Bìoball air-loidhne

2 Za̰a 1 - Kuo

Soko ká Za̰a hii ha̰ nzoɓ mbika lawri

¹ Ɓi ká mì ɓa ŋgɛrɛ tul peɗ ká tul nzoɓ mbika lawri ká i mbṵ tul kḭ na, mì ɗaa mbeɗe key ha̰ má̰y ká Ŋgɛrɛwṵru naa ni ɗo ɓoɗ ɓáy vi-eri, ɓari ká mì kɔ ri ɓa nzoɓ nun-i. Ɓa ɓi huo-i hɔy ze, mì kɔ rì ɓa nzoɓ nun-i ya, roo lɛ, ɓa ɓari riw bele ká i tuu tusuɛ ɓay tuu na,

² ɓay ḭi lɛ, tusuɛ ɓay na ɗaa puo ká ɓil law naari, a saɗ ziŋ naari ɓaŋguɔ.

³ Ndaɗ ɓay haŋa law huoke nda̰w, kɔ́kɔ nun síe nzoɓ nda̰w, rɔɔ ɗɛkɛkɛ taa Bǎa Ŋgɛrɛwṵru ɓáy Vi-e Zezu *Krisi na, ka sáɗ ziŋ naari, ɓay haŋa náa ɗǒkeri ɓil tusuɛ ɓay ɓáy law ini.

Ì kɔ kḭ ɓa nzoɓ nun kḭ

⁴ Mì ɗo ɓáy bawda suoriya, ɓay ḭi lɛ, mì ziŋ vu-ɔ ha̰nɛri ká i se simseɗ ká maa ɓáy tusuɛ ɓay munu ká Bǎa mbi nzi-ɛ ká ɗi na.

⁵ A timbɛɗɛ key na, tína kere, mì koɗ mù, náa hiiri kḭ ɓa lie ɓa lew. Ɓay ni ká mì ɗaa ɗo mbeɗe key na, ɓa *bol kusol fie ya, roo lɛ, ɓa bol kusol ká náa ya̰ari ɓayke ɓáy nam ká náa mbíkeri law naari hɔy.

⁶ Ì kɔ, híi Ŋgɛrɛwṵru na ɓa ɗaa vu mbom ɓo tul bol kusol-eri. A bol kusol ká ì laa ɓayke ɓáy nam ká ì mbíke law-rì hɔy na, ɓe ze ɗo key: ndaɗ ɓay haŋa rì ɗo ɓil law ini ɓaŋguɔ.

Ɗoko tul sùo ɓay

⁷ Nzoɓ úla nzoɓri ŋgḭi ɓamba i ya̰a zaɗ kpol kpol ká tusiri key. Ɓay ká mii, Zezu *Krisi ví ya̰a sùo ziŋ nzoɓ na, i hii ɓay ya̰aŋa ya. Nzoɓ ká ɗaa fe mini key na, ka ɓa nzoɓ úla nzoɓ, a ɓa nzoɓ tul ŋga̰ni Krisi.

⁸ Ì nzɛ ɓáy sùo-rì kḭ nda̰w rɔ, ɓay haŋa ɓo peɗ ká ì ɗaa na, ka ɓíɛ gɔr hɔy ya, roo lɛ, ì ya̰a fe tunduo peɗ ɓaarì na ɓay zaɗɛ ŋgiɗ bele.

⁹ Ì kɔ, nzoɓ ká ɗo tul ɓay ká i fere rì se tul Krisi ya, rɔɔ a se ɓáy taa ɓe ɓoɗ na, ka zuɔ ziŋ Ŋgɛrɛwṵru ya. A nzoɓ ká ɗo tul ɓayke na ku laa lɛ, ka zuɔ ziŋ Bǎa nda̰w, Vi-e nda̰w pi.

¹⁰ Ɓe mini ze, zaɗka nzoɓ se luo-rì, rɔɔ a fereri ɓay kḭ ɓoɗ lɛ, ì mgba ni ɓa sùo-rì ya, a í hii soko kara ha̰ ni ya nda̰w,

¹¹ ɓay ḭi lɛ, nzoɓ ká ɓaa ɓay ha̰ kḭri nzoɓ ká mini na mii: «Mu vi ɓáy kere» na, ɓe hɔy kara, ka ɗo ɓil fe ɗáa ka̰aya nzoɓke na nda̰w.

Wáa ɓay kɔ́m ɓáy soko ɓe

¹² Mì ɗo ɓáy feri ŋgḭ-ŋgḭi ɓay ɓáa ha rì, roo lɛ, mì hii ɓay vbíe ɓáy nduo-i hɔy ɗo mbeɗe ha rì ya. Mì hii ɓay séke luo-rì sùo-i ɓay haŋa náa ɓaari ɓay ká nun kḭ. Ɓe nda̰w rɔɔ, suoriya a mbáa ɓil law naari na gba̰y gba̰y ɓáy.

¹³ Vu tínaŋ-ari, ɓari ká Ŋgɛrɛwṵru nan ri ɗo ɓoɗ nda̰w na, i pie ɓáy soko ha̰ mù.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan