Salmos 82 - El Nuevo Testamento y unos libros del Antiguo Testamento

Dios kuu ia kaꞌnu ja jaꞌnde ndaa ya kuechi

¹ Maa ia Dios tatnuni nuu ka ndututu chuꞌchi ka oo ndee andivi, nagua ja kaꞌnde ndaa ya kuechi siki chuꞌchi yun.

² Te jiñaꞌa ya: “¿Nasaa ka kiuu vi kokaꞌan niꞌnu ron ja jaꞌa tniuu kueꞌe, ja maa ni ka chituu ron ñayiu ka saꞌa jakueꞌe?

³ Vi kaꞌan niꞌnu ja jaꞌa ñayiu inu vita vi ja jaꞌa suchi ka kuu laꞌu. Vi saꞌa ndaa ja jaꞌa ñayiu ka tnaꞌa tnundoꞌo vi ñayiu tu saꞌun nagua ka nevaꞌa.

⁴ Vi ndatau ñayiu ka tnaꞌa tnundoꞌo vi ñayiu tu saꞌun nagua ka nevaꞌa. Vi skaku niꞌnu jin nuu ndaꞌa ñayiu kueꞌe.

⁵ ’Chi tu ka jini ron ja ka kuu ron chuꞌchi, te ni tu ka jinkuiꞌnu ini ron, te ka jika ron ñunee, te ka kisi ndiꞌi ja oo ñuyiu.”

⁶ Te jiñaꞌa rin: “Chuꞌchi ka kuu maa ron, te ndiꞌi ron ka kuu seꞌe Dios, ia oo ndee sukun.

⁷ Su visi ni saa, te vi kuu ron, nagua ka jiꞌi ndiꞌi ñayiu, te vi ndonso ron nagua ka ndonso tee ka tatnuni”, jiñaꞌa rin.

⁸ Ndakoo ni, vi Dios, te sandaa ni kuechi ñayiu ñuyiu, chi maa ni kuu Jitoꞌo ñayiu ndiꞌi ñuu.