Salmos 98 - New Testament Psalms and Proverbs in Mixtec Magdalena Peñasco

Salmo 98 Jín ndaka'an jín ndakachi o ndaka ja va'a sa'a Su'si ma

¹ Jin kata ni in yaa jaa nuu Iya Tátnuni ma, vaa kua'a milagru ni sa'a ya. Te ja maa tnu'u ndee tnu'u ndatnu ya ma, te ni kundee ya.

² Iya Tátnuni ma, ni sa'a ya ja ndaka ñayii ma, ni ka jini i sukan sa'a ya ja jin kaku i nuu ja u'vi ma. Ni ka jini ndi'i, ni ka jini tu'u i sukan sa'a ndaa sa'a ndija ya ma.

³ Ni ndaka'án Su'si ma sukan kúnda'vi ini ya ndaka sa'ya tata tee kúu Israel ma, te ndaka ñayii ka iyo ni‑ka'nu ñuu ñayivi a, ni ka jini i sukan sa'a Su'si o ma ja jin kaku ñayii ma nuu ja u'vi ma.

⁴ Ndaka ni ja ka iyo ni ni‑ka'nu ñuu ñayivi a, jin kata sii ini ni nuu Su'si o Iya Tátnuni ma. Jin kata nini'i ni, te jin katu nda'a ni.

⁵ Te jin tee ni guitarra ma, te jin kata ni salmo ma, te vivii jin skixin ni tnu, te vivii jin kata ni nuu ya.

⁶ Te vivii jin tava ni yaa ma ji'in trompeta ma ji'in flauta ma, te sukan jin ndachiñu'u ni Rey o Iya Tátnuni ma.

⁷ Ni‑ka'nu nuu mar ma kó kuu yu'u, ji'in ndaka ja iyo ñuu ñayivi a.

⁸ Te yute ma, kó kuu yu'u ndute ma sukan kúu ora kátu nda'a o ma, te ndaka yuku ma jín koo sii ini xeen i

⁹ nuu maa Su'si o Iya Tátnuni ma iya ni ki koto naxe ka sa'a ka kuu o ja ka iyo o ñuu ñayivi a. Te sa'a ndandaa ya, te ndakan ndandaa ya kuenda nuu ndaka ñayii ka iyo ni‑ka'nu ñuu ñayivi a.