Salmos 83 - New Testament Psalms and Proverbs in Mixtec Magdalena Peñasco

Salmo 83 Sukan kakan‑ta'vi o nuu Su'si ma ja ma kua'a ya tnu'u ja jin kundee ñayii ñatuu ka kunimani nuu ñayii ñuu ya ma

¹ Su'si maa sa, máko koo nañii kuiti ni te ko kasiyu'u ni.

² Vaa jini ni sukan kini ka kuu yu'u ñayii ñatuu ka kunimani nuu ni ma, ja ka jani ini i ja maa i ka kuu‑ka ma, vaa lili lili‑ni kuan koo i, te ka saxiko ña'a i maa ni.

³ Te yuyu'u‑ni ka ndatnu'u tna'a i naxe jin sa'a ndeva'a i ñayii ka kuu ñuu maa ni a, vaa sukan ka jani ini i ja jin sa'a i ñayii jito va'a maa ni ma ja ka kuu i ñuu ni ma.

⁴ Te ñayii ñatuu ka kunimani nuu ni ma chi sa'a ka ka'an i: “Va'a‑ka jín koo o, te jín xnaa o ñayii kúu ñuu Su'si ma, sukan‑va'a masu jin ko kuu i ñuu ka'nu, te ñatuu na in ko ndakune'e‑ka sa'ya tata Israel ma”, ka kuu i ka ka'an i.

⁵ Te ndaka i in‑ni ja ka ndatnu'u tna'a i naxe jin sa'a ndeva'a ña'a i te jin kundee i nuu ni a, vi Su'si.

⁶ Te ndaka ñayii ka kuu edomitas ma, ji'in ñayii ka kuu ismaelitas ma, ja ka kuu i sa'ya tata Agar ma, ji'in ñayii ñuu Moab ma,

⁷ ji'in ñayii ñuu Gebal ma, ji'in ñayii ñuu Amón ma, ji'in ñayii ñuu Amalec ma, ji'in ñayii ñuu filisteo ma, ji'in ñayii ka iyo ñuu Tiro ma, te ndaka ñayii ya'a, inuu kuiti ni ka ketna'a ini i.

⁸ Te onde ñayii ñuu Asiria ma, ni ka jan nu tna'a i ñayii ya'a, te ka chindee i sa'ya tata Lot ma ja jin sa'a ndeva'a i ñayii ñuu ni a.

⁹ Su'si, sa'a ni sukan ni sa'a ni ñayii ñuu Madián ma, ji'in sukan ni sa'a ni tee kúu Sísara ma, ji'in sukan ni sa'a ni tee kúu Jabín ma yute nani Cisón ma,

¹⁰ ja ni ka skenaa de maa de ñuu Endor ma, te ni ka nduu yikikuñu de ma ja'an‑nka‑ni ini itu ma.

¹¹ Sa'a ni ja tee ka tatnuni‑ka ma, ji'in sa'ya de ma, na jin ndo'o de sukan ni ka ndo'o tee kúu Oreb ma, ji'in tee kúu Zeeb ma, ji'in tee kúu Zeba ma, ji'in tee kúu Zalmuna ma.

¹² Vaa sa'a ni ka yo ka'an de ma: “Ndaka ve'e nuu iyo Su'si ma jin nduu kuenda maa o”, ni ka yo kuu de ni ka yo ka'an de.

¹³ Su'si maa sa, sa'a ni ja ndaka ñayii ka ka'an sukan ma, te jín ndechi maa i jín koo i sukan ka kuu nda'a yutnu ma ja xndechi ña'a tikachiyaa ma,

¹⁴ xi sukan sa'a ñu'u ma ja ndákonduu i yuku ma te káyu ndaka nawa iyo ma.

¹⁵ Sa'a ni ja jáki'i xen‑xeen tachi, te sondikin ni i, te sa'a ni ja jín koyu'u xen‑xeen i ji'in tikachiyaa tetniñu ni ma.

¹⁶ Te sa'a ni ja jín ndatna'a xeen maa i ja kan‑nuu, vaa masu ja va'a kúu ja ka sa'a i ma, sukan‑va'a na jin ndanduku ña'a i maa ni ja kúu ni Iya Tátnuni ma.

¹⁷ Sa'a ni ja másu jin ni'i ini i naxe jin sa'a i, te jín ndatna'a maa i ja kan‑nuu ni‑kani ni‑jika, te ñatuu na in kó ka'an vii kó ka'an va'a‑ka ja jin kuu i, te na jin skenaa i maa i.

¹⁸ Te sukan, te jín kuni i ja maa ni kúu Iya Tátnuni te iyo ni onde sukun ma te tátnuni ni ni‑ka'nu ñuu ñayivi a.