Salmos 16 - El Nuevo Testamento y unos libros del Antiguo Testamento

Ka kukanu inio Jitoꞌo Dios

¹ Koto ña ni jin san, vi Dios, chi kukanu ini san ja tavaꞌa ña ni.

² Te kachi san nuu ni, vi Jitoꞌo: “Maa ni kuu Jitoꞌo san, te tu na jaguaꞌa oo jin san nuu ja tu maa ni oo jin san”.

³ Te chuꞌchi ja ka oo ñuyiu, ka kachi ñayiu ka junkuaan ini ja ka ndikin, ja ia ndakui ndevaꞌa ka kuu.

⁴ Te kaya kuaꞌa ka tnundoꞌo vaji siki ñayiu ka nee yiñuꞌu ndevaꞌa nuu chuꞌchi yun. Su sein, chi ma vi nitnaꞌa saꞌun san jin ñayiu yun ja vi kati san niñi nuu chuꞌchi yun, te ni ma kondakakuneꞌe saꞌun san sivi chuꞌchi yun.

⁵ Maa ni, vi Jitoꞌo, kuu ia saꞌa jajin san, te taa maa ni javii javaꞌa, chi nuu maa ni vaji ja ni jine taꞌu san ja koo guaꞌa san.

⁶ Te vii ndevaꞌa nuu ni ka chikuaꞌa jin in yoꞌo ja ni kutaꞌu ni kundetu san, vi luu ndevaꞌa kaa nuu ni niꞌi san ja saꞌa jajin san, vi Dios.

⁷ Saꞌa kaꞌnu san Jitoꞌo Dios, chi xteku ña ya jin san, te vi ndee tnoꞌo jakuaa ndaskaꞌan ña jajintnuni san jin san.

⁸ Te siun ni ñuu ini san Jitoꞌo Dios, te tu na in xtajioo ña jin san nuu ya, chi oo ya ichi ndaꞌa kuaꞌa san.

⁹ Yun kuu ja kusii ini ndevaꞌa san jin anu san, te kukanu ini san ja koo guaꞌa yiki kuñu san.

¹⁰ Chi ma xndendoo ni anu san nuu yau ñaña, te ni ma kuandetu ni ja teꞌi yiki kuñu san, ja kuu san tee jinokuechi guaꞌa nuu ni, vi Dios.

¹¹ Chi xneꞌe ni ichi kaka san ja koteku san, te oo ndevaꞌa jasii ini nuu oo maa ni, vi Dios, te siun ni oo tnoꞌo sii ini ichi ndaꞌa kuaꞌa ni.