfuhu-o”, ulug hurumbik yig isebag.

¹² Hurumbik At Allahen yanggul isebahon etno it nabi aben, “Nit-at og nisahu,” ulug uruk apag fug oke, eke hit hag fano wene etno hinesanggo holtuk amuhupmu og hisahu, ulug hurumbik yig hisebag. Hurumbik yig hisaruk apagma, fobik it wene fano wene yig isil nuruk amag ulug mondep isebahon epmano hinambeg watlug, it At Allah Roh Kudus boholmen inambeg ambik waharisireg yig isarukmu, fano wene etno yig hisarusa-o. Yig hisaruson etno it malaikat nit ninesanggo holto burukon oke, hit-at yig hisarusa-o.

Hit fanoroho welamuk ulug yig isebahon wene 1:13-25

¹³ Ari halug, hit hinindi yaharoho wilil, fobik At Yesus Kristus waruhureg, fanowon etno og nisahu, ulug hinindi ebetuk amiek-o.

¹⁴ Eke Allah wene-at holtuk wilil, amuk hinapelegma yi angge di angge suruk atikibon epmano seberoho sohorep isalug, fanoroho welamiek-o.

¹⁵ Eke At Allah wol hisarision etno akeleg neken fanowon-at wereg etno ilitoho, hit ariroho-at hinakeleg neken fanoroho welamiek-o.

¹⁶ Eke wene ari Alkitab fam holal du weregma, “An nakeleg fanoroho welahi etno hag, hit ariroho-at fanoroho welamuk,” ulug holal etno hiniluk-o.

¹⁷ Eke hit At Allah obam sembahyang uruk wilil, Ninikni-o ulug yig ituk ahep-o. Ariroho yig ituk ahep ari, At Allahen aphe obog ninaren baltuk weregma, At apma wilil o kweanmen hiniluk wilil dia, At Ninikni une-at holtuk amuk-o, ulug hinindi ebetuk amiek-o.

¹⁸ Eke it hiniknisien dag surukon epmano yig hisarukmu suruk atikibon etno hinapelegsoho hinombisahukag ulug onggo embebag etno hit hiniluk-o. Eke onggo etno emas, perak fobik eleg atukon epmano ilitoho embebag fug-o.

¹⁹ At Kristus obabut mondog fanowon amep onggo ulug embebag etno hit hiniluk-o. Eke At Allahen o kweanma awan wal haruk wilil,

²⁰ At Kristus etno hit hinake-at oag deloko umburuk apareg, fobik kweanma belabik wapag.

²¹ Belabik wapareg, fobik o aphe warehon wereg ambehen iluksoho ebe suon-at minduhupfebag-o. Hit At minduhupfebahon etno obam ebetuk wilil, At Allahen fobik fanoroho seko ninombisahuku, ulug hinindi ebetuk amuk-o.

²² Eke hit demat urukon wene etno waruk atikipseg, hinindi ho sarikibon epmanowen it hinomini Allah wene warukon epmano hinim hinindi hunduhuk welahep ari hinindimu mondog-at hunduhuk welamiek-o.

²³ Allah wene iniluk inaptukon etno warikip halug, hinebe keron neken endag atikipseg fam, At Ninikni Allah iluk mondog werehon etnowen endag hinaptisi-o.

²⁴ Ari wene etno Alkitab du fam weregma hiniluk-o, “Yi aphe di aphe obog isingga neken wereg-o; eke it yi aphe di aphe epmano e anggen olohore fanowon neken wereg-o. Ariroho wereg oke, isingga etno bug atlug, e anggen olohore dag atuk atlug loloko kweanma amburuk-o.

²⁵ Amburuk oke, eke At Ninikni Allah wene etno hag iluk mondog welaruhu-o,” ulug wene holal embebahon etno weregma, wene fano wene ulug yig hisarusa-o.