Salmos 92 - New Testament Psalms and Proverbs in Mixtec Magdalena Peñasco

Salmo 92 Sukan jin ndachiñu'u o Su'si iya va'a ini ma

¹ Ja va'a xeen kúu ja jin ndachiñu'u ña'a sa, vi Su'si Iya Tátnuni, te jin kata sa in yaa ká'an jayiñu'u ja kuu maa ni, vi Su'si iya iyo onde andivi ma.

² Te xtnee ne'e ma, te jin ndaka'an jin ndakachi sa sukan nda'vi ini ni ma, te jakuaa ma, te jin ndaka'an jin ndakachi sa ja maa ni chi ndimaa sa'a ni sukan skuiso ni ma.

³ Te jin tee sa guitarra ma, te vivii jin kata sa nuu maa ni.

⁴ Vaa nde'ya sa ndaka ja ni sa'a ni a, te chukan kúu ja iyo sii ini xen‑xeen sa, vi Su'si.

⁵ Masu na in kundee ndaka'an ndakachi ndaka ja ni sa'a, ni kuu ni, vi Su'si. Te ûni kua'a xeen kúu ja jani ini ni ja ni masu na in kundee ja jaku'ni ini i ndaka, vi Su'si.

⁶ Kovaa ñayii ñatuu ndása'a kuenda ndaka ja sa'a ja kúu ni a chi masu nawa jini kuiti i, te ñayii ndee ini ma chi ñatuu jáku'ni ini i ja maa ni ni sa'a ndaka ma.

⁷ Te chukan kúu ja kua'a xeen ñayii ka sa'a ja u'vi ma ka iyo, te ka ni'i ka tna'a i. Sukan nána kua'a xeen yi'i ma, sukan ka iyo i, kovaa iyo tu'va ja jin skenaa i maa i ni‑kani ni‑jika.

⁸ Kovaa maa ni chi ni‑kani ni‑jika iyo ni ichi andivi ma.

⁹ Te ja ndaa ndija kúu ja ñayii ñatuu nde ka kunimani i nuu ni ma chi jin skenaa i maa i, te ñayii ka sa'a ja u'vi ma chi jin skenaa i maa i, sani te jin kuitenuu i.

¹⁰ Kovaa nuu saña chi ndataa kua'a‑ka ni tnu'u ndee tnu'u ndatnu, sukan iyo tnu'u ndee tnu'u ndatnu xndiki ka'nu ka'nu ma, te chiso ni aceite tnu olivo ja yika ni kee ma xini sa a.

¹¹ Te konde'ya sa sukan jin kotuu ñayii ñatuu ka kunimani nuu sa ma, te kuniso'o sa sukan jin skenaa ñayii ka sa'a ja u'vi ma.

¹² Te ñayii ka sa'a ja va'a ja ndaa ma chi jin konukuiñi va'a i sukan ka nukuiñi va'a tnu ñuu ma, te jin koo va'a i sukan ka iyo tnu itni ka iyo ñuu Líbano ma.

¹³ Te jin koo va'a i ini ve'e Iya Tátnuni ma, te vivii jin ko kuu i nuke'e Su'si o ma.

¹⁴ Te visi ni ka kuu nija'nu i ma, kovaa jin sa'a i ja vii ja va'a ma, te ndimaa jin koo tnu'u ndee tnu'u ndatnu i, te sukan, te jin kuni ñayii ma ja ka iyo ndee ka iyo ndatnu i.

¹⁵ Te ja sukan ma, te ka kaxtnu'u i nuu ñayii ma ja Su'si Iya Tátnuni ma kúu iya wa'a tnu'u ndee tnu'u ndatnu ma iya sa'a ndaa sa'a ndija ma, te maa ya chi masu nde sa'a ndeva'a ya ñayii ma, vaa iya va'a ini kúu ya.