1 Korintus 2 - Allah Wene Hurumbik Keron

An hit ninim wilil duroho yig hisarikik-o ulug yig isebahon wene 2:1-5

¹ Eke an nebe bilin hinambeg waharikikseg, At Allahen sebahon wene etno-at dindiloko yig hisa waharikik-o, nomini. Eke it ap ninindi wereg ulug inahla burukon epmanowen inune yaron, fanowon neken uruk etno hag an yig hisa waharikik eleg-o.

² Eke anden hit hinanggelegma epmen wene werlekon yig hisarikik fug-o. At Yesus Kristus awene etno-at yig hisarikik-o. Eke At Kristus e fam lenggaloko embebagma warapahon wene etno-at yig hisao nahla birikik-o.

³ Eke ariroho nahla buruk atikikseg, nebe sebereg neken nakolen nindi elekelek suruk wilil hit ninim welatukuk.

⁴ Eke ariroho wilil, it aphe ninindi wereg ulug inahla burukonen inune enggatoho uruk etno hag wene yig hisarikik fug-o. An Roh Kudus oag werehon etno fam hurumbik dindiloko yig hisiog ulug sirikik-o.

⁵ Eke it apheyen inune enggatsoho urukon epmano hinindi ebebuk sohorep isalug, At Allah oag werehon etno-at obam ebebukag ulug ariroho yig hisarikik-o.

At Allah indi ebetukon etno yig isebahon wene 2:6-16

⁶ Eke anden wene iniluk amon etno-at yig isaruk ahi-o. Eke it kweanmon epmano kidia suon neken wereg oke, fobik inoag eleg amuhubon epmanowen inune enggatsoho ukon etno sohorep isalug, anden it inindi werehon epmano wene iniluk amon etno-at yig isaruk ahi-o.

⁷ Eke wene iniluk amon yig isaruk ahion ari, it aphe inilanggen ha nowen ulug bilin At Allahen herako embebag-o. Eke wene ari o kweanma awan wal heheg eleg wilil At Allahen nit suontep nisahiog ulug fuloko embebag-o.

⁸ Eke wene ari, it o duma inune suon urukon epmanowen iniluk apag fug-o. Wene ari iniluk atlepmen, iren Ninowe inuk suon etno e fam lenggaloko embelep fug-o.

⁹ Eke wene misig du Alkitab fam weregma yig nisaruk wilil, “It aben inilanggen haruk apag fuhon etno inim eke inesanggo holtuk apag fuhon etno inim eke inindi ebetuk apag fuhon etno inim, At Allahen nit aphe At obam hinindi hunduhuk welaheon etno og nisiog ulug dugsoho ninombisahabag-o.”

¹⁰ Ariroho ninombisaharuk apareg, fobik At Roh Kudus etno fam yanggul nisebag. Eke At Roh Kudusen yi angge di angge obog alem heaharuk wilil, At Allah indi undamen ahla burukon etno inim-at alem heaharuk wereg-o.

¹¹ Eke hat sen ap misig indimu ebetukon etno hiluk welahen-o? Ari eleg-o. At ap ahut indimu werehon etno akeleg-at iluk wereg-o. Eke At Allah indimu ebetukon etno it aphe obog iniluk atuk eleg-o. At Roh Kudus etno akeleg-at iluk wereg-o.

¹² Eke At Allah indi hunduhuken og nisebahon etno niniluk amag ulug, nit it ap kweanmon inahurangge epmanowen og nisebag fug-o. At Roh Kudus belap nisa wapahon etnowen-at og nisebag-o.

¹³ Eke At Allahen og nisebahon etno ari, it aphe ninindi wereg ulug inahla burukon epmanowen inune enggatoho neken yig isaruk etno hag yig isaruk ahe fug-o. Eke it aphe Roh Kudus inindimu werehon epmano wene demat urukon etno yanggul isaruk wilil, At Roh Kudusen yanggul nisarukon etno-at uruk ahe-o.

¹⁴ Eke at ap misig Roh Kudus indimu eleg wilil, alem amukon ebetukon halug, At Roh Kudusen yig nisarukon etno demat ulug eberoko wao ari hai-o. Eke nit At Roh Kudus etnowen yig nisarukmu waon oke, at ap etno urunanggeroho neken ahla buruk wilil, wene etno alem heahuk hai atuken weheg eleg wereg-o.

¹⁵ Eke at ap Roh Kudus indimu werehon ari yi angge di angge obog inaren baltukon oke, eke it ap werlekonen at ap etno aren baluk hai-o.

¹⁶ Eke Alkitab etno fam yig nisaruk wilil, “At Ninowe indi ebetukon etno ap sen iluk atisireg, misig inim yanggul iruhu-o?” Ari eleg-o. Eke nit hag At Kristus indi ebetukon etno nit ninindimu wereg-o.