1 Korintus 8 - Allah Wene Hurumbik Keron

Wam usa surukon epmano nao ano eleg ano ulug yig isebahon wene 8:1-13

¹ Eke kidia wam usa surukon nawon etno farim alem yig hisamin-o. Wam inu fam kwanangge usa surukon epmano nit obog-at alem niniluk atisi-o. Eke alem surukon etno-at niniluk welamon etno fam niren suontepataruk aheon oke, ninindi it aphe ninim hunduhuk welamon epmano fam aphe inindi werehep isaruk ahe-o.

² Eke ap misihen, an nakeleg-at niluk-o, ulug ahla buruk halug, ebe iluk amon etno hag weheg eleg-at wilil, apeleg-at wereg-o.

³ Eke at ap misig indi Allah inim hunduhuk wereg halug, At Allahen ap etno iluk wereg-o.

⁴ Eke alem misig, wam inu fam kwanangge usa suruk wilil narukon epmano, monggat ebe kweanma duma misig wereg eleg-o. At Allah akeleg-at suon wereg ulug niniluk welahe-o.

⁵ Eke it ninen boholma, kweanma du suon ulug uruk iseheg, it inebe suon ininuk anggolo-at uruk oke, nit hag Ninikni Allah suon misig-at wereg-o; eke yi angge di angge obog aren-at wal hebareg fam, nit ninebe epmano at anggimbu wilil eyabuk surukon-at welahe-o, ulug ninahla buruk ahe-o.

⁶ Eke Ninowe inuk suon At Yesus Kristus misig-at wereg-o. Eke yi angge di angge epmano obog alem At Yesus-at wereg-o; nit ninebe alem etno At Yesus-at wereg-o, ulug ninahla buruk ahe-o.

⁷ Eke nit hag ariroho ninahla buruk aheon oke, it aphe obog-at alem ari iniluk wereg eleg-o. Eke it nin o amuken inamonggat inobam ebetuk wilil, nintul nantul usa suruk atusareg fam, wam uson ulug naruk wilil, usa ano inahla buruk-o. Eke it inebe ariroho inindi oag eleg neken wilil, inobam sabele neken denggelsaruk-o.

⁸ Eke nit naruk aheon epmano fam Allah ninim dambultuk ahe fug-o. Eke yi angge di angge nao sohorep isahuk epmano fam ninaharek eleg aruhu fug-o. Eke nahuk etno fam ninaharek anggolo aruhu fug-o.

⁹ Eke hiren yuhun-at suruk ahebon etno it aphe inindi oag elehon epmanowen inilanggen hisalug, ari fam it dag suk nowen ulug hinilanggen yaharoho welamiek-o.

¹⁰ Eke hat alem hiluk atisireg fam, o monggat ifaleg ambeg epma horieg weregma, ap misihen ilanggen hearuk wilil, ap duen uson naruk ano? ulug ahla bulug, indi oag eleg etno fam wam uson epmano nao fano at-o, ulug ahla biog ulug indi eberuhu fug buruk ahen ano?

¹¹ Eke hat alem hiluk atisireg fam, at homin indi oag elehon etno Kristus at ake warapahon oke, haren indi oag elehap suruk ahen-o.

¹² Eke it hinomini inindi oag elehap sirikinon epmanowen usa ano ulug inahla buruk iseheg, haren inindi oag elehon etno inindi kahaltuk ahen ari haren At Kristus ebe inim-at dahap suruk ahen-o.

¹³ Ari halug, an naruk ahi etno fam at nomin etno indi oag elehap sihi ha nowen ulug an wam inu etno mondog naruk aruhuk fug-o.