1 Korintus 6 - Allah Wene Hurumbik Keron

Inomini etno dag sehen ulug inobam denggeltukon wene 6:1-11

¹ Eke ap hiron misig etnowen homin obam denggeliog ulug it aphe Allah udakion epmano yig iseheg sohorep isalug, it aphe Allah wene inapelehon epmanowen hinoag del hinabukag ulug yig isa lao ari fano ulug buruk ahep ano?

² Eke nit Allah udakion epmanowen it aphe kweanmon inoag del inabuhuk etno hinapelehen suruk ahep ano? Eke ari halug, hiren it aphe kweanmon epmano inoag del inabuhubon oke, keroho ulug alem doron epmano heahuk hinapeleg atuk ahep-o?

³ Eke niren it Allah malaikat inoag del inabuhuk ari hit hinapelegma uruk ahep ano? Eke ari halug yi angge di angge kweanma duma alem surukon epmano-at oag del inaptuk am-o.

⁴ Eke dumen alem surukon misig wereg atuk halug, it ap Allah udaki hinanggelegma wilil, kimbu neken buruk ahebon epmano dindiloko yig isaruk ahep ano?

⁵ Ari halug, an hinenggali warep hisahaki-o. Eke ap misig indi weregsoho wilil at ominion alem heako yig isarukon etno hit hinahla epma mondog eleg ano?

⁶ Eke hit ap misihen at hinomin etno oag deloko umbukag ulug it Allah wene inapelehon epmano yig isa laruk ahep ari dag-o.

⁷ Eke at hinomin etno obam denggeltuk ahep ari hinobabut urunanggeroho wilil dag-at suruk ahep-o. Eke hit hinili holeheg eleg-at welatlepmen fano-at oke, hinune obam denggeltuk ahep ari hai-o.

⁸ Eke ariroho suruk ahep ari, hiren it hinomini-at dag seko imbisaruk wilil, kimburep isaruk ahep-o.

⁹ Eke it aphe dag surukon epmano fobik At Allah weregma lahup fug etno hit hinapeleg ano? Hinindimuen hinenggal-at ebetuk am fug-o.

¹⁰ Eke it hwe ap uhweon surukon epmano inim, eke kwanangge amurli hundutukon epmano inim, eke it ap ap wanggik surukon epmano inim, eke inalomnangge warukon epmano inim, eke ininggikmu fereleg elehon epmano inim, eke ambusu nenek surukon donggogsoho narukon epmano inim, eke inenggal ap inobam denggeltukon epmano inim, eke komo wene yig isarukon sohorep isalug dil dil angge surukon epmano inim ari, Allah wereg ambeg kukon etno holahup fug-o.

¹¹ Eke hit nin ariroho dag suruk atikibon oke, eke At Allahen Ninowe Yesus Kristus inuk fam At Roh Kudus etno og hisaruk wilil, hinindimu dag suruk atikibon epmano ho hinabeheg, eke hinebe Aren angge ulug akeleg-at hinombisahakeg, eke alem dahon hinobam werehon epmano hinili oko elehepfeheg suruk atisi-o.

Hit hinebe epmanowen At Allah inuk suontepfuruk amuk-o ulug yig isebahon wene 6:12-20

¹² Anden yi angge di angge siog ulug yuhun-at welahion oke, eke yi angge di angge surukon epmano fano naptuk eleg-o. Eke anden yi angge di angge siog ulug yuhun-at welahion oke, eke alem misihon etno nobam ombata-o ari nambit-o.

¹³ Eke ninaharom ari nit ninahum fam welamon ulug wereg-o. Eke ninahum ari ninaharom yonggatukon-at wereg-o. Ariroho wereg oke, eke fobik At Allahen ninaharom inim, ninahum inim ebe elehapsuhu-o. Eke ninebe etno hwe ap uhweon surukon ulug wereg eleg-o. Eke nit ninebe an At Ninowe inuk suon etno apma neken-at welahe-o. Eke Ninowe inuk suon ari nit ninebe ninake-at wereg-o.

¹⁴ Eke At Allahen Ninowe inuk suon etno iluksoho minduhupfebag etno hag, eke nit inim-at oag weregsoho min ninabuhu-o.

¹⁵ Eke hit hinebe epmano At Kristus ebe inggik iog neken welahep ari hit hiniluk-o. Eke ap misig At Kristus ebe atog neken werehon etno dikiksoho walug, hwe ap misig ohopfeheg sil nurukon etno inim hundubuk ari fano behep ano? Ari mondog hai-o.

¹⁶ Eke at hwe herako surukon inim dambultuk halug, etno inebe misig neken-at dambul atuk ari hit hinapeleg ano? Eke at Alkitab etnowen yig nisaruk wilil, “It biren epmano inebe misig-at amuhup-o,” ulug yig nisaruk-o.

¹⁷ Eke At Ninowe inuk suon etno ninim dambultuk aheon ari ninindi misig-at welamuhuk-o.

¹⁸ Eke hwe ap uhweon surukon ari namberak ulug sohorep isao fano. Eke it apheyen yi dag di dag surukon epmano inebe dahapsaruk eleg oke, it hwe ap uhweon surukon epmano hag inebe-at dahapsaruk-o.

¹⁹ Eke At Allahen Roh Kudus etno og hisarisireg fam Roh Kudus etno hinindimu weregma, hit hinebe Roh Kudus etno ifaleg neken welahep ari, hit hinapeleg ano?

²⁰ Eke hinebe ari hinonggareg unde welahep fug-o. At Kristus hinonggo anggolo embebag etno fam, hit hinebe ari At Allah-at unde wereg-o. Eke ari halug, hit hinebe inim, eke hinindi inim etnowen At Allah inuk-at suontepfuruk amuk-o.