1 Korintus 12 - Allah Wene Hurumbik Keron

At Roh Kudus akelehen-at nineyabuk og nisaruk-o ulug yig isebahon wene 12:1-11

¹ Eke an kidia Roh Kudusen og nisawon wene etno yig hisamin-o, nomini. Eke hit alem ari hinapelegsoho welam ari nambit-o.

² Eke hit hinebe it Allah wene inapelehon wereg epmano hag wereg hisalug, it monggat inune unggut elehon inambeg og hinaplug lebag epmano hiniluk at-o.

³ Eke ari halug, at ap misig Roh Kudus etno indimu wilil, aren At Yesus ebe homali neken umburuk eleg-o. Eke at ap misihen, “At Yesus an Nowe at-o” ulug urukon ari, At Roh Kudus etnowen-at yig itukmu uruk-o.

⁴ At Allah indi hunduhuken og nisebahon etno, yabuk ninakeleg ninakeleg-at og nisaruk ari, At Roh Kudus misig etnowen-at og nisaruk-o.

⁵ Eke it ap Allah yabuk surukon epmano ineyabuk akeleg sik-at wereg oke, At Ninowe inuk suon etno hag ebe misig-at wereg-o.

⁶ Eke yi seheg, di seheg suruk wilil, ineyabuk dombog-at wereg oke, At Allahen it aphe yi angge di angge suruk amag ulug fuloko imbisarukon epmano ebe misig-at wereg-o.

⁷ Eke it aphe obog fano inabukag ulug At Roh Kudus etnowen og nisaruk etno ninakeleg ninakeleg-at og nisaruk-o.

⁸ Eke it aphe inindi wereg amag ulug wene yig isarukon etno At Roh Kudusen ap misig og ituk-o. Eke it aphe yi angge di angge alem iniluk amag ulug wene yig isarukon etno At Roh Kudusen ap misig og ituk-o.

⁹ Eke ariroho suruk ari at misig etno Roh Kudus indimu wilil, Allah obam ebetuk amag ulug og ituk-o. Eke at misig Roh Kudus indimu wilil it aphe uk warehon fano inaptuk amag ulug og ituk-o.

¹⁰ Eke at ap misig it apheyen suk haion epmano suruk amag ulug og ituk-o. Ap misig Allah wene indimu waluhen yig isaruk amag ulug og ituk-o. Eke ap misig it aphe yi angge di angge surukon epmano du fanowon du dahon ulug oag del inaptuk amag ulug og ituk-o. Eke at ap misig aphe inune unggut inapelehon epmano uruk amag ulug og ituk-o. Eke at ap misig aphe inune unggut mirlaloko yanggul isaruk amag ulug og ituk-o.

¹¹ Eke yi angge di angge obog og nisarukon epmano ilitoho suruk amag ulug At Roh Kudus misig etnowen-at og nisaruk ari, At ahla buluhen nit yi aphe di aphe nineyabuk dombog-at og nisaruk-o.

At ebe misig-at oke nit inggik enggangga neken welahe-o ulug yig isebahon wene 12:12-31

¹² Ap inebe epmano misig-at oke, ininggik iniog wereg-o. Eke ap inebe ininggik iniog sele anggolo wereg oke, inebe misig-at wereg etno ilitoho, At Kristus ariroho misig-at wereg-o.

¹³ Eke At Allahen nit obog-at Roh Kudus misig etno Kristus ebe misig-at amag ulug belap nisa wapag. Eke it Yahudi ap inim, eke it Yunani ap inim, eke it aphe inanggimbu epmano inim, eke it unde werehon epmano inim, obog ninebe misig-at amag ulug ikma belap ninapag. Eke nit obog At Roh Kudusen ambusu etno misig-at og nisebagma, naruk ahe-o.

¹⁴ Ap inebe ininggik iniog sele misig-at wereg eleg-o, inebe anggolo-at wereg-o.

¹⁵ Eke at misig iohen uruk wilil, “An nebe etno ap inggik hag welahi fug du, ap ebe ninim welahe fug-o,” ulug ariroho elepmen, ebe inim welamon etno sohorep iselep buruk ahep ano?

