Salmos 81 - New Testament Psalms and Proverbs in Mixtec Magdalena Peñasco

Salmo 81 Sukan jin ndachiñu'u o Su'si ma vaa va'a xeen ini ya

¹ Jín kata sii ini o nuu Su'si iya kuu chindee chituu ña'a ma. Jín ndachiñu'u sii ini xeen o Su'si iya ni yo kukanu ini tee kúu Jacob ma.

² Jín kata o yaa nuu Su'si o ma, te jín skixin o pandero ma, te jin tee o arpa ma, ji'in guitarra ma yutnu ka kixin vivii ma.

³ Jín tivi o trompeta nuu Su'si ma kivi ndénda yoo jaa ma, te suni jín tivi o trompeta kivi iyo ja jin ndachiñu'u o Su'si ma, te jín sa'a o in viko ka'nu ja ka ndachiñu'u o ya ma.

⁴ Vaa Su'si iya ni yo kukanu ini tee kúu Jacob ma, sukan ni tatnuni ya ja jin ko sa'a ñayii ñuu Israel ma.

⁵ Nuu ni ka nde koo i ñuu Egipto ma, ûni ni tatnuni ya nuu sa'ya tata José ma, te sukan jin ko sa'a jin ko kuu i ja ka kuu i ñuu ya ma. Te ni jiniso'o sa in sa'an ja ñatuu ni jaku'ni ini sa, te sa'a ká'an:

⁶ “Ni xtandiyo sa siki chiyo ni a tna'a ja ka ndiso ni a, te ni ka ndatatu nda'a ni a, vaa masu nawa ka ndiso‑ka ni.

⁷ Te kivi ka ndo'o ka neni ni ma, ni ka ndakune'e ña'a ni, te saña chi ne'un viko ma iyo sa, te ni ndakone'e sa nuu ni sa'a sa ja ni too ndute ma nuu nani Meriba ma, te sukan ni jitotnuni ña'a sa nú ka kandija ni ja sa'a sa ma.

⁸ Te chukan kuu ja ndijin ja ka kuu ni ñayii ñuu sa a, jin koniniso'o ni, te ka'an‑so'o sa nuu ni. Ndijin ja ka kuu ni ñayii ñuu Israel ma, nuna jin koniniso'o ni ja ká'an sa ya te jin kandija ni,

⁹ te jin ku'un ini ni ja masu jin chiñu'u ni tna'a ja masu Su'si ka kuu ma, chi ni‑in ja masu Su'si ka kuu ma jin koneva'a ni ve'e ni ma.

¹⁰ Vaa saña kúu Su'si ndija Iya Tátnuni, te maa sa ni chindee ña'a ja ni ka nde koo ni ñuu Egipto ma. Jin ndakune ni yu'u ni a, te tnaa sa ja jin kaa ni.

¹¹ ’Kovaa ñayii ñuu sa ma, ja ka kuu i ñuu Israel ma, masu nde ni ka kandija i ja ká'an sa ma, te ni masu nde ni ka jatna ini i ja ká'an sa ma.

¹² Te kuechi ja inundee xeen ini i ma te chukan kúu ja ni xndoo sa i, te ni ka sa'a maa i sukan ka jatna ini i ma.

¹³ Saa vi. Nute ñayii ñuu sa ma, ni ka kachi i jin koniniso'o i ma te jin ko sa'a i sukan ni tatnuni sa ma, ja ka kuu i ñayii ñuu Israel ma,

¹⁴ chi saña chi nunuu‑ni, te xnaa sa ñayii ñatuu ka kunimani nuu i ma, te sa'a sa ja jin skenaa ñayii ka kuni u'vi nuu i ma nkuu.

¹⁵ Te ndaka ñayii ka saxiko ña'a saña ja kúu sa Iya Tátnuni ma chi jin kandija i ja ka ka'an ñayii ñuu sa ma. Te ni‑kani ni‑jika jin ndo'o jin neni maa ñayii ni ka saxiko ña'a i saña ma nkuu.

¹⁶ Nute ni ka kandija ñayii ñuu sa ma ja ká'an sa ma chi jin ko ni'i jin ko tna'a‑ka i, te ja va'a‑ka ma jin kaa i, te nduxi va'a‑ka iyo ne'un toto ma jin kaa i, te jin koo sii ini xen‑xeen i nkuu”, kúu ya ká'an ya.