Salmos 127 - El Nuevo Testamento y unos libros del Antiguo Testamento

Ndiꞌi javii javaꞌa vaji nuu Jitoꞌo

¹ Nuu ja masu maa Jitoꞌo saꞌa in veꞌe, te tu jiniuꞌu, visi ka satniuu ndevaꞌa ñayiu ka saꞌa veꞌe yun. Te nuu ja tu in niꞌnu in sagua maa Jitoꞌo ja koto ya in ñuu, te tu jiniuꞌu, visi oo ñayiu jito guaguaꞌa ñuu yun.

² Te tu jiniuꞌu visi neꞌe ndevaꞌa ka ndakoo ni ka satniuu ni, te ndee ñini saꞌun, te saa ka ndatatu ni, te vi jin kuakuaꞌa tnundoꞌo, te ka niꞌi ni ja ka jaa ni. Chi maa Jitoꞌo kuñaꞌa ja vi kaa ñayiu kutoo ya nini ka kixin.

³ Te seꞌe kuelio ka kuu in javii javaꞌa, in ja ndee yaꞌu ndevaꞌa, ja ni ka kutaꞌuo nuu Jitoꞌo.

⁴ Te suchi ka kaku nuu kuechio ka kui na kuinio yutnu ndugua ja nee tee jaxin tnaꞌa.

⁵ Te na taꞌu na ndetu tee nevaꞌa chitu jatnu de jin yutnu ndugua de, ja ka kuu seꞌe de, chi ma kendoo kanoo de nuu ñayiu ka kaꞌan uꞌu ña jin de nuu kaꞌan niꞌnu de ja jaꞌa de nuu tee ka jaꞌnde kuechi ja ka oo yeꞌe ñuu.