1 Korintus 9 - Allah Wene Hurumbik Keron

Nit ninebe wene yig isil nuruk amag ulug mondep nisahabahon epmano duroho welahe-o ulug yig isebahon wene 9:1-27

¹ Eke an nebe yuhun-at sil nurukon buruk ahep ano? Eke At Ninowe etnowen wene yig isil nuruk amag ulug mondep nahabag fug buruk ahep ano? Eke an At Ninowe Yesus etno ilanggen kiroho harisi fug buruk ahep ano? An neyabuk At Ninowe inuk etno fam sirikikon etno hit o epma welahep fug ano?

² Eke it ap werlekon ninen, at Paulus wene yig isil nuruk amag ulug mondepfebag fug, ulug inahla belebon oke, hit hag wene yig hisa wamag ulug mondep naharisi-o. Eke hit hag wene yig hisil wamag ulug mondep nahabahon demat bukag ulug, hit wene etno eberoko warikipseg, At Ninowe hinim hinindi hunduhuk welahep-o.

³ Eke it aphe an nunema warukon epmano nune onggo dahagsoho yig isawon du at-o,

⁴ an naharom inim, nahik inim an nakelehen naruk am hai buruk ahep ano?

⁵ Eke it nin wene yig isil nuruk amag ulug mondep isebahon epmano inim, eke At Ninowe osi epmano inim, eke at Kefas etno inimen inuhwesi Allah wene warukon holalug sil nuruk epmano ilitoho anden ariroho holalug sil laruk am hai buruk ahep ano?

⁶ Eke an, at Barnabas ninim nineyabuk nininggik fam suog ulug ninakeleg-at wereg buruk ahep?

⁷ Eke ap sehen senehon misig wim surukon etno onggarehen onggo ombatalug yabuk sik laruk ano? Eke ap misig eyabukmu i angge yahapatalug anggen yihikon epmano nenggeg eleg-at wereg buruk ahep ano? Eke ap misig it wam domba epmano inaso werehon etnowen inag ambusu bereloko nenggeg eleg-at wereg buruk ahep ano? Ari eleg-o.

⁸ Eke an nune ihi ari, it apheyen surukon epmano ilitoho yig hisihi-o. Eke Allah wene duroho suruk amuk eke duroho suruk am fug ulug ebahon etnowen ariroho-at ilitoho neken yig nisaruk-o.

⁹ Eke wene at Musaen yangguloko holal balfahon etno fam yig nisaruk wilil, “Wam sapi iog fam wiyagfut loltil nurukmu ambilik hele wabuk fug-o,” ulug wene holal embebahon du At Allahen wam sapi inabua hebareg ebag buruk ahep ano,

¹⁰ eke nit farim ariroho ebag buruk ahep ano? Eleg-o. Ariroho ebag ari nit farim-at ebag-o. At ap kwean yultukon etno inim, eke at anggen loltukon etno inimen ineyabuk inakeleg sik-at suruk wilil, fobik anggen balehon epmano sumburoko og nisawag ulug yabuk suruk-o.

¹¹ Eke niren i angge boholmon etno yahap hisarukukon etno fam, hiren angge kweanmon bal salug, onggo og nisao ari hai behep ano?

¹² Eke it ap werlekonen, hinaharek menag nisimiek-o ulug yig hisaruk isalug, eke nit epmanowen, hinaharek menag nisimiek ulug yig hisao hai buruk ahep ano? Eke niren, hinaharek menag nisimiek, ulug yig hisolowon oke, yig hiseheg eleg-at welatukuk-o. At Kristus awene fanowon etno olohotma sok larehe ha nowen ulug nit yi angge di angge obok heheg oke, kino uk sohorep isarukuk-o.

¹³ Eke it ap At Allah ibam yabuk surukon epmano Allah ake umburukon epma naruk wereg-o; eke it Allah ake umburuk ambeg imbik larukon epmano At Allah ake nin minggiroko naruk etno hit hiniluk-o.

