Salmos 126 - El Nuevo Testamento y unos libros del Antiguo Testamento

Ka ndakuatu ñayiu ja na saꞌa ia Dios ja vi ndusii ini

¹ Nuu ni saꞌa Jitoꞌo Dios ja ni ka ndajiokuiin san ñuu san Sión, ja ni ka jika ndaꞌu san inka ñuu, te kuu na kuinio nuu ka jani san.

² Chi saa te ni ka jaku sii san vi ni ka jita san yaa nuu ia Dios. Yun te ni ka kachi ñayiu sava ka ñuu: “Kaꞌnu ndevaꞌa tniuu ni saꞌa Jitoꞌo Dios jin ñayiu yun”.

³ Te saa kuu, chi kaꞌnu ndevaꞌa tniuu ni saꞌa Jitoꞌo Dios jin san, te yun kuu ja ka kusii ini san.

⁴ Vitna te saꞌa ni ja na vi ndasama san, te vi koo guaꞌa san, nagua saꞌa ni ja ndajiokuiin yute nuu ñuꞌu yichi Neguev, vi Jitoꞌo san.

⁵ Chi na ñayiu jate ndikin tata jin tenui, te kokusii ini nuu ndaxtutui ja kee nuu ñundeꞌi.

⁶ Te na ñayiu ndaꞌi kuaꞌin nuu jatei triu tatai, te vi suaꞌa jitai ja kusii ini ndajiokuiin jin nuꞌni triui.