Salmos 8 - New Testament Psalms and Proverbs in Mixtec Magdalena Peñasco

Salmo 8 Sukan káxtnu'u Su'si ma jayiñu'u ya ma te ndí ini ya ja ndákua'a tna ya jayiñu'u ñayii ma

¹ Su'si maa sa, Iya Tátnuni, vii xeen kúu ja nani ni a, te ja kanuu xeen kúu ni‑ka'nu ñuu ñayivi a. Onde andivi ma, onde sukun‑ka ma iyo jayiñu'u ni, vaa sukan ni kuni ni.

² Ja kuechi ñayii ñatuu ka kunimani nuu ni ma, te ni sa'a ni ja suchi kuechi ma, ji'in lulu suchi ka jaxi‑ka ma, ka ndachiñu'u ña'a i maa ni, vi Su'si. Te sukan, te sa'a ni ja jin kasiyu'u ñayii ñatuu ka kunimani nuu ni ma, ji'in ñayii ñatuu ka sa'a sukan tátnuni ni ma.

³ Te ora nde'ya sa andivi ma te jini sa yoo ma, tiuxini ma, ndaka ja ni sa'a maa ni ma,

⁴ te jani ini sa: ¿Nawa kúu ñayii ma, ja ndáka'an ni i? ¿Te nawa kúu sa'ya tata ñayii ma, ja chíndee ni i?

⁵ Te ni sa'a ni ja jaku‑ni kivi ka ndanuu‑ka ángel ma sana ñayii ma, te ni wa'a ni in corona, te vivii ni wa'a ni jayiñu'u ñayii ma,

⁶ te ni sunkani ni i ja jin ko koto i ndaka ja ni sa'a ni ji'in nda'a ni a. Te ndaka kiti ma ni xndoo ni ja jin tatnuni i nuu ti,

⁷ ka kuu ndikachi ma, xndiki ma, ndaka kiti ka iyo yuku ma,

⁸ ji'in lasaa ka ndava ichi andivi a, ji'in tiaka ka ñu'u nuu mar ma, ji'in ndaka kiti kuan koo ve koo ini mar ma, te nuu ndaka ti tátnuni i.

⁹ Su'si maa sa, Iya Tátnuni, vii xeen kúu ja nani ni a, te ja kanuu xeen kúu ni‑ka'nu ñuu ñayivi a.