Salmos 67 - El Nuevo Testamento y unos libros del Antiguo Testamento

Ndiꞌi ñayiu ñuu na vi saꞌa kaꞌnui ia Dios

¹ Kundaꞌu ini ña ni jin in in san, vi Dios, te saꞌa ña ni javii javaꞌa, vi kaꞌan ndaꞌu kaꞌan kee ña ni,

² nagua ja na vi kuni ndiꞌi ñayiu ichi ni, te na vi kuni ñayiu ndiꞌi ñuu ja skaku niꞌnu ni jin.

³ Te na vi saꞌa kaꞌnu ña ñayiu jin ni, vi Dios. Te ñayiu ndiꞌi ñuu na vi saꞌa kaꞌnu ña jin ni.

⁴ Na vi kokuu sii ini ñayiu nii ñuu, te na vi kata vi kanai nuu ni, chi maa ni tatnuni ndaa nuu ñayiu, te maa ni jito jini ñayiu ñuyiu.

⁵ Te na vi saꞌa kaꞌnu ña ñayiu jin ni, vi Dios. Te ñayiu ndiꞌi ñuu na vi saꞌa kaꞌnu ña jin ni.

⁶ Te vii ndevaꞌa na kuvaꞌa nuu ñundeꞌi, chi maa ni, vi Dios, ja kuu ni ia Dios maa san, saꞌa ña ni javii javaꞌa.

⁷ Saꞌa vii saꞌa vaꞌa ña ni, te ndiꞌi ñayiu nii ñuyiu na vi koyuꞌu niꞌnu ña jin ni, vi Dios.