1 Korintus 4 - Allah Wene Hurumbik Keron

At Kristusen At awene yig isil nuruk amag ulug mondep nisahabag-o ulug yig isebahon wene 4:1-21

¹ Eke it aphe epmanowen nit farim uruk wilil, “At Kristus anggimbu wilil, wene At Allah indimu heraho welapahon etno bukaloko yig nisarukon inebe du at-o,” ulug it apheyen ariroho nisawag-o.

² Eke it ap ariroho wene yig isarukon ari Iniknien ariroho siuk ulug yig isarukon epmano ilitoho suk ari fano. Ilitoho suruk amag ulug inaren baltuk wereg-o.

³ Eke hiren an naren baluhup ano, eke it aphe o duma werehonen naren baluhup ano ulug nahlahiroho welahi oke, eke an nebe hag naren bal saruk ahi fug-o.

⁴ Eke an hag alem dahon misig sirikik ulug nindimu ebetuk ahi fuhon oke, ari famen an nebe nili holahuk fug-o. Eke an naren bal naptukon ari At Ninowe inuk suon etno-at wereg-o.

⁵ Eke hit At Ninowe inuk suon awan waharuk eleg heheg, hiren aphe inoag del inabuk fug-o. Eke At Ninowe inuk suon etno o ari sambit waharuk aruhureg, o hubanggo neken werehon etno selegma embeheg, eke it aphe inindimuen herako ebetukon epmano selegmaroho imbiseheg suhu-o. Ariroho suruk aruhureg, At Allahen o ari sambit aphe inakeleg inakeleg ininuk suontep isahu-o.

⁶ Nomini-o, hit epma wene holal balfahon etno seberepfulug hinindi akeleg neken ebereheg, eke hinambit haruk wilil ap misig suontepfeheg, eke ap misig seberepfeheg suruk ahep ha nowen ulug, hiren an at Apolos ninim keroho wereg ulug ninaren baluhuben wene ilitoho neken-at yig hisihi ari, hiren nit keroho welamuk ulug hinahla bukag ulug yig hisihi-o.

⁷ Eke hat hag ap sen hakeleg-at suon ulug ilanggen hearuk-o? Eke nongge hag og hitisi fug-o? Eke At Allahen obog og hitision oke, og hitisi fugmu neken, keroho ulug hat hinuk-at suontepataruk ahen-o?

⁸ Eke hit hinebe yi angge di angge obog arat holarikip-o. Eke hit hinaharek arat anggolo atisi-o. Eke nit ariroho eleg niseheg, hit epmano hinune ap suonen uruk hag uruk atikibon oke, eke hit hinebe demat ap suon ilitoho welatlepmen, nit ninim hunduhuk wilil ninune it ap suonen uruk hag uruk atlo-o.

⁹ Eke an nindi ebetuk ahion ari, nit At Allahen wene yig isil lawag ulug mondep nisaharision epmano it malaikat inim, eke it aphe kweanmon inim it obohen inilanggen nisawag ulug, it ap waramag ulug inawene baltuson epmano ilitoho, nit ninebe fobiksep nisaharisi-o, ulug nahla buruk ahi-o.

¹⁰ Eke At Kristus awene yig isil laruk ahe etno fam nit etno ninindi kimbu neken-at welaheon oke, eke hit hag At Kristus inuk fam hinindi weregsoho welahep-o. Eke nit ninebe ninoag elehon-at oke, hit hag hinoag wereg-o. Eke hit suontep hisaharuk wilil, nit hag kimburep nisaharuk-o.

¹¹ Eke kidia orom inim, ik inim obok haruk ahe-o. Eke ninasum libilihon-at wantaruk ahe-o. Eke ninebe yikangge waroko o misig ninombisahik laheg surukmu, ninibam faleg eleg-at welahe-o.

¹² Eke nininggik fam suruk wilil, yabuk sat anggolo-at suruk ahe-o. Eke iren dahon ulug yig nisarukmu, niren it hag wa ulug yig isaruk ahe-o. Eke iren dahon epmano ninobam ninombisahuog ulug mug nisaruk oke, nit ninindi bugsoho-at welahe-o.

¹³ Eke iren ninabug baltukon oke, eke niren ninune wiogsoho-at yig isaruk ahe-o. Eke nit ninebe ari it aphe kweanmon yi angge di angge naruk wilil asin hik isaruk epmano hag, nit inele baleg neken atukukseg, ariroho-at welahe-o.

¹⁴ Eke hit hinenggali war hinabiog ulug wene du holal bal hisaruk ahi fug-o, eke an nudaki nindi hunduhukon epmano inesanggo war inabiog ulug-at suruk ahi-o.

¹⁵ Eke hit Kristus inuk fam yanggul hisil nurukon ari ap inebe anggolo-at wereg oke, at hinikni neken ebe misig-at wereg-o. Eke anden At Kristus Yesus inuk etno yig hiseheg, eke wene fano wene yanggul hiseheg suruk atikikon epmano fam fano hinaptisi-o.

¹⁶ Ariroho fano hinaptisireg fam, hit an suruk ahi ilitoho suruk amuhuben ulug hinesanggo watuk ahi-o.

¹⁷ Eke an At Kristus inuk fam o ahik ya da At Allah udaki wereg ambeg wene yanggul isaruk ahion epmano nobabut suruk ahion hinindi ebebukag ulug, an namloho Timotius indi oag weregsoho sil nurukon, At Ninowe inuk fam nindi hunduhukon etno hinambeg lahabik waharikik-o.

¹⁸ Eke hiren an ninambeg bik nisa waruhu fug neken it ap hiron ninen inonggareg ininuk suontepatarusa-o.

¹⁹ Eke At Ninowe etnowen ariroho ebetuk halug, an dulum-at bik hisa waruhuk ulug nahla buruk ahi-o. Hinambeg waharuk aruhukseg, it aphe suontepatarukon epmano inune urukon etno nesanggo holtug eleg-at inindi oag wereg ano ulug inaren baluhuk-o.

²⁰ Eke At Allah weregmen sukon ari inune urukon epmano fam suruk eleg-o. Eke inindi oag werehon epmano fam-at suruk-o.

²¹ Eke hit nongge hinindien suruk ahep-o? An yikangge walug hinambeg wam hinindi ano, eke nindi hunduhuk wilil, seberoho hinambeg wam hinindi ano? Ari halug, hiren imig simiek-o.