1 Korintus 11 - Allah Wene Hurumbik Keron

¹ Eke an At Kristus nilanggen halug suruk ahi etno hag, hit anden surukon hinilanggen nealug suruk amiek-o.

At Allah inuk fam sembahyang uruk wilil halug it hweap inasum supnig welamag-o ulug yig isebahon wene 11:2-16

² Eke an yi wene di wene nindi ebetuk wilil, wene misig yanggul hiseheg, misig yanggul hiseheg suruk atikik epmano ilitoho hit seneg welahep ari fam hit fano suruk ahep-o, ulug suontep hisaharuk ahi-o.

³ Eke ari halug hit hiniluk amuhuben wene misig eberihion du yig hisaruk ahi-o. Eke it yi ap di ap epmano inungguluag neken At Kristus akeleg-at wereg-o. Eke it hweap inungguluag neken ari inahuni-at wereg-o. Eke At Kristus ungguluag neken At Allah-at wereg-o.

⁴ Eke ap misig unggulasum korepfulug eleg sembahyang eheg eke it aphe Allah wene yig iseheg suruk halug, at ungguluag-at enggalien suruk-o.

⁵ Eke at hwe misig unggulasum korepfulug sembahyang eheg, eke wene yig iseheg suruk halug, at ungguluag-at enggalien suruk ari, ungguluag delahantohon neken wereg-o.

⁶ Eke at hwe etno asum supnig eleg laruk halug, iruk inim-at balukag-o. Eke at hwe iruk balehon etno inambit neken haruk isalug, asum subunsawag-o.

⁷ Eke it ap epmano hag At Allahen At ahut neken inolohore inambian fano haloko imbisebareg fam, inunggulasum wanturuk eleg-o. Eke it hweap epmano hag it ap inolohore ilitoho haloko imbisebag-o.

⁸ Eke ap epma inalem neken hweap wereg eleg-o. Eke it hweap epmano hag inalem ap-at wereg-o.

⁹ Eke it ap epmano hag hweap inim dambuksoho welamag ulug wal isebag fug-o. It hweap epmano-at ap inim dambuksoho welamag ulug wal isebag-o.

¹⁰ Eke ari halug, it malaikat epmano inindi ebebukag ulug, it hweap etno ap inapma-at wilil, inasum supnig-at welamag-o.

¹¹ Eke At Ninowe etno ninim wilil, it hweap inakeleg, it ap inakeleg wereg eleg-o.

¹² Eke it hweap inalem ap wereg etno ilitoho, it hweaben ap endag inaptuk wereg-o. Eke yi angge di angge obog dambuksoho alem ari At Allah-at wereg-o.

¹³ Eke hit hinonggarehen alem du hinindi ebetuk amiek-o. It hweaben inasum koroko umbulug sembahyang uk ari fano behep?

¹⁴ Eke it ap kweanmon iniruk yaron ari hweap wereg epmano hag inebe iniruk apma neken wereg-o.

¹⁵ Eke it hweap epmano hag, iniruk inunggulasum neken og isebareg fam, it hweap iniruk yaron halug, inolohore fano atuk-o.

¹⁶ Eke at ap misig wene alem du fam ninim heahuog ulug suruk halug, nit Allah udaki ninim dambuksoho welaheon epmano ninune sahaltuk ahe eleg-o.

Orom roti etno inim ambusu etno inim fanoroho naruk amuk-o ulug yig isebahon wene 11:17-34

¹⁷ Eke wene misig du yanggul hisaminon etno fam, hit fano suruk ahep, ulug yig hisaruk ahi fug-o. Eke hit Allah wene ulen ulug wonggaltuk ahep ari, ninindi fanoroho welamuhuken ulug wonggaltuk ahep fug-o. Dag-at suog ulug wonggaltuk ahep-o.

¹⁸ Eke alem misig duroho nesanggo holtikik-o. Hit Allah udaki wonggaltuk ahebon epmano wene uruk wilil, healsaruk ahep ulug nesanggo holtikikseg fam, kidia demat ulug nahla bihi-o.

