Salmos 87 - New Testament Psalms and Proverbs in Mixtec Magdalena Peñasco

Salmo 87 Naka va'a ko kuu o ja koo o ñuu ii Su'si ma

¹ Siki yuku ii Su'si ma ni sunkani vava'a ya ñuu Jerusalén ma.

² Te kútoo‑ka ya nuu kivi o ini ñuu ma sana ndaka‑ka nuu ka iyo sa'ya tata Jacob ma.

³ Te vivii ka ka'an i ja kuu ro, vi ñuu Su'si.

⁴ Te ndaka ñayii ka iyo ñuu Rahab ma, ji'in ñuu Babilonia ma, ji'in ñuu Filistea ma, ji'in ñuu Tiro ma, ji'in ñuu Etiopía ma chi ka ndakuni i ñayii ni ka kâku ñuu Sion ma.

⁵ Te sa'a jin ka'an i ja kuu ñuu Sion ma: “Ñayii iyo ya'a, ñayii iyo yukan chi ñuu Sion ma ni ka kâku i”, jin ka'an i, te Su'si iya iyo onde sukun ma chi sa'a ya ja jin koo va'a i.

⁶ Te Iya Tátnuni ma, ndáchiso tnuni ya ñayii ma nuu libru ya ma ja nani i ma ji'in nde ñuu i ma, te ká'an ya: “Ñayii ya'a chi yukan ni kâku i”, ká'an ya.

⁷ Sani te sa'a jin kata sii ini tee ka jita ma: “Ndaka ja ka neva'a o ya chi ñuu Su'si ma ni ka ke koo i”, jin ka'an de.