1 Korintus 7 - Allah Wene Hurumbik KeronIt ahun uhwe inawene du at-o ulug yig isebahon wene 7:1-16 1 Eke hiren wene holal baloko og nitikibon etno onggo kidia yig hisik-o. 2 Eke ap misihen hwe holaruk eleg halug, ari fano-at oke, eke it aben it hweap yuhun-at wanggik suk nowen ulug it ap inakeleg sik inuhwesi holeheg, eke it hweap inakeleg sik inahuni holeheg suruk amag-o. 3 Eke it aben inuhwesi halug yalmag inaptuk amag-o. Eke it hweaben ariroho-at inahuni yalmag inaptuk amag-o. 4 Eke hweap inebe ari inonggareg unde eleg-o, it inahuni unde wereg-o. Eke it ap halug inebe inonggareg it unde eleg-o, it inuhwesi etno-at unde wereg-o. 5 Eke hit hinebe hinim nohuog ulug nambit hambit uruk am fug-o. Eke hit hinindi misig-at wilil, sembahyang ninakeleg siken uruk amuhuken, ulug o misihim hinebe hinakeleg sik welam fano-at oke, eke hinindi oag eleg neken wereg hisalug, at setan etnowen hinindi kahaluk nowen ulug fobik hinim dambuksoho welamuk-o. 6 Eke anden yig hisaruk ahion du an nune famen, ariroho siuk, ulug yig hisaruk ahi fug-o. We fano-at ulug an nindi famen-at yig hisaruk ahi. 7 Eke it ap obog an ilitoho welatlep fano ulug buruk ahion oke, At Allah indi hunduhuken ninakeleg sik og nisarukmu, at misihen yiroho seheg, at misihen diroho seheg suruk amag ulug og nisaruk-o. 8 Eke hit udag elege inim, hweap suhweon inim, an welahi ilitoho welam ari fano-o, ulug yig hisaruk ahion oke, 9 eke hinobam ahahe laharukon elehapsuk hai atuk halug, hit udag elege epmano hinuhwesi holeheg, eke hit hweap suhweon epmano hinahuni holeheg suruk amuk-o. Eke aben hwe holaruk ari fano-at oke, eke hinindi ahahe laharuk wilil dag suk ari hai-o. 10 Eke hit hinuhwesi holarikibon epmano an nune fam yanggul hisaruk ahi ari, an nune fam eleg-o. At Ninowe etnowen yig nitukmu du yanggul hisaruk ahi-o. Ariroho yanggul hisaruk wilil, at hwe etnowen ahun etno sohorep isa fug-o, ulug yig hisaruk ahi-o. 11 Eke at hwe etno ahun inim healeg wereg halug, hwe ari ahun elehon-at welamag-o. Eke inim healeg eleg wereg halug, at hwe etno ahun inim dambuksoho welamag-o. Eke ahun etnowen hag uhwe sohorep isa fug-o. 12 Eke hit nin epmano At Ninowe etnowen yig nitukmu yig hisaruk ahi eleg-o. An nindien bulug-at yig hisaruk ahi-o. At ninomin misig uhwe etno Allah wene indi ebetuk eleg wilil, nahun ninim welam fano, ulug ahla buruk halug, at ap etnowen hwe etno sohorep isa fug-o. 13 Eke at hwe misig ahun Allah wene ebetuk eleg wilil, nuhwe ari ninim welam fano, ulug ahla buruk halug, at hwe etnowen ahun etno sohorep isa fug-o. 14 Eke at ap Allah wene ebetuk elehon etno uhwe obabut fam Allah udaki inim horogsoho werehon neken atisi-o, eke at hwe Allah wene ebetuk elehon etno ahun obabut fam Allah udaki inim horogsoho werehon neken atisi-o. Eke ariroho eleg hahen, it hinudaki ap angge, hweap angge epmano it Allah wene inapelehon inudaki neken welatlebon oke, it inebe epmano kidia Allah udaki neken wereg-o. 15 Eke At Allah wene ebetuk elehon etnowen heal sawon ebetuk halug, heal sao ari fano at-o. Eke ari halug, hit ap inim, hweap inim Allah wene warukon epmanowen, at Allah wene ebetuk eleg wilil, heal sao burukon etno ninim welamuk ano, sohorep isuk ano? ulug hinonggarehen imig sao ari fano at-o. Eke At Allahen hit fanoroho welamag ulug wol hisebag-o. 16 Eke hat hwe du, nahun ili wahuk fug ano? ulug hahla buruk am fug-o. Eke hat ap du, nuhwe ili wahuk fug ano? ulug hahla buruk am fug-o. At Allahen wol hisebag etno sambit welatikip etno ilitoho welamuk-o ulug yig isebahon wene 7:17-24 17 Eke At Ninowe inuk suon etnowen aphe obog ninakeleg sik sumbut nisebag-o. Eke At Allahen ninakeleg ninakeleg-at wol nisebareg, og nisebahon etno hit aphe Allah udakion obog ilitoho-at sil nuruk amag ulug yanggul hisaruk ahi. 18 Eke At Allahen wol isebag etno sambit ap misig iyunggul ambilik balehon welapag ano? Eke ari halug, ap du iyunggul ambilik balehon-at welamag-o. Eke At Allahen wol isebag etno sambit ap misig iyunggul ambilik baleg elehon welapag ano? Eke ari halug ap etno iyunggul ambilik baleg elehon-at welamag-o. 19 Eke alem iniyunggul ambilik baltukon etno inim, baltuk elehon etno inim ebe mondog eleg-o. At Allahen wene duroho suruk amuk eke duroho suruk am fug ulug yig nisebahon etno ilitoho sukon ari alem suon-at wereg-o. 20 Eke ari halug, inakeleg inakeleg duroho siek-o ulug