¹⁴ Eke ari ilitoho At Ninowe etnowen, it ap wene fano wene yig isil nurukon epmano yi angge di angge og isimuk, ulug inesanggo wapag-o.

¹⁵ Eke ari halug, hinaharek og nimiek-o, ulug yig hiseleon oke, yig hiseheg eleg-at welatikik-o. Eke hit og nimuhuben ulug wene holal du bal hisarikik fug-o. Eke alem ari fam ap misihen an yuhun-at suontep nahalepmen, an waram fano bele-o.

¹⁶ Eke an wene fano wene du yig isaruk ahi etno fam, an nebe suontepatao ari hai buruk ahi-o. Ari At Allahen ariroho suruk amuk ulug yig nitisimu, yig isil laruk ahi-o. Eke anden wene fano wene etno yig iseheg eleg-at welatlemen, dahon epmano nobam ombatele-o.

¹⁷ Eke anden neyabuk du hulik ulug nahla belerehen, onggo og nemag ulug suruk atleon oke, At Allahen sumbut isawon epmano nobam embebareg fam suruk ahi-o.

¹⁸ Eke ari halug, an neyabuk onggo etno nongge og num-o? An neyabuk onggo du at-o, an wene fano wene yig isaruk wilil, wene ari onggo umbukag ulug yig iseheg eleg, eke an wene fano wene yig isaruk ahion etno fam yi angge di angge og nimiek ulug kino yig iseheg eleg bok welahi ari, an neyabuk onggo ari at-o.

¹⁹ An aphe inahele etno loleg welatikikon oke, eke fobik aphe obog wonggal inabuhuken ulug nebe it inanggimbu neken seberepatarikik-o.

²⁰ Eke it Yahudi ap an nilahut war inabuhuken ulug, an nebe Yahudi ap neken welatikik-o. Eke it Yahudi aben wene duroho suruk amuk eke duroho suruk am fug ulug ebahon sebereg wilil ilitoho surukon etno an nilahut war inabuhuken ulug an nebe wene du apma welahi fuhon oke, it ap wene du apma werehon epmano ninim apma neken atukuk-o.

²¹ Eke it Yahudi aben wene duroho suruk amuk eke duroho suruk am fug ulug ebahon etno inapeleg werehon epmano an nilahut war inabuhuken ulug, an At Allahen wene duroho suruk amuk eke duroho suruk am fug ulug ebahon etno nesanggo holtuk wilil, At Kristus awene etno apma welahion oke, it wene inapelehon epmano ninim wilil, an nebe wene napeleg neken atisi-o.

²² Eke it ap inindi oag elehon epmano an nilahut war inabuhuken ulug, an nebe it ninim nindi oag eleg neken atikik-o. Eke an yi seheg di seheg suruk wilil, ap nin inili og inabukag ulug an nebe it ninim wilil, it wereg epmano ilitoho welatikik-o.

²³ Wene fano wene du ninim eberoko wahuken ulug, yi angge di angge ariroho-at suruk ahi-o.

²⁴ Eke o buahen laruk ambeg epma it kwalema buahen larukon epmano obog-at buahen larukon oke, ap misig akeleg-at onggo holaruk ari hit hinapeleg ano? Eke ari halug, hit onggo fanowon epmano holahuken ulug buahen laruk amiek-o.

²⁵ Eke it obog inambik homagmag aptukon ari inoag wereg amag ulug fikfag suruk wilil, inunggulasum filik atukon epmano huluog ulug suruk oke, eke nit hag filik atuk elehon epmano huluog ulug suruk ahe-o.

²⁶ Eke ari halug, an buahen laruk wilil, werlekma yuhun-at laruk ahi fug-o. Eke inambik aptuk wilil, ininggik werlek-at mumet isaruk eleg ari hag, an yuhun-at suruk ahi fug-o.

²⁷ Eke anden it ap nin wene yig isarikikon epmano onggo fanowon epmano og num sohorep nahuk nowen ulug an nebe seberepataruk wilil, at etno anggimburepatiog ulug suruk ahi-o.