1 Korintus 13 - Allah Wene Hurumbik Keron

At Allah it aphe hinim hinindi hunduhuk welamuk ulug yig isebahon wene 13:1-13

¹ Eke an aphe inune epmano inim, it Allah malaikat inune epmano inim obog-at uruk wilil, aphe nindi hunduhuk eleg welatlemen, an nebe etno ik oag ebe honanggo elehon une keng uruk etno hag nabutse-at welatle-o.

² Eke an Allah wene nindimuen walug yig iseheg, eke yi angge di angge herahowon epmano obog niluk aheg, eke At Allah inuk mondog ebetuk wilil bunu etno walug o ninmu imbik laheg suruk wilil, nindi hunduhuk eleg welatlemen, an nebe napeleg neken-at welatle-o.

³ Eke an naharek epmano obog-at sumbut iseheg, eke an nebe hondok yal nabukag ulug imig seheg suruk wilil, nindi hunduhuk eleg welatlemen, fanowon etno ombatele fug-o.

⁴ At misihen aphe inim indi hunduhuk wereg an indimu asine eleg wilil suruk-o. Eke indi sebereg wilil inim fano wereg-o. Eke inim indi hunduhuk wilil, aren uwa uruk eleg-o. Eke ebe suontepataruk eleg-o. Eke aren we yuhun-at suruk eleg-o.

⁵ Eke aik dahog uruk eleg-o. Eke aharek su amag ulug heahil sil nuruk eleg-o. Eke obam winimugsoho suruk eleg-o. Eke at du dag suruk-o ulug indimu ebetuk eleg-o.

⁶ Eke it apheyen dahan fahan suruk isalug, ahien isaruk eleg-o. Eke fanoroho surukon epmano hag ahien isaruk-o.

⁷ Eke yi angge di angge surukon epmano inobam inapelegsoho apma imbisaruk-o. Eke yi angge di angge demat ulug ahla buruk-o. Eke yi angge di angge fano ban suruk amuhup ulug indi ebereg wereg-o. Eke at ebe obabut fano mondog wilil ariroho suruk-o.

⁸ Eke at ap misig aphe inim indi hunduhuk werehon ari eleg aruhu fug-o. Eke wene indimuen walug aphe yig isarukon ari hag eleg aruhu-o. Eke it aphe inune akelehon urukon ari inim eleg aruhu-o. Eke yi angge di angge alem iniluk atukon ari obog-at eleg aruhu-o.

⁹ Eke nit hag we atog-at niniluk welahe-o. Eke niren wene atog-at ninindimuen ebetuk atlug yig isaruk ahe-o.

¹⁰ Eke fobik mondog ilitoho suruk amon etno niniluk atuk halug, atog suruk aheon etno eleg aruhu-o.

¹¹ Eke an nebe udag doron wilil nune it udag doronen uruk epmano ilitoho-at uruk atikik-o. Eke nahla it udag doronen buruk epmano hag-at buruk wilil, nindi it udag doronen ebetuk epmano hag ebetuk atikik-o. Ariroho suruk wilil, nindi eleg neken welatikikon oke, fobik nanggog atuk atikikseg, it udag doronen suruk hag suruk atikikon epmano arat sohorep isarikik-o.

¹² Eke nit kidia wukahi etno fam ninahut o hikmu neken haruk aheon oke, fobik o ari sambit ebe ninilanggen hahuk-o. Eke kidia hag dorat niniluk atuk aheon oke, fobik o ari sambit At Allahen an nebe kiroho iluk welapag etno hag an kiroho niluk aruhuk-o.

¹³ Eke ari halug, ninindi demat ulug ebetuk aheon epmano inim, eke fobik suhu ulug ninahla buruk aheon etno inim, eke ninindi hunduhuk welaheon epmano inim, alem henahan ari mondog wereg-o. Eke ariroho wereg oke, ninindi hunduhuk welaheon epmano alem suon-at wereg-o.