At Allahen wol isebag etno sambit welapag etno hag it aphe obog arion-at welamag-o. 21 Eke hit it aphe inanggimbu wereg hisalug wol hisebag ano? Ari halug fano at-o, eke hat hebe anggimbu welamon etno alem eleg atuk halug, hat hebe ap unde werehon etno neken welariog ulug suhun-o. 22 Eke ap misig ap inanggimbu wereg heheg, At Allahen ap etno At Ninowe inuk fam wol suruk halug, at ap ari Ninowe inuk suon aharek unde welamon-at atisi-o. Eke ariroho ap misig yi angge di angge unde werehon etno At Allahen wol suruk halug, ap etno At Kristus anggimbu atisi-o. 23 Eke hit hinebe hinonggo anggolo balfareg fam, aphe inanggimbu welamuog ulug suk fug-o. 24 Eke ari halug, nomini-o. At Allahen wol hisebag etno sambit hit ariroho welapag etno ilitoho hit obog kidia At Allah hinim wilil hinobabut etnoroho-at welamuk-o. It ap hwe oho elehon inim eke it hwe ap oho elehon inim ariroho welamuk-o ulug yig isebahon wene 7:25-40 25 Eke kidia it ap elege, hweap duhumon inawene etno At Ninowe etnowen yig isawag ulug yanggul nitisi fuhon oke, eke At Ninowe etnowen nabua nearisireg fam, nahla eberoko suruk wilil nindimuen wal haruk ahion etno yig hisamin-o. 26 Eke yi angge di angge eleg amon epmano fanggog ik waharuk halug, it ap obog epmano kidia wereg ilitoho-at welam fano nahla buruk ahi-o. 27 Eke hat hwe misig oho welahen halug, hwe etno sohorep isik hahla buk fug-o. Eke hat misig hwe oho eleg welahen halug, hwe misig holaminen ulug heahuk fug-o. Eke hat hwe holahun halug, dag suhun fug-o. Eke at hwe duhumon etnowen ap holaruk halug, dag suruk eleg-o. 28 Eke it inuhwesi inahuni dambuksoho werehon epmano angginon inobam aruhu halug, anden orog-at sukag ulug yig hisahuk nahla buruk ahi-o, nomini. 29 An ariroho yig hisaruk ahion ari, kwean duma olohore ket amon etno fanggog uruk ari fam yig hisihi-o. Eke kidia it inuhwesi werehon epmano inuhwesi elehon neken welamag-o. Eke it ioba yatukon epmano ioba yatuk elehon neken welamag-o. 30 Eke it inahien harukon epmano inahien haruk elehon neken welamag-o. Eke it yi angge di angge onggo balsarukon epmano inaharek elehon neken welamag-o. 31 Eke it yi angge di angge kweanmon onggo baleheg sil nurukon epmano, suruk elehon neken welamag-o. Eke o kweanma duma obog olohore eleg aruhu-o. 32 Eke hit hinindi seneni ebereheg eleg welam fano ulug nahla buruk ahi-o. Eke ap hwe oho elehon etnowen At Ninowe eyabuk sukon etno-at indi ebetuk wilil, “An Nowe etnowen ahien hawag ulug keroho sik-o?” ulug ahla buruk-o. 33 Eke at ap hwe ohowon etnowen kweanmen sukon etno-at indi ebetuk wilil, “An nuhwe ahien hawag ulug keroho sik-o?” ulug ahla buruk wilil, indimu misig ebereheg, misig ebereheg suruk-o. 34 Eke hole duhumon ap oho elehon etno At Ninowe eyabuk sukon etno-at indi ebetuk-o. Ariroho ebetuk ari at ebe inim, indi inim Allah ake welamag ulug indi ebetuk-o. Eke at hwe ahun werehon etno yi angge di angge kweanmon epmano indi ebetuk wilil, nahun ahien hawag ulug keroho sik-o? ulug ahla buruk-o. 35 Eke an wene yig hisihion ari hinebe hele waroko hinombisahiog ulug yig hisihi fug-o. Anden yalmag hisiog ulug-at yig hisihi-o. Eke hit epma hinandomog fano wilil, At Ninowe eyabuk misig etno-at hinindien eberoko suruk amag ulug yig hisihi-o. 36 Eke at ap misihen, an nuhwe abug yig nepahon etno holaruk ahi fug ari dag neken suruk ahi-o, ulug ahla buruk wilil, arat ninanggog atuk ahe ari, nuhwe hulik-o, ulug ahla buruk halug, at uhwe abug yig itukon etno inim arat dambuk amag-o. Eke ariroho dambuk atuk ari, dag suruk eleg-o. 37 Eke at ap misig indi oag weregsoho werehon etno obam ahahe atuken suk ulug ahla buruk eleg wilil, at uhwe abug yig itukon etno holeheg eleg ombatalug wilil, at indimuen, hwe ari holahuk fug, an werlek-at welaruhuk, ulug ahla buruk halug, ari fano-at suruk-o. 38 Eke ari halug, uhwe abug yig itukon etno holao ari fano-at oke, eke holeheg eleg wereg ari mondog fano-at-o. 39 Eke ap misig awan iluk wereg heheg uhwe etno at inim dambuksoho wereg-o. Eke fobik ahun etno waratuk halug, hwe arien ap at indi harukon holao ari fano-at-o. Ariroho suruk wilil, eke At Ninowe etno inuk fam ahun misig holao ari fano at-o. 40 Eke an nahla buruk wilil, at hwe suhweon etno ariroho wilil ahien haruk aruhu-o, ulug ariroho nahla buruk ahi ari, an hag At Roh Kudus ninim welahe buruk ahi-o. |
LAI 2006
Indonesian Bible Society