¹⁶ Eke at ap misig esanggo etnowen uruk wilil, “An etno ap ilanggen hag welahi fug du, ap ebe ninim welahe fug-o,” ulug ariroho elepmen, ari fam ap ebe inim welamon etno sohorep iselep buruk ahep ano?

¹⁷ Eke ap misig we ilanggen akeleg welatlepmen, nongge fam esanggo holtuk atlep-o? Eke ap misig esanggo akeleg-at welatlepmen nongge fam amben baltuk atlep-o?

¹⁸ Ari eleg-o. At Allah indi ebetuk apareg, ninebe ninobam werehon obog-at wal nisebag-o.

¹⁹ Eke ninobam werehon obog-at wal nisebahon epmano nin eleg welatlepmen, ninebe etno keroho welatlo-o?

²⁰ Eke kidia ninebe ninobam werehon epmano anggolo wereg-at oke, ninebe misig-at welahe-o.

²¹ Eke ninilanggen etnowen nininggik hag, “Hat du nambit-o,” ulug yig um eleg-o. Eke ninungguluag etnowen niniog hag, “Hat du nambit-o,” ulug yig um eleg-o.

²² Eke ninebe atog oag elehon ninahla buruk aheon epmano eleg hahen, ari mondog hai welatlo-o. Ninebe atog olohore yet hao haion ulug ninahla buruk aheon epmano ari suontepfuruk ahe-o.

²³ Eke ninebe atog yet hao haion epmano ninenggalien heraharuk ahe. Eke ninebe atog olohore fanowon halug ariroho heraharuk ahe fug-o.

²⁴ Eke ninebe atog atog epmanowen it it healsao sohorep isalug, at misig obam ebereheg, eke at misig obam ebereheg suruk amag ulug, At Allahen ninebe atog olohore yet hao haion epmano herahukag ulug wal haruk wilil,

²⁵ ninebe obog dambuksoho wal hebag-o.

²⁶ Eke inebe atog wataruk halug, atog atog obog-at olok atuk-o. Eke it apheyen atog misig suontepfuruk halug, atog atog obog-at inahien suruk-o.

²⁷ Eke hit epma hinebe dambuksoho At Kristus ebe misig-at wilil, hinebe hinakeleg sik At Kristus ebe atog atog neken welahep-o.

²⁸ Eke At Allahen At udaki inanggelegma epmanowen aphe inebe minduhup isaruk wilil, bilin it wene yig isil nuruk amag ulug mondep isebahon epmano minduhup isebag. Eke fobik it Allah wene inindimuen walug yig isarukon epmano minduhup isebag. Eke fobik it wene yanggul isarukon epmano minduhup isebag. Eke fobik it aphe sukfugangge surukon epmano inim, eke it uk warehon fano inabukag ulug og isarukon epmano inim, eke it yalmag isarukon epmano inim, eke it aphe inaso werehon epmano inim, eke it inune akelehon urukon epmano inim obog-at minduhup isebag.

²⁹ Ari fam it obog-at it mondep isebahon epmano ilitoho wereg buruk ahep ano? Eke it obog-at Allah wene inindimuen walug yig isarukon epmano ilitoho wereg ano? Eke it obog wene yanggul isarukon epmano ilitoho wereg ano? Eke it obog-at ap nin sukfugangge surukon epmano ilitoho wereg ano? Eke it obog it aphe uk warehon fano inaptukon epmano ilitoho wereg ano? Eke it obog it aphe inune akelehon urukon epmano ilitoho wereg ano?

³⁰ Eke it obog it inune akelehon mirlaloko yig isarukon epmano ilitoho wereg ano? Ari eleg-o.

³¹ Eke ari halug, hit At Allah indi hunduhuk wilil hineyabuk og hisaruk halug, yabuk fanowon etno holalug ilitoho suhuken ulug suruk amiek-o. Ariroho suruk amag ulug yig hisihion oke, eke kwalem mondog fanowon misig yanggul hisamin-o.