Salmos 9 - New Testament Psalms and Proverbs in Mixtec Magdalena Peñasco

Salmo 9 Sukan ndakuan‑ta'vi o nuu Su'si ma ja ja'nde ndaa ya tniñu ma

¹ Su'si maa sa, ja kúu ini sa kúu ja ni‑yu'u ni‑ini sa ndachiñu'u ña'a sa, te ndaka'an ndakachi sa ndaka ja vii ja va'a ni sa'a ni ma.

² Nuu maa ni ja iyo ni onde sukun ma koo sii ini xen‑xeen sa, te ûni kata jajaa sa nuu ni ja ndachiñu'u ña'a sa, vi Su'si.

³ Ndaka ñayii ñatuu ka kunimani nuu sa ma, ni ka ndakakayata i, te ni ka kotuu i nuu ni ma, te ni ka skenaa i maa i.

⁴ Vaa maa ni kúu iya ja'nde ndaa tniñu ñayii ma, te ni nukoo ni nuu núkoo ni ma, te ni ja'nde ndaa ni tniñu sa ma ji'in ñayii ñatuu ka kunimani nuu sa ma.

⁵ Ni ndonda ni nuu ñayii ka iyo ni‑ka'nu ñuu ñayivi a, te ni xnaa ni ndaka ñayii ka sa'a ja u'vi ma, te ni‑kani ni‑jika masu ndaka'án‑ka ni i.

⁶ Ndaka ñayii ñatuu ka kunimani nuu o ma chi ni xnaa ni i ji'in ñuu nuu ni ka iyo i ma, te ni masu na in ndaka'án‑ka ja ni ka iyo i ma, vaa ni xnaa ni ndaka nuu ni ka iyo i ma, vi Su'si.

⁷ Kovaa Iya Tátnuni ma, iyo ya ni‑kani ni‑jika, te jâ iyo tu'va nuu núkoo ya ma, sukan‑va'a ndakan ya kuenda nuu ñayii ma.

⁸ Maa ya ndakan ndandaa kuenda nuu ndaka ñayii ka iyo ñuu ñayivi a, te mamaa i jin ndakua'a kuenda naxe ni ka yo sa'a, ni ka yo kuu i ma.

⁹ Nuu Iya Tátnuni ma ko kuu nuu jin kaku ñayii nda'vi ma, te yukan jin kaku i kivi kii tnundo'o tnuneni ma.

¹⁰ Te ndaka ñayii ka jini ña'a i maa ni ma, ka kukanu ini ña'a i ja maa ni chindee i, vaa masu nama uun ni xndoo nda'vi ni ndaka ñayii ka ndanduku ña'a ma, vi Iya Tátnuni.

¹¹ Jin kata ni, te jin ndachiñu'u ni Su'si Iya Tátnuni ma, ja kúu ya Rey tátnuni yuku nani Sion ma, te jin kaxtnu'u ni nuu ndaka ñuu ma sukan sa'a sukan kúu ya ma.

¹² Vaa Su'si ma chi nde'ya ya sukan ka xndo'o ka xneni i ñayii nda'vi ma, sukan ka kayu'u ñayii ma ja ka kuxii ini i ma, te masu ndunaa ya. Chukan kúu ja ndaxndo'o ndaxneni ya ñayii ka sa'a ja u'vi in‑ka ñayii ma.

¹³ Iya Tátnuni, konde'ya ni te kuni ni sukan ndó'o néni sa ja ka sa'a ka kuu ña'a ñayii ñatuu ka kunimani nuu sa ma, vaa ka kiti xeen ini i nuu sa. Te kene'e ña'a ni, sukan‑va'a ma koo‑ka sa nuu ka ja'ni tna'a i ma, vaa jin ka'ni ña'a i ka kuni i.

¹⁴ Te onde ye'e ñuu Jerusalén a, te ndaka'an ndakachi sa nuu ñayivi a ja maa ni iyo ja jin ndachiñu'u ña'a sa, te kuña'a sa ja iyo sii ini xeen sa, vaa maa ni ni sa'a ja ni kaku sa.

¹⁵ Ndaka ñayii ñatuu ka kandija ña'a i maa ni ma, ni sa'a ni ja ni ka kêe koo maa i yavi nuu ni ka jate i ma, te ni ka nukun‑nee ja'a maa i nuu ni ka satu'va i ja jin tnii i ñayii xi‑nuu ka kuni u'vi i ma.

¹⁶ Ka jini o ja Iya Tátnuni ma, ja'nde ndandaa ya tniñu ñayii ma, vaa sa'a ya ja núkun‑tuu maa ñayii ma ja u'vi sa'a i ma.

¹⁷ Ndaka ñayii ka sa'a ja u'vi ma chi andeya ma jin koo i. Te ndaka ñayii ka ndunaa Su'si ma, suni yukan tna jin koo i.

¹⁸ Kovaa ñayii ñatuu kuiti nawa neva'a i ma te kúkanu ini i Su'si ma, chi másu ndunaa ña'a ya, ni a ñayii kunda'vi kukee ma, vaa kenda kivi ja jin ni'i i ja ka ndetu i ma.

¹⁹ Ndokuiñi ni, vi Iya Tátnuni, te máko kua'a ni tnu'u ja jin sa'a i sukan ka jani ini i ma, vaa ndaka ñayii ni‑ka'nu ñuu ñayivi a chi ndenda koo i nuu ni ma, te jin ndataa i kuenda nawa ni ka yo sa'a, ni ka yo kuu i ma.

²⁰ Iya Tátnuni, sa'a ni ja jín ndayu'u tna i, vaa maa ni ndakan kuenda nuu i ma, te sa'a ni ja ni‑ka'nu ñuu ñayivi a jín ndasa'a i kuenda ja ñayii‑ni ka kuu i ma.