Salmos 94 - New Testament Psalms and Proverbs in Mixtec Magdalena Peñasco

Salmo 94 Su'si ma kuu iya ndákan kuenda nuu ñayii ñuu ñayivi a

¹ Su'si Iya Tátnuni, maa ni kúu iya sa'a ja jin ndachunaa ñayii ka sa'a ja u'vi ma. ¡Kaxtnu'u ni nuu i na in kúu ni!

² Kaxtnu'u ni ja iya ndákan kuenda nuu ñayii ñuu ñayivi a kúu ni te jín ndachunaa maa ñayii ja ka ka'an i ja maa i ka kuu‑ka ma.

³ Iya Tátnuni, ¿na saa‑ka kivi jin koo sii ini ñayii ka sa'a ja u'vi ma?

⁴ ¿Na saa‑ka kivi jin sa'a vixi ñayii yukan maa i ja maa i ka kuu‑ka ma, ja ndimaa ja u'vi ma ka sa'a i ma te ka ka'an ndeva'a i ma?

⁵ Te ka xnaa i ñayii ñuu ni ma kuan koo i, te ka xndo'o ka xneni i ñayii ni nduu kuenda maa ni ma, vi Iya Tátnuni.

⁶ Te ka ja'ni i ña'a ñatuu‑ka na yii ka iyo ma, ji'in ñayii in‑ka ñuu ma, te suni ka ja'ni tna i suchi kuechi ñatuu‑ka na yuva na si'i i ka iyo ma.

⁷ Te ka ndatnu'u i: “Másu kuni Iya Tátnuni ma, ja kúu ya Su'si tee ni yo kuu Jacob ma, te ni masu ndasa'a ya kuenda ja ka sa'a o a”, ka kuu i ka ka'an i.

⁸ Ndijin ja ka kuu ni ñayii inundee xeen ini a te ka kuneé ka ku‑uun ni a, jin jaku'ni ini ni te jin ndasa'a ni kuenda. ¿Te onde na saa‑ka kivi, sana jin jaku'ni ini ni?

⁹ ¿Xi ka jani ini ni ja iya ni sa'a so'o o ya, te ñatuu nde jiniso'o ya nawa ka ka'an o a? ¿Xi ka jani ini ni ja iya ni sa'a nduchinuu o ya, te ñatuu nde nde'ya ya nawa ka sa'a o a?

¹⁰ Iya kuu xndo'o xneni ni‑ka'nu ñuu ñayivi a, ¿ka jani ini ni ja masu ka'an ni'i ya nuu ni? ¿Xi ka sa'a ni kuenda ja iya káxtnu'u tnu'u ndichi nuu ñayii a, te ñatuu jini ya nawa ka jani ini ni?

¹¹ Vaa Iya Tátnuni ma chi jini ya nawa ka jani ini ndaka ñayii ma, te ja ka jani ini i ma, ndimaa ja masu kuatniñu o kúu.

¹² ¡Kovaa naka vii naka va'a kúu ñayii ja maa ni ndáka'an‑so'o nuu i ma, vi Iya Tátnuni! Te káxtnu'u ni tnu'u tátnuni ni a nuu i ma.

¹³ Te kuu ndatatu i kivi kenda tnundo'o tnuneni ma, nani ndó'o néni maa ñayii sa'a ja u'vi ma.

¹⁴ Vaa Iya Tátnuni ma chi masu ndunaa ya ñayii ñuu ya ma, te ni masu skendoo ya ñayii ni nduu kuenda maa ya ma.

¹⁵ Te ñayii ka ja'nde tniñu in‑ka ñayii ma chi ndandaa‑ni jin ka'nde i. Vaa ñayii ni ka yo sa'a ja va'a ja ndaa ma chi nanimaa‑nka ja va'a ja ndaa jin ko sa'a i.

¹⁶ ¿Na in kenda te chindee ña'a i, sukan‑va'a ma jin sa'a ndeva'a‑ka ña'a ñayii ka sa'a ja u'vi ma?

¹⁷ Nute ñatuu ni kenda Iya Tátnuni ma ja chindee ña'a ya chi nunuu‑ni, te kûu sa nkuu.

¹⁸ Te nuu ve kendeka ja'a sa ma nkuu, te ja kúnda'vi ini ña'a ni a, te ni kii ni, ni ki chindee ña'a ni, vi Iya Tátnuni.

¹⁹ Te nuu kua'a xeen ja yikuu sa jani ka'vi ini sa ma, te xndo'o xneni ña'a i ma, te maa ni ni ndaka'an mani ña'a, sani te ni ndusii ini xeen sa.

²⁰ Vaa masu kuu ketna'a ini ni ji'in ñayii ka tatnuni ñuu ñayivi ya ja ndimaa ja u'vi ka sa'a i ma. Te ka sa'a i tnu'u ja ka sa'a i sukan tátnuni ni ma, te su'va ka sa'a ndeva'a i ñayii ma.

²¹ Te su'va ka ndututu i, te ka ndatnu'u tna'a i ja jin ka'ni i ñayii sa'a ja va'a ja ndaa ma. Te ñayii ñatuu na kuechi ma, ka sa'a i ja jin kûu ñayii yukan.

²² Kovaa saña chi maa Su'si Iya Tátnuni ma, kuenda tnu'u ja in toto nuu kuu chu'u sa kúu ya, te suu ya kúkanu ini sa.

²³ Te sa'a ya ja jin ndani'i jin ndatna'a maa ñayii ma ndaka ja u'vi ka sa'a i ma, te maa ja u'vi ka sa'a ka kuu i ma, te xnaa ña'a i, vaa Su'si o Iya Tátnuni ma chi xnaa ya ñayii ka sa'a ja u'vi ma.