¹⁹ Eke it hinim welahebon arien fano surukon epmano selegma amag ulug, hinim healeg welahep etno alem ari-at-o.

²⁰ Eke hit hinim misigmu wonggaleg wilil naruk ahebon ari At Ninowe inuk fam orom ambusu etno naruk ahep fug-o.

²¹ Ariroho naruk wilil, it nin inaharom esag sarukon epmano yuhun-at naruk-o. Eke at misig orom obok heheg, eke ap misig ahumsoho nalug ambusu etnowen nenek seheg suruk-o.

²² Eke hinaharom, hinahik naruk ambeg ulug hinibam faleg eleg ano? Eke it Allah udaki dambuksoho werehon epmano hiren hinahlahirep isaruk ahep ano? Eke it inaharek elehon epmano inenggali war inabuog ulug suruk ahep ano? Eke alem ari fam keroho yig hisik-o? Hit fano welahep ulug yig nisawag hinahla buruk ahep ano? Ariroho yig hisamin fug-o.

²³ Eke At Ninoweyen yanggul nitision etno anden yanggul hisaruk ahi etno du at-o; eke At Ninowe Yesus wabukag ulug yonggo yig isa lebag etno sambit hupmu Aren orom roti inggikmu waruk wilil,

²⁴ Allah Nikni wa ulug sembahyang uruk apareg, kutuk wilil, “An nebe hit hinake og hisawon etno du at-o. Eke hit An nobam ebetuk amuhuben ulug, duroho-at suruk amuhup-o,” ulug yig isaruk apareg nebag.

²⁵ Naruk apareg, fobik ambusu sohorluk fam hononggowon etno waruk apareg, og isaruk wilil, “Kidia An namep fam At Allah hinim dambuk hinabukon etno ebe du at-o. Ambusu ari naruk wilil, An nobam hinindi ebetuk amuhup-o,” ulug yig isebag.

²⁶ Ariroho yig isebag etno hag, hit nintul nantul orom roti etno inim, ambusu honanggowon etno inim naruk wilil, At Ninowe etno awan waharuk eleg heheg, At warapahon wene etno yig isimuk-o.

²⁷ Eke ari halug, ap misihen At Ninoweyen angge orom roti, ambusu honanggo etno inim, yuhupfahik-o, ulug naruk halug, ap ari At Ninowe ebe wapahon etno inim, eke amep deloko embebahon etno inim alem at obam neken ombataruk-o.

²⁸ Eke ari halug, bilin it apheyen inindimu surukon epmano bukalepatawag-o. Eke ariroho bukalepatalug, orom roti, ambusu honanggo epmano inim nao ari fano-o.

²⁹ Eke At Ninowe obam inindi ebetuk eleg wilil, orom roti inim, ambusu honanggo epmano inim naruk isalug, oag deloko imbisawon etno inonggarehen at imig saruk-o.

³⁰ Eke ariroho suruk ari fam it aphe hinanggelegma epma werehon epmano it nin uk weheg, eke it nin obog inoag eleg aheg, eke it nin mondog waraheg suruk-o.

³¹ Eke nit hag ninonggarehen oag del saruk atlomen, At Allahen oag del ninaplep fug-o.

³² Eke nit ninebe it aphe kweanmon ninim dambuksoho oag del ninaplug ninusuk nowen ulug, At Ninowe etnowen ninesanggo waroko motoho ninombisaharuk-o.

³³ Eke ari halug, nomini, orom roti, ambusu epmano inim nulen ulug balu suruk hisalug, hit hit hinaso welamuk-o.

³⁴ Eke hit balureg weregma, At Allahen oag del hinabuk nowen ulug, at ap misig aharom obok halug, at ibamen-at naruk amag-o. Eke wene ariroho siuk ulug yig hisahukon etno atog fobik an waharuk aruhukseg, yig hisahuk-o.