1 Korintus 3 - Allah Wene Hurumbik Keron

Nit ninebe At Allah anggimbu welahe-o ulug yig isebahon wene 3:1-23

¹ Nomini-o, an hit ninim wene baltukukon etno hit aphe Roh Kudus inindimu werehon ulug yig hisarikik fug-o. Hinebe kweanmon wilil, At Kristus udaki fuangge neken weregma yig hisarikik-o.

² Eke naruk angge arikon epmano awan nao haien anden og hisarikik fug-o; we ag anggul ambusu neken-at og hisarikik-o.

³ Eke kidia ariroho-at hinindi kweanmon epmano hunduhuk wilil, arikon epmano nao hai-at welahep-o. Eke it ap hinahla werehon epmen inindi inasine aheg, eke nambit hambit eheg, suruk isalug, hinebe kweanmon epmano hinindi hunduhuk eleg welahe buruk ahep ano? Eke aphe kweanmon epmano inobabut ilitoho suruk ahe fug ulug hinahla buruk ahep?

⁴ Eke hat misihen uruk wilil, “An Paulusen angge at-o,” eke hat misihen, “An Apolosen angge at-o,” ulug uruk ahep-o. Ariroho uruk ahep ari, it aphe kweanmonen ilitoho uruk ahe fug ulug hinahla buruk ahep ano?

⁵ Eke at Apolos ari sa-o? Eke at Paulus ari sa-o? Eke At Ninowe inuk suon etnowen nineyabuk ninakeleg ninakeleg og nisebag etno fam, hiren Allah wene demat ebetuk amuhuben ulug yalmag hisaruk aheon etno ninebe du-at welahe-o.

⁶ Eke anden i yatikik-o. Eke at Apolosen hohol warisi-o, ik deltil larisi-o, eke At Allahen i yahowon etno unggum lahapfik waharisi-o.

⁷ Eke i yatukon etno inim, eke hohol warukon etno inim ari we anggimbu neken-at wereg-o; eke at unggum lahapfik waharukon etno Allah akeleg-at wereg-o.

⁸ Eke i yatukon epmano inim, eke hohol warukon epmano inim inebe ilitoho-at wereg-o. Eke it yabuk sat anggolo surukon epmano At Allahen onggo inakeleg sik-at og isahu-o.

⁹ Eke nit hag At Allah eyabuk ninim suruk aheon-at welahe-o. Eke hit Allah eyabuk inim, ifaleg inim hit-at welahep-o.

¹⁰ Eke an At Allah indi hunduhuken og nepareg fam, ap indi enggaron o faltuk ilukon etnowen faltuk etno hag, anden o andorli belaptikik-o. Belapfuruk atikikmu, eke at ap misihen ari fam o ebe faltisi-o. Eke o andorli belaptukon etno inim, eke o faltukon etno inim it obog inakeleg inakeleg keroho faluk ulug inindi ebebukag-o.

¹¹ Eke o andorli belapfebahon etno At Yesus Kristus akeleg-at wereg heheg, it aben o andorli werlekon belapfuk ari hai-o.

¹² Eke ap misihen o andorli belapfebahon etno fam faltuk wilil, emas fam faltuk ano, eke perak fam faltuk ano, eke helep fanowon fam faltuk ano, eke e fam faltuk ano, eke watke ilukon fam faltuk ano, eke watke buhon fam faltuk ano,

¹³ ulug inakeleg inakeleg surukon epmano fobik At Yesus waruhu etno fam o ari keroho faltusa ulug obog selegma aruhu-o. Selegma atuk aruhumu eke o ari sambit alem selegma aruhu-o. Ariroho selegma aruhu ari yabuk alem keroho surusa ulug hondok fam selegma aruhu-o.

¹⁴ Eke at ap misihen o andorli etno fam faltision etno hondok nenggeg eleg oag weregsoho welaruhu halug, ap etno yabuk onggo og iruhu-o.

¹⁵ Eke ap misig o faltision etno hondoken obog naruk halug, ap etno aharek eleg aruhu-o. Ariroho eleg aruhu oke, At Allahen ap etno ebe ili wahu-o. Ili waruk aruhureg, ebe hondokmen hisiloko neken umbuhu-o.

¹⁶ Eke hit hinebe At Allah ifaleg neken-at welahep oke, eke hit At Roh Kudus etno ninindimu wereg eleg buruk ahep ano?

¹⁷ Eke at ap misihen Allah ifaleg etno mialtuk halug, fobik At Allahen ap ari ebe mondog olohore elegsoho umbuhu-o. Eke Allah ifaleg etno Aren angge ebe akeleg-at wereg-o. Eke At Allah ifaleg etno hit hinebe-at welahep-o.

¹⁸ Eke hit hinonggareg hinune hinenggal-at hinobam ombataruk am fug-o. Eke ap misig hit hinim welahebon etnowen, “Ap o kweanma nindi werehon an-at welahi-o,” ulug indimu ebetuk halug, ap etno demat indi wereg amag ulug bilin ebe kimbu neken welamag-o.

¹⁹ Eke it ap kweanma dumen ninindi werehon nit-at ulug inahla burukon ari At Allahen inobabut kimbu neken-at ilanggen isaruk-o. Eke ari halug, at Alkitab etnowen yig nisaruk wilil, “It ap ninindi wereg ulug inahla burukon epmanowen alem neken inobam ombataruk isalug, bak sapnama waratuk etno hag, At Allahen sen inaptuk-o.”

²⁰ Eke wene misig du yig nisaruk wilil, “It ap ninindi werehon nit-at ulug inahla burukon epmanowen inune yi eheg di eheg urukon epmano At Ninikni inuk suon etnowen hairep isaruk-o.”

²¹ Eke ari halug, it apheyen ap du suon ulug fog inabuk fug-o.

²² Eke yi angge di angge obog-at hiren angge wereg-o. Eke at Paulus inim, eke at Apolos inim, eke at Kefas inim, eke kwean duma inim, eke nit ninebe niniluk welaheon epmano inim, eke it waratukon epmano inim, eke o kidia werehon epmano inim, eke o fobik welaruhuon epmano inim obogsoho hiren angge-at wereg-o.

²³ Hiren angge-at wereg oke, hit hinebe hag At Kristusen angge-at welahep-o, eke At Kristus ebe etno At Allahen angge-at wereg-o.