Salmos 114 - El Nuevo Testamento y unos libros del Antiguo Testamento

Ni saꞌa ia Dios javii javaꞌa nuu ni ndekuei ñayiu Israel ñuu Egipto

¹ Nuu ni ndekuei ñayiu Israel ñuu Egipto, te ni ka xndendoo ndikin tata Jacob inka ñuu ja ka kaꞌan inka nuu saꞌan,

² te Judá ni nduu veñuꞌu maa ia Dios, te Israel ni jinkokuu nuu tatnuni ya.

³ Te nuu ni jini ña ndute mar jin ñayiu Israel, te ni jino yuꞌu de, vi ni ndakaka yata ndute yute Jordán.

⁴ Te ni ka kanta sukun yuku naꞌnu na kuinio karneru, vi ni ka kanta sukun tinduu na kuinio lelu kueli.

⁵ ¿Te nagua ni ndoꞌo ron ndute mar? ¿Nau ja ni jino yuꞌu ron? Te roon yute Jordán, ¿nau ja ni ndakaka yata ron?

⁶ Te roon yuku naꞌnu, ¿nau ja ni ka kanta sukun ron na kuinio karneru? Te roon tinduu, ¿nau ja ni ka kanta sukun ron na kuinio lelu kueli?

⁷ Te tnaa ron ñuꞌu nuu oo ndiaꞌa Jitoꞌo, vi tnaa ron nuu oo ndiaꞌa Dios, ia ni ochiñuꞌu ndi Jacob.

⁸ Te maa ia Dios saꞌa ja in kava ni nduu nuu ñuꞌu ndute, chi kava yun ni nduu in nuu jinonta nuu ndute.