Salmos 95 - New Testament Psalms and Proverbs in Mixtec Magdalena Peñasco

Salmo 95 Jín kata sii ini o te jín ndachiñu'u o Su'si ma

¹ Ne'e koo ni, te ndaka o jín kata sii ini o nuu ya. Te ni‑yu'u ni‑ini o jín ndachiñu'u o Iya Tátnuni ma, vaa maa ya kúu toto nuu kuu jin kaku o ma.

² Jín kivi koo o nuu iyo ya ma, te jín kata o nuu ya, te jín ndakua'a o jayiñu'u ya.

³ Vaa maa ya kúu Su'si Iya Tátnuni iya kanuu xeen, te maa ya kúu Rey tatnuni‑ka sana ndaka‑ka ja ka xnani ñayii ma su'si i ma.

⁴ Te nuu nda'a maa ya iyo onde nuu kunu kunu‑ka ñuu ñayivi ya, te kuenda maa ya kúu yuku sukun sukun‑ka ma.

⁵ Te kuenda maa ya kúu mar ma, vaa maa ya ni sa'a, te maa ya ni sa'a ja iyo ñu'ú yichi ma.

⁶ Ne'e koo ni, te jín kunukoo jiti o nuu Su'si o Iya Tátnuni a, te jín ndachiñu'u o ya, vaa maa ya ni sa'a ña'a,

⁷ te maa ya kúu Su'si o, te yo'o chi ñuu maa ya ka kuu o, te kuenda tnu'u ja ndikachi ka kuu o nuu nda'a ya ma. Te nuna jin koniniso'o o vitna tnu'u ká'an Su'si o ma, vaa sa'a ká'an ya:

⁸ “Máko jin sa'a ndee ni ini anua ni a, sukan ni ka sa'a so'o tna'a ni ma nuu nani Meriba ma, ji'in sukan ni ka sa'a i kivi nuu ni ka iyo i nuu nani Masah ma nuu ñatuu kuiti nawa iyo ma.

⁹ Yukan ni ka jitotnuni ña'a yuva ni ma nú Su'si kúu sa te nú kuu kua'a sa ja ka jiniñu'u de ma, te ni ka jini maa de ndaka ja ni yo sa'a, ni yo kuu sa ma.

¹⁰ Te kuechi ja sukan ni ka sa'a ña'a de ma, te uu xiko kuiya ni ndakiti ini sa nuu ndaka ñayii yukan, te ni ka'an sa: Ndimaa ka ñu'u ya'a ka ñu'u yukan‑ni ini ñayii ya'a, te ni ñatuu ka jini i ichi ndaa káxtnu'u o ya.

¹¹ Chukan kúu ja nuu ni ndakiti ini sa ma, te ni ka'an sa: Másu jin kivi koo i nuu ni satu'va o ja jin ndatatu i ma”, kúu ya ká'an ya.