Salmos 99 - New Testament Psalms and Proverbs in Mixtec Magdalena Peñasco

Salmo 99 Su'si ma chi ñatuu xndoo ya ñayii ñuu ya ma

¹ Su'si o iya tátnuni ñuu ñayivi a, núkoo ya siki ángel nani querubín ma, te chukan kúu ja ndaka ñayii ka iyo ndaka ñuu ma, ka ni'i ka ni'i‑nka i ja ka yu'u i vaa skanda ya ñu'ú a.

² Su'si ma, iya kanuu kúu ya ñuu Sion ma, te ndaka ñayii ka iyo ñuu ñayivi a, ka ka'an i ja maa ya kanuu‑ka sana ndaka‑ka ñuu ma.

³ Jin ndachiñu'u ni ya, vaa iya kanuu iya ii iya koyu'u o kúu ya, te sa'a jin kuña'a ni ya:

⁴ “Maa ni kúu Rey iya sa'a ndaa sa'a ndija ma, te chukan kúu ja kóo jayiñu'u nuu maa ni a. Te maa ni káxtnu'u ja inuu‑ni ka kuu ndaka ñayii ma, te ñatuu na nde i kanuu‑ka. Te sukan ni sa'a ndaa ni sa'a ndija ni ji'in sa'ya tata Jacob ma.” Sa'a jin kuña'a ni ya.

⁵ Jín ndachiñu'u o Su'si o Iya Tátnuni ma, te jín kunukoo jiti o nuu ja'a ya ma, vaa maa ya chi iya ii kúu ya.

⁶ Moisés ma, ji'in Aarón ma, ji'in ndaka‑ka sutu ni ka yo jinukuechi nuu Su'si ma, ji'in Samuel ma, ji'in ndaka‑ka tee ni ka yo ndakune'e Su'si ma, ni ka yo jikan‑ta'vi de nuu ya, te maa ya ni yo ndakone'e nawa ka jikan‑ta'vi de ma.

⁷ Te ne'un viko ma ni yo ka'an Su'si ma nuu de ma, te ni ka yo sa'a de ndaka sukan ni yo tatnuni ya ma.

⁸ Iya Tátnuni, maa ni ni yo ndakone'e nawa ni ka yo ka'an de ma, te maa ni kúu Su'si iya ni yo sakanu ini na kuechi ñayii ñuu ni ma, te ni yo sa'a ni ja ni ka yo ndakuni, ni ka yo ndakoto i ja u'vi ni ka yo sa'a, ni ka yo kuu i ma.

⁹ Te chukan kúu ja yo'o chi jín kunukoo jiti o nuu yuku ii ya ma, te jín ndachiñu'u o Su'si o Iya Tátnuni ma, vaa iya ii kúu ya.