Salmos 88 - New Testament Psalms and Proverbs in Mixtec Magdalena Peñasco

Salmo 88 Sukan kakan‑ta'vi o nuu Su'si ma ja na kaku o nuu ja u'vi ma

¹ Su'si maa sa, Iya Tátnuni, iya sa'a ja kaku sa nuu ja u'vi ma, nduu ñuu jikan‑ta'vi sa nuu ni.

² Te na kenda ja ká'an káchi sa ya nuu maa ni, te koniniso'o ni ja jikan‑ta'vi xen‑xeen sa nuu ni a, vi Su'si.

³ Vaa ini anua sa ya chi ni kuita i ja kua'a xeen ja u'vi ndó'o néni sa ya, te nasa yukan, te ki'in sa nuu ka iyo ñayii ni ka ji'i ma.

⁴ Vaa jâ ni kuita sa ya, te jâ ka jani ini ñayii ma ja sani te jin chu'u ña'a i.

⁵ Te kuenda tnu'u ja ndaka i ni jan koo ni ka jan xsia'a ña'a i nuu ka yinee ñayii ni ka ji'i ja kuan koo i ka kanaa i ma te ni ka skenaa i maa i ma. Te ndaka ñayii yukan ma, te ñatuu nde ndáka'án‑ka ni i ma.

⁶ Te kuenda tnu'u ja jâ ni skee ña'a ni onde ka'a yavi ma, nuu nee ma, nuu kunu‑ka ma.

⁷ Te ndaka ja ndákiti ini ni ma ni kenda siki sa ya, te ndaka tnundo'o ni tetniñu ni ma, jâ ni kundee i nuu sa a.

⁸ Ni sa'a ni ja ndaka ñayii ka ketna'a ini ji'in sa ma, ni ka skendoo ña'a i, te ka saxiko ña'a i, te kuenda tnu'u ja yinee va'a sa vekaa ma, te masu nde kúu ndee‑ka sa.

⁹ Te ka ku'u nduchinuu sa ya, ja sukan ni yo nda'yu sa ja ni yo kuxii ini sa ma, vaa ndaka kivi jikan‑ta'vi jikan‑ta'vi sa nuu ni, te skata nda'a sa nuu iyo ni a, vi Su'si.

¹⁰ ¿Xi sa'a ni milagru nuu ñayii ni ka ji'i ma? ¿Xi jin ndakoo ñayii ni ka ji'i ma te jin ndachiñu'u ña'a i?

¹¹ ¿Xi jin ka'an jin kachi ñayii ma tnu'u ndaa tnu'u ndija ni a nuu ñayii ni ka ji'i ma? ¿Xi jin ka'an i nuu masu na ñayii ka teku‑ka ka iyo ma sukan kútoo ni ñayii ma?

¹² ¿Te ndaka ñayii ka iyo nuu nee ma, xi jin ndaka'án i ndaka milagru ni sa'a ni ma? ¿Xi jin ndaka'an jin ndakachi i tnu'u ndaa tnu'u ndija ni ma nuu ka iyo ñayii jâ ni ka ndunaa ndaka ma?

¹³ Kovaa saña chi xtnee ne'e ma jikan‑ta'vi sa nuu ni, vi Su'si.

¹⁴ ¿Su'si maa sa, te nava'a saxiko ña'a ni te chu'u ni te ñatuu jini ña'a sa?

¹⁵ Vaa saña chi onde nuu jaa sa ma, te ndó'o néni sa ja xndo'o xneni ña'a ni ma, te masu kanda‑ka ini anua sa ya.

¹⁶ Vaa siki sa ya ni kenda ndaka ja ndákiti ini ni ma, te ni ka chitna'nu ña'a i.

¹⁷ Te ni ka ndakonduu ña'a i kuenda tnu'u ja ndute ma, te nuu‑ni nuu‑ni ka ndakasi ña'a i.

¹⁸ Te ndaka ñayii ka ketna'a ini ji'in sa ma, ni xtandiyo ni i nuu iyo sa a, ji'in ndaka ñayii ka ndikin tna'a ji'in sa ma. Te ndaka ñayii ka jini tna'a ji'in sa ma, ni chunee ni i nuu nee ma.