Salmos 82 - New Testament Psalms and Proverbs in Mixtec Magdalena Peñasco

Salmo 82 Sukan ndonda Su'si ma nuu o, nú ma sa'a ndaa sa'a ndija o ja jin kuu ñayii ma

¹ Nuu ka iyo ñayii ja ka kuu i kuenda tnu'u ja Su'si ma iyo Su'si Iya Tátnuni ma, te me'ñu ndaka ñayii yukan ma núkuiñi ya ja ndákan ya kuenda nuu i ma.

² Te sa'a ni jiña'a ya: “¿Na saa‑ka kivi jin jatna ini ro ja ka sa'a ñayii ka sa'a ja u'vi ma? ¿Te na saa‑ka kivi jin kachi ro ja jin sa'a ndeva'a i ñayii nda'vi ma?

³ Va'a‑ka su'va jin chindee ñayii nda'vi ma, ji'in suchi ñatuu na yuva na si'i‑ka i ka iyo ma. Te suni jin chindee tna ro ñayii ka ndo'o ka neni ma, ji'in ñayii ka kunda'vi ka kukee ma.

⁴ Jin sa'a ro ja jin ndayaa ñayii ka ndo'o ka neni ma, ji'in ñayii ñatuu nawa ka neva'a i ja jin kaa i ma, jin ndayaa tna i nuu nda'a tee ka sa'a ja u'vi ma.

⁵ ’Vaa tee ya'a chi ka sa'a de ja u'vi ma, te ni masu nde ka jini de, te ni masu nde ka jaku'ni ini de nawa ka sa'a de ma, vaa ka iyo de nuu nee kuiti ma. Te ndaka kuiti ja ni tatnuni Su'si ma sukan ko kuu nuu ñayii ma ni ka ndaxsama de”, kúu ya jiña'a ya.

⁶ Saña chi ni jiña'a sa nuu ñayii a: “Ro'o chi kuenda tnu'u ja su'si ka kuu tna ro, vaa sa'ya Su'si iya iyo onde sukun ma ka kuu ro.

⁷ Kovaa jin kûu ro sukan ka ji'i ndeva'a‑ni ñayii ma, visi sa'ya tee ka tatnuni‑ka ma ka kuu i, sukan jin naa ro”, kúu ya jiña'a ya.

⁸ Su'si, ndokuiñi ni, te ndakan ni kuenda nuu ñayii ñuu ñayivi a, vaa kuenda maa ni ka kuu ñayii ka iyo ni‑ka'nu ñuu ñayivi a.