Salmos 97 - New Testament Psalms and Proverbs in Mixtec Magdalena Peñasco

Salmo 97 Su'si ma chi iyo tnu'u ndee tnu'u ndatnu ya

¹ Su'si ma kúu iya tátnuni nuu o a. Jin ndusii ini ndaka ni ja ka iyo ni nuu ñu'ú a, ji'in ndaka ni ja ka iyo ni yu'u mar ma.

² Vaa Su'si o a chi ni ndakonduu viko ma ya, te ni masu kuu kuni o ya, te tnu'u ndaa tnu'u ndija ma iyo nuu núkoo ya ja ka'nde ya tniñu ñayii ka sa'a ja u'vi ma.

³ Te ñu'u i'ni ma yoxtnuu nuu ya, te xnaa i ndaka ñayii ñatuu ka kunimani nuu ya ma.

⁴ Te sa'a ya ja jándute ichi kua'an ya ñuu ñayivi a, te ja ni jini ñu'ú ma ya, te ni yu'u i.

⁵ Te yuku ma, ja ni ka jini i Su'si iya tátnuni ni‑ka'nu ñuu ñayivi a, te ni ka ndatnana i sukan ndátnana xe'en ma nuu ñu'u i'ni ma.

⁶ Te ndaka andivi ma ni ka ndaka'an sukan sa'a ndaa sa'a ndija ya ma, te ndaka ñayii ka iyo ndaka ñuu ma, ni ka jini i jayiñu'u ya ma.

⁷ Jin ndakukan‑nuu ni, ndaka ni ja ka ndachiñu'u ni tna'a ja ni ka sa'a ñayii ma te ka jani ini ni ja su'si ni ka kuu ma. Te ka kuvixi ni ja ka kukanu ini ni ja su'si ni kúu chukan ma. Nute nuu Su'si ma ve koo i ma chi onde maa i jin kunukoo jiti nuu Su'si ndija ma, vaa maa in‑ni Su'si ma iyo ja jin ndachiñu'u o.

⁸ Te ni jiniso'o ñuu Sion ma, te ni ndusii ini i, te ni ka jiniso'o sasi'i ñayii ka iyo ñuu Judá ma, te ni ka ndusii ini i ja ni sa'a ndaa, ni sa'a ndija ni ma, vi Su'si.

⁹ Vaa maa ni kúu Iya Tátnuni, iya kanuu‑ka sana ndaka ja iyo ñuu ñayivi ya. Te maa in‑ni ni iyo ja ni'i ni jayiñu'u ma sana ndaka‑ka ja masu Su'si ka kuu ma.

¹⁰ Ndee ni ka kutoo Su'si Iya Tátnuni ma, jin saxiko ni ja u'vi ma, vaa maa ya chi jito va'a ya ndaka anua ñayii ñatuu‑ka na ja u'vi ka sa'a i ma, te ka ndayaa i nuu nda'a ñayii ka sa'a ja u'vi ma.

¹¹ Te xtnuu ya ñu'u maa ya ma nuu ka iyo ñayii ka sa'a ja va'a ja ndaa ma, te sa'a ya ja ka iyo sii ini ñayii ka iyo ndaa nuu ya ma.

¹² Jin koo sii ini ndaka ni ja ka sa'a ni ja va'a ja ndaa ma nuu Su'si Iya Tátnuni ma, te jin ndaka'an ni ja iya ii kúu ya, te jin ndachiñu'u ni ya.