Salmos 79 - New Testament Psalms and Proverbs in Mixtec Magdalena Peñasco

Salmo 79 Sukan ka kuxii ini ñayii ñuu Jerusalén ma ja ni ka kenda koo ñayii ka sa'a ndeva'a ña'a ma

¹ Su'si maa sa, ni ka kenda koo ñayii masu ka kandija ja ká'an ni a, te ni ka ndunda'a i ja kúu kuenda maa ni a, te ni ka sa'a ndeva'a i ini veñu'u ii ni a, te ni ka skendoo nda'vi, ni ka skendoo kee i ñuu Jerusalén ya.

² Te ni ka ja'ni i ñayii ka jinukuechi nuu ni ma, te ni ka wa'a i yikikuñu ñayii ma ni ka jaa lasaa ma ji'in kiti yuku ma.

³ Te ni‑ka'nu yu'u ñuu Jerusalén ma ni ka jati i niñi ñayii ni ka ja'ni i ma, te ka jika ka jika‑nka niñi i ma kuenda tnu'u ja ndute, te ñatuu na in iyo ja chu'u i ndiyi ma.

⁴ Te ñayii ka iyo yatni ma, ka ka'an ndeva'a i, te ka jakundee ña'a i.

⁵ ¿Na saa‑ka kivi ndakiti ini ni nuu sa, Su'si? ¿Ni‑kani ni‑jika ndakiti ini ni nuu sa? ¿Na saa‑ka kivi kuiso ini ni ja ndákiti ini ni ma?

⁶ Su'si, xndo'o xneni ni ñayii ka iyo in in ñuu ma ja ka tatnuni‑ka i ma te ñatuu ka ndakuni ña'a i maa ni ma te ñatuu ka ndakune'e ña'a i ja maa ni kúu Su'si ma te ka sa'a i ja ndákiti ini ni ma.

⁷ Vaa ni ka xnaa i ndaka ja ka neva'a sa'ya tata Jacob ma, te ni ka skendoo nda'vi, ni ka skendoo kee i ñuu de ma.

⁸ Te máko sa'a ni ja saña jin ndachunaa ndaka kuechi ni ka yo sa'a, ni ka yo kuu tna'a sa ñayii jana'a ma. Su'va ndunda'vi ini ña'a ni, vaa ka ndo'o ka neni sa ya.

⁹ Su'si maa sa, iya sa'a ja jin kaku sa ma, sakanu ini ña'a ni ndaka ja u'vi ni ka yo sa'a sa ma, te chindee ña'a ni ja na jin kaku sa, sukan‑va'a na koo jayiñu'u nuu maa ni ja kúnda'vi ini ña'a ni ma.

¹⁰ Vaa nú ña'a, te jin ka'an ñayii ñatuu ka kandija i maa ni ma: “Másu nde na'a ja iyo Su'si ñayii ya'a”, jin ka'an i. Sa'a ni ja na jin kuni sa sukan ndakan ni kuenda nuu ñayii ni ka ja'ni tee ka jinukuechi nuu ni a.

¹¹ Katanuu ni sukan ka tnana u'vi ñayii ka yinee vekaa ma, te chindee ni i ji'in tnu'u ndee tnu'u ndatnu ni a, sukan‑va'a jin kaku i te má jin ka'ni de i.

¹² Su'si Iya Tátnuni, sa'a ni ja uja‑ka jichi jin ndando'o jin ndatna'a maa ñayii ka iyo yatni ji'in sa ya, vaa ni ka ka'an ndeva'a ndekuu i ja kuu ni ma, vi Su'si.

¹³ Te saña ja ka kuu sa ñayii ñuu ni a, ja ka kuu sa ndikachi korraa ni a chi jin kata sa te jin ndachiñu'u ña'a sa ni‑kani ni‑jika ji'in sa'ya tata sa ma.