Salmos 96 - New Testament Psalms and Proverbs in Mixtec Magdalena Peñasco

Salmo 96 Ndaka o jín kata in yaa jaa nuu Su'si Iya Tátnuni ma

¹ Jín kata o yaa jaa nuu Su'si o Iya Tátnuni ma. Ndaka o ja ka iyo o ñuu ñayivi a, jín kata o nuu ya.

² Jín kata o nuu Su'si Iya Tátnuni ma, te jín ndachiñu'u o ya, te ndi‑kivi ndi‑kivi jín ndaka'an o sukan sa'a ya ja ka kaku o nuu ja u'vi ma.

³ Jín ndaka'an jín ndakachi o sukan sa'a sukan kúu ya a nuu ndaka ñayii ka iyo ni‑ka'nu ñuu ñayivi a, sukan‑va'a jín kuni i te na koo jayiñu'u ya.

⁴ Vaa Su'si o Iya Tátnuni ma chi iya kanuu kúu ya, te maa ya iyo ja ni'i ya jayiñu'u, te maa ya iyo ja jin koyu'u o ya sana tna'a ja masu Su'si ka kuu ma, vaa maa ya ndakan kuenda nuu ndaka o.

⁵ Te ndaka‑ka ja ka ka'an sava ñuu ma ja su'si ka kuu ma chi másu nawa kuu jin sa'a i, kovaa Su'si o Iya Tátnuni ma kúu iya ni sa'a ni‑ka'nu andivi ma.

⁶ Suu ya kúu iya iyo ja jin ndakuan‑ta'vi o nuu ya, te jín ndachiñu'u o ya ini veñu'u ii iyo ya ma, te nuu maa ya na koo jayiñu'u, vaa iyo tnu'u ndee tnu'u ndatnu ya ma.

⁷ Ndaka o ja ka iyo o ndi‑in ndi‑in ve'e ma ja ka iyo o ndi‑in ndi‑in ñuu ma, jín ndakuan‑ta'vi o nuu Su'si o Iya Tátnuni ma, te jín ndachiñu'u o ya, vaa maa ya neva'a tnu'u ndee tnu'u ndatnu.

⁸ Jín ndachiñu'u ndi'i jín ndachiñu'u tu'u o ya, sukan iyo ja jin ndachiñu'u o ya ma. Ne'e koo ni ini veñu'u a ji'in nawa jin ndakua'a ni ya.

⁹ Te jín ndachiñu'u o Su'si o Iya Tátnuni ma, vaa iya vii iya va'a kúu ya, vaa ñatuu na ja u'vi sa'a ya. Ndaka o ja ka iyo o ni‑ka'nu ñuu ñayivi a, na jin koyu'u o ya, vaa ndakan ya kuenda nuu ndaka o.

¹⁰ Jín kuña'a o nuu ñayii ka iyo ni‑ka'nu ñuu ñayivi a ja Su'si ma kúu Iya Tátnuni, te suu ya ni sunkani vava'a ñuu ñayivi a, te masu kotuu i. Te maa ya ndakan ndandaa kuenda nuu ndaka ñayii ka iyo ndaka ñuu a.

¹¹ Jín ndusii ini ndaka ja ka iyo andivi a, ji'in ndaka ja ka iyo ñuu ñayivi a, te ni‑ka'nu nuu mar ma, kó kuu yu'u i ja iyo sii ini i.

¹² Te ndaka ja ka iyo yuku ma, jín ndusii ini i, sani te ndaka tna yutnu ka nukoo ma, jín ndusii ini xen‑xeen tnu

¹³ nuu maa Iya Tátnuni ma, iya ni kii ñuu ñayivi a ja ni jito ya naxe ka sa'a ka kuu ñayii ma, ji'in ndaka ja ka iyo ñuu ñayivi a. Te maa ya tátnuni nuu ndaka ñayii ka iyo ni‑ka'nu ñuu ñayivi a, te ndakan ndaa ya kuenda nuu i.