1 Korintus 5 - Allah Wene Hurumbik Keron

Hwe ap uhweon hinalomnangge suk fug-o ulug yig isebahon wene 5:1-13

¹ Eke it ap hinim welahebon epmanowen hwe ap uhweon holaruk ulug yig nirik waharusa-o. Eke it wene inapeleg ambeg epmanowen hweap og inaptuk wereg oke, eke ap hiron misihen ikni uhwe holalug inim wereg etno hag hai-o.

² Eke hit ariroho suruk ahebon oke, hiren nit fano ulug uruk ahep ari, keroho ulug uruk ahep-o? Eke hinahien sukon etno sohorep isalug at ap ariroho surukon etna hinanggelegmen lisoko wilipfuog ulug ioba yatlepmen fano.

³ Eke an nebe yatma welahi-at oke, nindi hag hit hinim welahep-o. Eke ariroho hinim wilil, ap ariroho dag surukon etno At Ninowe Yesus inuk fam arat oag deloko nune obam imbirikik-o.

⁴ Ari halug, hit hinebe wonggalepfulug an nindi hit hinim welahep ihion etno inim-at, eke Ninowe Yesus inuk suon oag werehon etno inim-at hit hinim welahep halug,

⁵ ap ariroho surukon etno ahap dag aruhureg oke, indi At Ninowe waruhu etno fam fano sukag ulug, hiren ap ari oag deloko at iblis og imuog ulug fuloko imbiek-o.

⁶ Eke hiren an suon hat suon uruk atikip etno famen fano sirikip fug-o. Eke roti su amag ulug dorat deloko belapfurukon etno fam obog-at su atuk etno hit hinapeleg neken welatikip ano?

⁷ Eke hit hag roti keron neken amuhuken ulug, roti su amag ulug werehon amukon dag sirikibon epmano horoho wilipfisiek-o. Eke it Israel ap amuk wam domba Paskah esebuog ulug wapag etno hag, At Kristus etno nit ninake warapareg fam,

⁸ roti amukon ari dag surukon inim, wanggik surukon inim sohorep isalug, roti keron ari hag ninobabut fanoroho surukon etno-at holao fano. Eke keron etno holalug, esoho nuog ulug dambuksoho welamuk-o.

⁹ Eke anden bilin wene holal bal hisaruk wilil, “It hwe ap uhweon surukon epmano hinim welam fug-o,” ulug yig hisarikikon etno, it aphe Allah wene inapeleg wilil, wanggik seheg, eke inobabut dahon wilil,

¹⁰ ininggikmu arikon welaheg, eke komo wene yig isarukon epmano sohorep isalug dil dil angge seheg, eke kwanangge amurli hundireheg surukon epmano hinim hunduhuk welam fug ulug, it wene inapelehon farim yig hisarikik fug-o. Anden bilin ariroho yig hiselemen, hit kwean du famen wilip atlep-o.

¹¹ Eke ari halug, kidia wene holal du bal hisaruk wilil, “At ap misihen an hinomin welahi ulug yig hisaruk oke, hwe ap uwheon surukon epmano inim, eke obabut dag wilil inggikmu arikon etno inim, eke kwanangge amurli hundutukon etno inim, eke une enggal-at inobam denggeltukon etno inim, eke ambusu nenek surukon etno donggogsoho narukon etno inim, eke komo wene yig isarukon epmano sohorep isalug dil dil angge surukon etno inim, ap ariroho surukon etno hit ninomin ulug hinim welam fug-o. Eke ap arion hinim horie ulug yi angge di angge na fug-o.”

¹² Eke anden it ap selemon Allah wene inapelehon epmano inoag del inaptuk ahi fug-o. At Allahen-at it ap selemon epmano inoag del inabuhu-o. Eke hit hag it ap hinanggelegma wilil hinim welahebon epmano fikfag inaren baltuk amuk-o.

¹³ Eke ariroho at Alkitab etno fam yig nisaruk wilil, “At ap dahon hinanggelegma werehon etno hiren oag deloko wilipfiuk-o,” ulug yig nisaruk-o.