Salmos 93 - New Testament Psalms and Proverbs in Mixtec Magdalena Peñasco

Salmo 93 Su'si ma kúu Rey Iya Tátnuni

¹ Iya Tátnuni ma kúu Rey, te iyo xeen jayiñu'u ya. Iya Tátnuni ma kúu iya neva'a ndaka tnu'u ndee tnu'u ndatnu, te maa ya ni sunkani vava'a ñuu ñayivi ya, te másu kotuu i.

² Vaa onde xinañu'u ma ni jani ini ni ja koo vava'a nuu núkoo ni ja tátnuni ni a, te maa ni kúu Su'si iyo onde xinañu'u ma, te koo ni ni‑kani ni‑jika.

³ Iya Tátnuni, ni sa'a ni ja ni kuun savi te ni ka chitu yute ma, te yute ma chi ka ni'i ka ni'i‑nka ja kée ndeñu'u ma.

⁴ Iya Tátnuni iya iyo onde sukun ma kúu iya neva'a‑ka tnu'u ndee tnu'u ndatnu sana ndute kua'a xeen ma, te iyo‑ka tnu'u ndee tnu'u ndatnu ya sana nuu ndute kua'a kuá'an vee nuu mar ma.

⁵ Ndaka ja sa'a ja kúu ni ma chi ja ndaa ka kuu, te chukan kúu ja nuu iyo ni a chi ñatuu na ja u'vi koo. Saa vi, Su'si Iya Tátnuni, sukan kó kuu ni‑kani ni‑jika.